گر عدو تقدیر ہے تدبیر رہنے دیجئے
Jump to navigation
Jump to search
گر عدو تقدیر ہے تدبیر رہنے دیجئے
دوست کا دل میں ہمارے تیر رہنے دیجئے
ہیں جو عاشق کام مزدوروں کا وہ کرتے نہیں
ذمۂ فرہاد جوئے شیر رہنے دیجئے
لیلیٰ و مجنوں کی اک کاغذ پہ ہوتی ہے شبیہ
روبرو اس کے مری تصویر رہنے دیجئے
ہے جنوں فصلی کرو زنجیر تار اشک سے
طور پر میرے مری تدبیر رہنے دیجئے
سیم و زر بنتا ہے خاک کشتۂ دل سے آپ کے
پاس اپنے جان کر اکسیر رہنے دیجئے
آستیں سے ہاتھ باہر ہو نہ اے جان جہاں
بس میاں اندر ہی یہ شمشیر رہنے دیجئے
تیر بے پیکاں نشانہ توڑتا ہے کب وقارؔ
منہ کی منہ میں آہ بے تاثیر رہنے دیجئے
|
This work is in the public domain in the United States but it may not be in other jurisdictions. See Copyright.
|