کتاب پیدائش: باب نمبر 49

پَیدائش باب 49
(1) اور یعقُوب نے اپنے بیٹے بیٹوں کو یہ کہہ کر بُلوایا کہ تُم سب جمع ہوجاؤ تاکہ مَیں تُم کو بتاؤں کہ آخری دِنوں میں تُم پر کیا کیا گُذرے گا۔(2) اَے یعقُوب کے بیٹوں جمع ہوکر سُنو۔ اپنے باپ اِسرائیل کی طرف کان لگاؤ۔(3) اَے رُوبِن ! تُو میرا پہلوٹھا میری قُوّت اور میری شہزُوری کا پہلا پھل ہے۔ تُو میرے رُعب کی اور میری طاقت کی شان ہے۔(4) تُو پانی کی طرح بے ثبات ہے اِس لِئے تُجھے فضیلت نہیں مِلے گی۔ کِیُونکہ اُسے نجِس کِیا۔ رُوبِن میرے بچھونے پر چڑھ گیا۔(5) شمعون اور لاوی تو بھائی بھائی ہیں۔ اُن کی تلواریں ظُلم کے ہتھیار ہیں۔(6) اَے میری جان ! اُن کے مشورہ میں شرِیک نہ ہو۔ اَے میری بُزرگی ! اُن کی مجلس میں شامِل نہ ہو۔ کِیُونکہ اُنہوں نے اپنے غضب میں ایک مرد کو قتل کِیا۔ اور اپنی خُودرائی سے بَیلوں کی کُونچیں کاٹِیں۔(7) لعنت اُن کے غضب پر کِیُونکہ وہ تُند تھا اور اُن کے قہر پر کِیُونکہ وہ سخت تھا۔ مَیں اُنہیں یعقُوب میں الگ الگ اور اِسرائیل میں پراگِندہ کرُونگا۔(8) اَے یہوداہ ! تیرے بھائی تیری مدح کریں گے تیرا ہاتھ تیرے دُشمنوں کی گردن پر ہوگا۔ تیرے باپ کی اَولاد تیرے آگے سرنِگُوں ہوگی۔(9) یہوداہ شیر ببر کا بچّہ ہے۔ اَے میرے بیٹے ! تُو شکار مار کر چل دِیا ہے۔ وہ شیر ببر بلکہ شیرنی کی طرح دَبک کر بَیٹھ گیا۔ کَون اُسے چھیڑے؟(10) یہوداہ سے سلطنت نہیں چُھوٹیگی اور نہ اُس کی نسل سے حکومت کا عصا موقُوف ہوگا۔ جب تک شیلوہ نہ آئے اور قَومیں اُس کی مُطیع ہوں گی۔(11) وہ اپنا جوان گدھا انگُور کے درخت سے اور اپنی گدھی کا بچّہ اعلٰے درجہ کے انگُور کے درخت سے باندھا کرے گا۔ وہ اپنا لِباس مَے میں اور اپنی پوشاک آبِ انگُور میں دھویا کرے گا۔(12) اُس کی آنکھیں مَے کے سبب سے لال اور اُس کے دانت دُودھ کی وجہ سے سفید رہا کریں گے۔(13) زبُولُون سمندر کے کنارے بسے گا اور جہازوں کے لِئے بندر کا کام دے گا۔ اور اُس کی حد صِیدا تک پھَیلی ہوگی۔(14) اِشکار مضبوط گدھا ہے جو وہ بھیڑ سالوں کے درمیان بَیٹھا ہے۔(15) اُس نے ایک اچھّی آرام گاہ اور خوش نُما زمِین دیکھ کر اپنا کندھا بوجھ اُٹھانے کو جُھکایا اور بیگار میں غُلام کی طرح کام کرنے لگا۔(16) دان اِسرائیل کے قبیلوں میں سے ایک کی مانِند اپنے لوگوں کا اِنصاف کرے گا۔(17) وہ راستے کا سانپ ہے۔ وہ راہ گُذر کا افعی ہے جو گھوڑے کے عقب کو اَیسا ڈستا ہے کہ اُس کو سوار پچھاڑ کھاکر گِر پڑتا ہے۔(18) اَے خُداوند ! مَیں تیری نجات کی راہ دیکھتا آیا ہُوں۔(19) جد پر ایک فَوج حملہ کریگی پر وہ اُس کے دُنبالہ پر چھاپا مارے گا۔(20) آشر نفیس اناج پَیدا کِیا کرے گا اور بادشاہوں کے لائِق لذِیذ اشیا مُہیّا کرے گا۔(21) نفتالی اَیسا ہے جیسے چُھوٹی ہُوئی ہرنی۔ وہ میٹھی میٹھی باتیں کرتا ہے۔(22) یُوسف ایک پھل دار پَودا ہے۔ اَیسا پھل دار پَودا جو پانی کے چشمہ کے پاس لگا ہُؤا ہو اور اُس کی شاخیں دِیوار پر پھَیل گئی ہوں۔(23) تِیری اندازوں نے اُسے بہت چھیڑا اور مارا اور ستایا ہے۔(24) لیکن اُس کی کمان مضبُوط رہی اور اُس کے ہاتھوں اور بازوؤں نے یعقُوب کے قادِر کے ہاتھ سے قُوّت پائی۔ وہیں سے وہ چَوپان اُٹھا ہے جو اِسرائیل کی چٹان ہے۔(25) یہ تیرے باپ کے خُدا کا کام ہے جو تیری مدد کرے گا۔ اُسی قادِر مُطلق کا کام جو اُوپر سے آسمان کی برکتیں اور نِیچے سے گہرے سُمندر کی برکتیں اور چھاتِیوں اور رَحمِوں کی برکتیں عطا کرے گا۔(26) تیری باپ کی برکتیں میرے باپ دادا کی برکتوں سے کِہیں زیادہ ہیں اور قدِیم پہاڑوں کی اِنتہا تک پُہنچی ہیں۔ وہ یُوسف کے سر کی چاندی پر جو اپنے بھائیوں سے جُدا ہُؤا نازل ہوں گی۔(27) بنیمین پھاڑنے والا بھیڑیا ہے۔ وہ صُبع کو شِکار کھائے گا اور شام کو لُوٹ کا مال بانٹے گا۔(28) اِسرائیل کے بارہ قبِیلے یہی ہیں اور اُن کے باپ نے جو جو باتیں کہہ کر اُن کو برکت دی وہ بھی یہی ہیں۔ ہر ایک کو اُس کی برکت کے مُوافِق اُس نے برکت دی۔(29) پھِر اُس نے اُن کو حُکم کِیا اور کہا کہ مَیں اپنے لوگوں میں شامِل ہونے پر ہُوں۔ مُجھے میرے باپ دادا کے پاس اُس مغارہ میں جو عِفرون حِتی کے کھیت میں ہے دفن کرنا۔(30) یعنی اُس مغارہ میں جو مُلکِ کنعان میں ممرے کے سامنے مکفِیلہ کے کھیت میں ہے جسے ابرہام نے کھیت سمیت عِفرون حِتی سے مول لِیا تھا تاکہ گورِستان کے لِئے وہ اُس کی ملکیت بن جائے۔(31) وہاں اُنہوں نے ابرہام کو اور اُس کی بیوی سارہ کو دفن کیا۔ وہیں اُنہوں نے اِضحاق اور اُس کی بِیوی رِبقہ کو دفن کِیا اور وہیں مَیں نے بھی لیاہ کو دفن کِیا۔(32) یعنی اُسی کھیت کے مغارہ میں جو بنی حِت سے خریدا تھا۔(33) اور جب یعقُوب اپنے بیٹوں کو وصیّت کرچُکا تو اُس نے پاؤں بچھونے پر سمیٹ لِئے اور دم چھوڑ دِیا اور اپنے لوگوں میں جا مِلا۔ </dir>