| عەزم جەختمەن ...
|
ئەمجار وە تاقی عەزم جەختمەن
|
| هیجرانت وە دڵ بەڵای سەختمەن
|
یە گشت تەقازای شوومیی بەختمەن
|
| عەزمی شکارگای کۆساڵانمەن
|
بەڵام جە دووریت پەشێو حاڵمەن
|
| بێ تۆ چۆن گێڵوون نەو دەشت و دەردا؟
|
بێ تۆ چۆن گوڵان کەروون وە سەردا؟
|
| جەو مەکان ئاهووی وێنە چاو مەستان
|
بەران مەکەران دەستان بە دەستان
|
| بێ تۆ ئەر مەیل کەم بە شکارشان
|
حەسرەتمەند مانوو وە دیدارشان
|
| کەبکی کۆساری جەو سەحرا و کۆدا
|
قەهقەهـ مەوانۆ نەو شەو و ڕۆدا
|
| ئەر سەیرشان بێ تۆ سەر وە بەرگم بۆ
|
ئی سەفەر سەفەر لوای مەرگم بۆ
|
| جۆق جۆق قومرییان نەو مەکانەدا
|
دایم مەشغووڵەن نە سەیرانەدا
|
| بەبێ تۆ ئەگەر نە دڵ بۆ شەوقش
|
نە گەردەنم بۆ ئەو سیا تەوقش
|
| نەو وادیی دڵبەر بوڵبوڵ مەوانۆ
|
سەحەرگە بە ناز دیدار مەنمانۆ
|
| ئەگەر بە بێ تۆ مەیل کەروو پێشان
|
نە دیدە کۆر بام، دەستم بکێشان
|
| جەو ماوا پۆل پۆل هەزار دەستانەن
|
ڕەسمشان دایم وێنەی مەستانەن
|
| وەستانشان -- ئەر بێ تۆ مەیل کەم
|
دوور جە تۆ خاتر نە زووخاو کەیل کەم
|
| ئیسە من لوام بییەن وە تاقی
|
وەختێ تەر پەیمان نەمەندەن باقی
|
| دیداری ئاخر بنمانیم بە یەک
|
کامی ناکامی بستانیم جە یەک
|
| بەڵکە عومرمان وەفا نەکەرۆ
|
من ماچوون، بەڵام خودا نەکەرۆ
|
| باقي و السلام، نووری دیدەی من
|
دڵبەند و دڵدار، بەرگوزیدەی من
|
