| جەلاش کە نیشتن جادووی سەهمگین
|
نیگا مەکەردن بە بۆغز و یەقین
|
| شازادە واتش شووم بێ ئیمان
|
پەی چیش ئاوەردی من بە ئەی مەکان
|
| لەعین وات نامم با نەبۆ پەنهان
|
پەروەرش جادووم بێ نامونیشان
|
| ئەمن کە دوختەر ئارایش دێوم
|
پەی هوون عەلقەم خاتر پەشێوم
|
| شش ماهـ هەن پەی تۆ من کەردم فەریاد
|
تا ئارۆ کە تۆم نەدار دا نەجات
|
| شەرت بۆ نە تەنخوای خوێش و برادەر
|
کەرووت وەعیبرەت عاڵەم سەرانسەر
|
| تا ئادەمیزاد عیبرەت بگیران
|
ئیتر هیچ کارێ بەی تەور نەکەران
|
| ئێد وات و سێ دەس زەنجیر ئاوەردش
|
ئاوێزان بە جای سەهمناک کەردش
|
| یەک سەنگ گران مەلعوون ئاوەردش
|
سەر ئەو چا بەوسەنگ هەم موحکەم کەردش
|
| هەر ڕۆژ کە ماما مەلعوون گومرا
|
خەیلێ سزای سەخت شازادە مەدا
|
| ڕۆژێ شازادە عاجز بی نەگیان
|
پەناکە بەردش بەزات سوبحان
|
| ئەوڕۆ شازادە خەیلێ خەیاڵ کەرد
|
وات من میوەی عوود هەم سەنجم ئاوەرد
|
| من حەڵقەی زەنجیر بکەرووم پارە
|
ڕەستگار بووم نە دەست شووم بەو چارە
|
| ئێد وات و دەرلاد تەکان دا چون شێر
|
زەنجیرش بڕی بەور دەنگ دلێر
|
| خەیلێ نیگا کەرد هۆرێزا وە پا
|
دیش تیغ ئەڵماس حازرەن نەوجا
|
| ئەوەند کۆ کریان مەتا و جەواهێر
|
خەرمەن خەرمەنەن چون سەنگ باهێر
|
| شازادە تیغ ئەڵماس نەپشت بەست
|
خەنجەر تەڵا گرتش نەرووی دەست
|
| پەروەرش جادوو پەیدا بی نەوجا
|
چون بەور پڕ زۆر شی بەسەر چا
|
| دەست گرتش بە سەنگ نەوجا هەوادا
|
شازادە چون شێر تەکان دا نەو جا
|
| ئەو تیغ ئەڵماس داش نە ڕووی کەمەر
|
کەردش بە دوو نیم چون خەیار تەڕ
|
| سا تۆز و غوبار دەردەم پەیدا بی
|
دونیا سەرانسەر یەکسەر سیا بی
|
| هۆرێزا لوا نەو سەحرای هاموون
|
ناگا جە تەقدیر کارساز بێ چوون
|
| سیا چادرێ دیارەن جە دوور
|
نەدوور دیارەن چون شەرارەی نوور
|
| زۆر دا نەپەنجە یاوا بەئەو جا
|
یاوا بە چادر سەرتا پا سیا
|
| وات ساحێب یانە مێهمانت ئاما
|
مێهمان عەزیز هەم جە لای خودا
|
| ئاما بەڕووی دەر یەک پیرە زاڵێ
|
کۆنەی زەمانە ساحێب کەماڵێ
|
| واتش ئەی مهمان وەش ئامای وە خەیر
|
ساکن بەر نەجای کۆساران دەیر
|
| شازادە بەردش هەم بەتوی چادر
|
قورس نان جۆ پەرێش کەرد حازر
|
| شازادە واتش جەکام دیاری
|
ئیتاعەت نمای کام شەهریاری
|
| پیرزاڵ واتش بە شاهـ فەرەنگ
|
ئیتاعە داروو سالار سەرهەنگ
|
| ئاهیر نەدەروون بوریان کەردش گەش
|
پەڕ مورغ ئاوەرد دا نە ڕووی ئاتەش
|
| دەرلاد حازر بی مورغ وەفادار
|
ئاما وە خزمەت شازادەی سالار
|
| دەست بەرد و زەریف نیا نە ڕووی باڵ
|
نیشت نە ڕووی هەوا مورغ زەڕین باڵ
|
| بە تاو و تەعجیل ڕوونیا وە ڕا
|
ڕوو کەرد نە ئەو موڵک پەی شار خەتا
|
| با کە شازادە وەی حەرف شیرین
|
بشین وە سەروەخت شای نۆش ئافەرین
|
