| بشنەو جە شیرین خاتر خەتەر ڕێش
|
ئاما نە سەرکار قەسد قەتڵ وێش
|
| شیرین بە شیوەن خێزا بەو خەرام
|
چەنی کەنیزان لوا بە حەمام
|
| بەرگ سەوادی سیاش کەرد نە وەر
|
سڵسڵە و سەروێن هەوا دا جەسەر
|
| عوریان کەردش تەن زەخمین داخی
|
بەرگ ئازیەت سیا قەڵاخی
|
| بلووری بەدەن، کافووری وێن
|
سەر بەرد نە حوجرەی حەوز خەزێنە
|
| گێسوو کەمەندان، زوڵفان چین چین
|
پەخش کەرد نە ڕووی ئاو زوڵفان موشکین
|
| چون بەت و بۆرچین، تەڕلان ئاوی
|
سەر سەوز و بۆرچین سۆنەی مراوی
|
| چون بورج بەیزای بەند ئێڵاخان
|
حوجرەی حەمامش کەرد بە چراخان
|
| تاوناش تەوەن تەرز تاو توور
|
شەوقش دا نە تاف چون بەیزای بلوور
|
| کەردش شوستوشۆی کەمەند و کڵاف
|
بە چەنگ چڵ چەنگ شانەی سیم ساف
|
| ئاوەردن بە جا فەرمان وێشان
|
چەند زەڕ و گەوهەر بەخشا دا پێشان
|
| بە ئاب عەرەق گوڵان عەنبەر
|
جە موشک و مێخەک جە پا تا وە سەر
|
| غەسڵە و غەسڵش دان بە کیسە ماڵێ
|
موهرەی مشت و ماڵ ئاو زوڵاڵێ
|
| پاکیزش کەردن سەرتاپا تەمام
|
ماڵان بە ماڵشت وێنەی نوقرەی خام
|
| حەمامچیی حوجرەی جووق جامەدار
|
خدمەت گوزاریش کەردن بەو قەرار
|
| ئاوەردن بەجا خدمەت وێشان
|
شیرین خەیلێ ماڵ بەخشا دا پێشان
|
| بە سەنگ سیا پاژنە و دەست و پاش
|
بە ماڵشت ماڵان خاس خاتر خواش
|
| عەتر و عەبیرات شەندن پێشەدا
|
بە زوڵف و گێسووی خاتر ڕێشەدا
|
| خێزا خەرامان نە تۆی ئەندەروون
|
ئاما نیشت نە تەخت نە حوجرەی بیروون
|
| نیشت بە دڵ ئازار خاتر خەتەر ڕێش
|
بیناش کەرد بونیاد ئارایش وێش
|
| ئاوەردن پەرێش ئەساسەی بەرگش
|
تەرح تەدارەک قیساس مەرگش
|
| بوخچەی قوماشان یەک یەک کەردەوە
|
بە سۆز زاریی ئاهـ سەردەوە
|
| هۆرداشت لیباسان ڕەنگین ڕەنگ ڕەنگ
|
هەم پارچەی زەڕباف خۆلاسەی فەرەنگ
|
| پۆشاش بە ئەندام حەریر و واڵاش
|
ڤوتنی و قەناوێز، قوماش تاڵاش
|
| موود موتەببەق، تورمەی تەڵا باف
|
فوتاتی خوتەن، سۆسەنیی شەفاف
|
| گوڵ گەزی و گوڵ بەند کەساری کەتان
|
کێش کیشمیری، خاسەی سەرخەتان
|
| تافتەی تەڵا باف، دارایی دارا
|
تاقەی تەبەدار، خارایی خارا
|
| زەڕباف زەڕکەش زێبای زەڕ وەرەق
|
شاڵ باف شاهی، موود موتەببەق
|
| بادڵەی بەندەر دێبای ئەشەد بۆ
|
زێبای زەڕ ئەندوود، زەڕتان زەڕ پۆ
|
| قەسەب قەڵەمکار، حەریر زەڕ کەش
|
تەرتیف تەڵا نەقش مونەققەش
|
| پا بەند زەڕڕین، سەرتیپ تەڵا تەرز
|
کەفش گوڵ نە دەم، سەفەریی پاشنە بەرز
|
| پۆشا بە ئەندام ڕەنگ عەجاوی
|
دێبای زەرد و سوور بەنەقش و ئاوی
|
| مێخەکی موشکین جە سەبز نیلی
|
دێز و دارچینی، فیلی و مەندیلی
|
| پیستەیی و جەوزی و ماشی و نارنجی
|
کاشی و خاشخاشی، بۆر و برنجی
|
| لاگیرە و لەرزان کەردش سەراوێز
|
لوولەی ڕیشەدار، دانەی لاڵ دێز
|
| عەنبەرچە و عەنبەر کەڵان گوڵکەش
|
موهرەی مرواری یاقووت لاڵ بەخش
|
| زەنگ گۆشواران دانەی دیاری
|
پاچەش جە زمڕوود، ڕیشەی مرواری
|
| تاقیی تەڵا ڕێز، تاج زەڕ وەرەق
|
کڵاوچەی زەڕڕین، تاج گوڵ تەبەق
|
| تەوق گەردەنبەند، تەڵا جە چەند قەد
|
پایەش ئەشرەفی زەرد زەبەرجەد
|
| کەردش سەراوێز بە ڕووی سینەدا
|
بەو خەت و خاڵان هەزار وێنەدا
|
| دانەی ئەنگوشتەر نە پەنجەی شمشاڵ
|
بازووبەدش بەست، بازوو پڕ خڕخاڵ
|
| جەو دما سامان سەروێن کەرد تەمام
|
ئاما نە سەرکار جەلیی جەمین جام
|
| ماڵاش نە گۆنا سفید و سورخاو
|
خەتتات دا نەخەت موژەی دڵ شکاو
|
| موژان کەرد بە تیر خەدەنگ خارا
|
نێش نووک نەخش جە کین دارا
|
| ئەبرۆش بە سەندەڵ سیای سەندەڵ ساو
|
کەرد بە قەوس کێش کەی کەیان داو
|
| دیدەی سێوەنگی کەیل سورمە کەرد
|
زوڵفانش پەشتان مەفتوون مە کەرد
|
| فوتات خاڵات بە ئەدازە کەرد
|
جەلا دا بە خاڵ یەک یەک تازە کەرد
|
| زنجیرەی زوڵفان کەیل کەیاندا
|
کەردش سەراوێز بە ڕووی بەیاندا
|
| ساچاخ سەروێن سۆنهی دیاری
|
بەست بە ڕەنگا ڕەنگ کێش کەساری
|
| تەوق گەردەن بەند ڕیشەی ڕیاحی
|
سەر دا نە سینەی ساف سوراحی
|
| واڵا نە بەدەن بەژن بلووری
|
نماناش کاڵای کان کافووری
|
| سێب غەبغەب چون خوانساری باخان
|
پەی تاق ئەبرۆش بی وە چراخان
|
| دەهەن کەرد بە دورج دانەی دیاری
|
مولحەق بە مەرجان مێخ مراوری
|
| لەب کەرد بە لالای عەقیق سەر زەڕ
|
زنج و زەنەخدان چو تەڵای ئەحمەر
|
| گۆناش بەتاڵ کەرد شەمع شەو چراخ
|
خۆشتەر جە سێبان خوانساری جە باخ
|
| پەخش لالە ڕێز دانەی دڵ پەسەند
|
نمانا قوببەش چون قەندیل قەند
|
| دیدەش بێزنا دیدەی غەزاڵان
|
شێخان کەرد بە شێخ سەنعانیی ساڵان
|
| جەمینش بەیزای بلوور بێزنا
|
شەعشەعەی شوعاع خورشید ڕێزنا
|
| سەفای سەراپای قەمەر دا قەرار
|
شیرینیی شیرین ئەوڕۆ دا دیار
|
| پەنجە و پا و دەس خیزابیی سێوەنگ
|
بە ڕەنگ حەنای جەوهەر کەردش ڕەنگ
|
| جە موشک و مێخەک دارووی موشک ناب
|
شاناش بە وێشدا عەبیر و گوڵاب
|
| حوور و مەلائیک ئاماش بە سەیران
|
فریشتان فەرش مەندن بە حەیران
|
| جینان و جەننەت ڕەونەق ڕێزنان
|
خاسان جاوید وێشان بێزنان
|
| شیرین بەو دەستوور کەردش گۆڵباران
|
بی بە نەو عورووس ئاراستەی شاران
|
| هەردەم مدیا وێش بە وێشەدا
|
سفتەی ئاهـ جەرگ سۆزەی ڕێشەدا
|
| جە داخ خوسرەو نەوەی کەیانی
|
جە دەور دنیا و وادەی جوانی
|
| دمای ئارایش سۆز و ساز وێش
|
پۆڵ کەنیزان تەڵەب کەرد وە پێش
|
