सितला माजु
सितला माजु स्वहुने परजाया गथिन हवाल
न्यना मदु खना मदु कचि मचा तय मदु, महाराजया हुकुम जुल
नायखिन बाजन थायका, सिपाहीन घेरे याका, कचिमचा पितिनाव छोत
नसा बजि ब्यकुंच्यासे, कचिमचा लुकुंछिसे, वनेमाल तामा खुसि पारि
छम्ह मचा लुकुंछिसे, छम्ह मचा ब्यकुंच्यासे, छम्ह मचा लुतुलुसे यने
यें देसं दना वना खोप देसे बास जुल, तलेजु माजु दरसन याये
खोप देसं दना वना बनेपास बास जुल, चन्देस्वरी दरसन याये
बनेपानं दना वना पलांचोस बास जुल, भगवति दरसन याये
पलांचोकं दना वना दोलाघाते बास जुल, भिमसेन दरसन याये
दोलाघातं दना वना तामाखुसि बास जुल, वने मानि तामाखुसि पारि
दोलखा देसं दना वना तामाखुसि पारि थ्यन, महादेव दरसन याये
नय यात नसा मदु तिय यात वस मदु, च्वने यात बास जित मदु
लखि मखु पसि मखु न्हाकंप्वाच दाया हल, सिपाहीन घेरे यानाहल
कइ बीम्ह कछला माजु, लख जायकीम्ह सितला माजु, यनकीम्ह बछला माजुयाके फोने
थ्व हे मचा बचे जुसा जोलिंजोल बखुन बोयके, लुंयागु ओयागु द्वाफो स्वान छाय
सुरज कोमजो थाल चिकुं पुना मचा सित, माम बुबां नुग दाया खोल
सीम्ह मचा उयमदु मचा गाले थुनेमदु, परजाया गथिन हवाल
बाम्ह मचा माम जोंसे बाम्ह मचा बुबां जोंसे तामाखुसि कुतकाव छोत
स्वामि जुजुया धर्म मदया कचिमचा वाके छोत, वनेमाल तामाखुसि पारि
नेपालया छत्रपति श्री रणबहादुर, परजान अति दु:ख सिल
मते मते सितला माजु सहश्र बिनति छिके, याहुने लोक उधार.
|
This work was published before January 1, 1929, and is in the public domain worldwide because the author died at least 100 years ago. |