یاد ہے آہ کا وہ رنگ نوا ہو جانا
یاد ہے آہ کا وہ رنگ نوا ہو جانا
یوں فضاؤں میں سمٹنا کہ گھٹا ہو جانا
اس قدر کیف کہ مدہوش فضا ہو جانا
دیکھنا ساز کو اور نغمہ سرا ہو جانا
حسن کی فطرت معصوم تھی پابند حجاب
عشق سے سیکھ لیا جلوہ نما ہو جانا
رسم آداب و محبت کا وہ پابند کہاں
جس کی تقدیر میں ہو نذر وفا ہو جانا
حسن اک عشق کی سوئی ہوئی کیفیت ہے
عشق ہے حسن کا بیدار وفا ہو جانا
نئی زنجیر ہے دنیا کا ہر اک ہنگامہ
اصل میں قید ہے زنداں سے رہا ہو جانا
مست پندار سہی ساز خودی کیوں چھیڑوں
بے خودی کو مری آتا ہے خدا ہو جانا
یاد ہے مجھ کو وہ گہوارۂ ظلمت کی فضا
اتنا تاریکی میں پھر تاکہ ضیاؔ ہو جانا
|
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries). |