مَلکی آکھدی لڑیوں جے نال چُوچک
مَلکی آکھدی لڑیوں جے نال چُوچک
کوئی سُخن نہ جیو تے لیاونا ای
کِیہا ماپیاں پُتراں لڑن ہوندا
تُساں کھٹنا تے اَساں کھاونا ای
چِھڑ مال دے نال میں گھول گھتی
شامو شام راتیں گھریں آونا ای
توں ہی چوئیکے دُوھ جماونائی
توں ہی ہیر دا پلنگ وچھاونا ای
کُڑی کل دی تیرے توں رُس بیٹھی
توں ہی اوس نُوں آ مناونا ای
منگو مال سیال تے ہیر تیری
نالے گُھورنا تے نالے کھاونا ای
منگو چھیڑ کے جھل وِچ میاں وارث
اَساں تخت ہزارے نوں جاونا ای
|
This work was published before January 1, 1929, and is in the public domain worldwide because the author died at least 100 years ago. |