ممکن مجھے جو ہو بے ریا ہو
Jump to navigation
Jump to search
ممکن مجھے جو ہو بے ریا ہو
مسند ہو کہ اس میں بوریا ہو
جب قابل دید دل ربا ہو
اللہ کرے کہ با وفا ہو
بھیجا نہیں خط شوق کب سے
معلوم ہوا کہ تم خفا ہو
بے تابئ دل اگر دکھاؤں
کوئی نہ کسی کا مبتلا ہو
مرتا ہے زر پہ اہل دنیا
نامرد کو کب خواہش طلا ہو
مٹی کر دے جو آپ کو تو
نظروں میں خاک کیمیا ہو
آئی ہے فصل گل چمن میں
اے ہوش و خرد چلو ہوا ہو
کیا مجھے در بدر پھرایا
اے خواہش دل ترا برا ہو
دکھلائی تو نے یار کی شکل
اے جذبۂ دل ترا بھلا ہو
لپٹو مجھے آ کے ہجر کی شب
اے گیسوئے یار اگر بلا ہو
اے منتہیؔ بزم یار کا حال
کیا جانئے بعد میرے کیا ہو
|
This work is in the public domain in the United States but it may not be in other jurisdictions. See Copyright.
|