| شیرین ئەرمەن بەو نازەنینی
|
جەی ڕاز شیرین شاپوور چینی
|
| خێزاش نە دەروون ئاهێ سەنگ شکاو
|
چون بوخار بەحر دوود مدا بە تاو
|
| خاستەر تیر عەشق خونڕێز خوسرەو
|
تا پەڕ نیشت نە جەرگ دووسەد پارەی ئەو
|
| بەو شان و شەوکەت شکۆ و سامەوە
|
بەو سەوڵ قامەت سیم ئەندامەوە
|
| خەم بی چون چەمەی ئەو چەوگان بازی
|
نە نە، چون کەمان حەڵقەی شیرازی
|
| لەرزا نە هوجووم نە جای داخ دەرد
|
کێشا چون دوودیی دۆزەخ ئاهـ سەرد
|
| واتش بە شاپوور بە گریانەوە
|
بە جەرگ ڕێزەی چون بوریانەوە
|
| ئەرێ هۆ جوان دانای ڕەوشەن دڵ
|
سا چێشەن تەدبیر ئەی کار موشکوڵ
|
| شاپوور وات هەی سەوڵ «جنة المأوي»
|
ناف نافەی میشکین مودبیرەی ساوا
|
| ڕای سەواب ئێدەن نەزانان بەی کار
|
نە مەحرەم، نە خوێش، نە قەوم، نە ئەغیار
|
| ڕوێ بۆ سەیر گوڵان گوڵزار
|
پا بنیەر نە پشت شەبدێز ڕەهوار
|
| جە ناگاهـ چون چەرخ تەور خۆش ئەنداز
|
شەودێز شەوڕەنگ باوەر نە پەرواز
|
| دەغدەغەت نەبۆ زوڵفان عەنبەر بێز
|
باد نمەیاوا بە گەرد شەودێز
|
| تەیکەر وێنەی تەیر بە زەوق و شادی
|
کۆسار بە کۆسار، وادی بە وادی
|
| منیش نە عەقەب تۆ مبۆ ڕەوان
|
پەنەت میاوون ئاخر بە داوان
|
| ئێد وات خانەمێ بەراوەرد وەبەر
|
ساق جە تەڵای ساف، نقێم جە گەوهەر
|
| واتش یەسەوقات شەهریاریەن
|
پەی تۆش کیاستەن، یادگاریەن
|
| خوسرەویچ قیبلەم جە تۆ بەتەرەن
|
جە سەودای باڵات زامش خەتەرەن
|
| مزانوو مەیۆ بە ئیستیقباڵت
|
زەروورەن بە دین جەمین لاڵت
|
| وەختێ یاوا پێت ئەو شای جەم شکۆ
|
نیشاندەر خانەم تا بشناسۆ تۆ
|
| شیرین وات چۆنەن نیشانەی خوسرەو
|
چ تەورەن شێوەی شەهریاریی ئەو
|
| واتش نەو خەتەن، تەمام لاڵ پۆشەن
|
فێشتەر جە خورشید خاوەر شکۆشەن
|
| باڵاش سەهی سەرو چەمەن مبێزۆ
|
شۆڵەی شەم جە نوور حوسنش مخێزۆ
|
| سەوزەی خەت نە پشت لەبان لاڵش
|
نا حاشیەی حوسن زێبای زوڵالەش
|
| منمانۆ شۆخ شۆخ شای دیدە سێوەنگ
|
چەن ڕەنگ نە ڕوی قورس یاقووت خوش ڕەنگ
|
| جە شۆخێ چون شاخ عەرعەر لەرزانەن
|
قامەتش قەزای باڵا بەرزانەن
|
| بە شان و شەوکەت شەهریار ئەو
|
نیەن هیچ شاهێ هەر مەر کەیخوسرەو
|
| بە حوسن و جەماڵ هیچش نیەن کەم
|
ئەر نەسیب ببۆ بوینش بە چەم
|
| ئەوسا مەزانتی من ڕاستم واتن
|
ئەسکەندەر شەوکەت فەریدوون زاتەن
|
| ئەر ئەو شەهەنشای توهەمتەن شکۆ
|
موشەڕەف نەبی بە خاکپای تۆ
|
| چون مودبیرەی شۆخ سوبخێز سەحەر
|
ڕاگەی مەدائین وە تەعجیل تەی کەر
|
| بە فەڕ و ئیقباڵ قەدەم بەر بە دەو
|
بە مشکۆی بۆ میشک فەربەخش خوسرەو
|
| جۆگە خادمان سەرا پەردەی شا
|
مەحرەمان بەزم بەهەشت بارگا
|
| قەدرت مگێران جە گشت زیاتەر
|
منیان نە فەرقت چون شاهان ئەفسەر
|
| هەم بە شەوق حوسن شا مبی مەسروور
|
چوون مووسا بە نوور تەجەلای کۆی توور
|
| سا خاستەر جە ئێد چێشەن مرادت
|
حەق بە وەسڵ دۆس بکەرۆ شادت
|
| ئێد وات بە تەعجیل هەرچی تەمامتەر
|
«دەوڵەت زیاد» کەرد، ڕاگەش گرتنە وەر
|
| جەودەما یاران زوڵف بۆ عەنبەرین
|
چون پەروین جەم بین نە دەور شیرین
|
| فەرماش تا سەیوان خوسرەوی گوڵزەڕ
|
بار کەردن سەوڵان ساوای شاپەروەر
|
| خاو خاو خەرامان شیرین ئەرمەن
|
چەنی سوپا و سان یاوان بەو مەسکەن
|
| تا چەن ڕۆ چۆگە چون هەردە جاران
|
بە شاد منۆشا مەی چەنی یاران
|
| بەڵێ دەروونش هەردەم مدا جۆش
|
جە ئایر عەشق خوسرەو لاڵ پۆش
|
