کر کے قول و قرار کیا کہنا
کر کے قول و قرار کیا کہنا
او فراموش کار کیا کہنا
ہو کے نادم گنہ سے پاک ہوا
واہ رے شرمسار کیا کہنا
کام بگڑے تو ہی بناتا ہے
اے مرے کردگار کیا کہنا
خوب تو نے سنی لگی دل کی
واہ رے غم گسار کیا کہنا
دن کو تارے دکھا دئے تو نے
اے شب انتظار کیا کہنا
خاک میں بھی ملا کے اے ظالم
نہ کیا اعتبار کیا کہنا
دل حسرت زدہ رہا نہ رہا
اس کا قول و قرار کیا کہنا
اس سے حال غم دل مظلوم
جو نہ ہو شرمسار کیا کہنا
با وفائی بھی تیری اے دل زار
رہ گئی یادگار کیا کہنا
نہ سنے ایک بار جو دل کی
اس سے پھر بار بار کیا کہنا
خم کے خم شوقؔ کر دئے خالی
اے مرے بادہ خوار کیا کہنا
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|