| بەڵێ چوون وەلید پەلید ناخار
|
ئێبن موغەیرە مەردوود بەد کار
|
| عەموی موکەڕەم ئەبووجەهل بێ
|
موشکڵان سەخت جە لاش سەهل بێ
|
| خەتیب و شاعر ئەشعار مەبەردن
|
تەسحیح کەلام جە لاش مەکەردن
|
| جە هەر ئموورێ کە ئەو مانع بێ
|
حەرفش چوون حوججەت دایم قاتع بێ
|
| تا قەوم قورەیش گشت جەم بی جە لاش
|
گشت گوشاد کەردن زەبان وە سەناش
|
| واتن یا وەلید ئەولیای لاتمان
|
تاڵ بیەن تەمام گشت ئەوقاتمان
|
| موحەممەد دیسان کەلامێ جە نۆ
|
وانای ئەو کەلام کەردەنش وە خۆ
|
| ماچان کەلامێ خوش تەراوەتەن
|
داخڵ وە خوتبەن یا کەهانەتەن؟
|
| سێحرەن یا ئەفسوون ئەشعار وێشەن؟
|
چوونکە دایم فەن ساحری پێشەن
|
| واتش ئی سوئال وێنەی ڕوئیای شەو
|
مەندەن تا ڕوئیەت وە گفتوگۆی ئەو
|
| جەو دما وەلید وەلی گومڕاهان
|
تا شی وە حزوور شای ئەنبیاهان
|
| وات یا موحەممەد وە بێ بەهانە
|
فرمەی شێعرێ پەی من بوانە
|
| حەزرەت چوون بوڵبوڵ گوڵباغچەی جێنان
|
بەو نوتق شیرین موعجێزە و بەیان
|
| وات «بسم الله الرحمن الرحيم»
|
خوڎا بە حەققەن، غەفوورەن کەریم
|
| وەلید جە گوفتار ساتێ بی خامۆش
|
چوون لەفز ڕەحمان شنەفتش وە گۆش
|
| وات نام شەخسێ مەشهوور عامەن
|
مەبەری ماواش موڵک یەمامەن؟
|
| چوون موسەیلەمەی کەززاب گومڕا
|
نامش ڕەحمان بێ وە گشت بەزمگا
|
| حەزرەت وات ڕەحمان خوڎای کەریمەن
|
نامش ڕەحمانەن دایم ڕەحیمەن
|
| جەو دما سوورەی سوجدە پەرێش وەند
|
وەلید جە هەیبەت دەردەم حەیران مەند
|
| تا کە وەی ئایەی مونەووەر یاوا
|
وەلید مەلەرزا چوون تووڵ ساوا
|
| ﴿فَإِن أَعرَضُوا فَقُل أَنڎَرْتُكُمْ صاعِقَةً مِثلَ صاعِقَةِ عادٍ وَ ثَمُودَ﴾ فصلت ١٣
|
| وەلید ڕاست مدرا موو جە ئەندامش
|
وە عەبەس بەرشی خەیاڵ خامش
|
| نەزدیک بی پۆسش جە بەدەن ڕەق بۆ
|
سەر تا پا ئەعزاش تەمام شەق شەق بۆ
|
| بێ دەنگ ئاخێز کەرد شی وە یانەی وێش
|
نەشی وە مەنزڵ قەوم کینە کێش
|
| قەوم قورەیش گشت هجووم کەردشان
|
وە لای ئەبووجەهل هانا بەردشان
|
| گردین واتشان یا «ابا الحكم»
|
سلسلەی قورەیش جیا بی جە هەم
|
| عەمووت وە لامان تەشریف ناوەردەن
|
دین موحەممەد ئێختیار کەردەن
|
| دەردەم ئەو لەعین چەنی چەند پەلید
|
بێ تەکەللوم شی وە یانەی وەلید
|
| واتش ئەی عەموو ئینە چ حاڵەن
|
قەتڵت واجبەن ماڵت حەڵاڵەن
|
| دین موحەممەد ئێختیار کەردی
|
وێت وە دەست وێت وە دووزەخ بەردی
|
| وەلید دا جواب سەوگەند مەڎەر پێم
|
من هەر هام وە کیش جەد و ئابای وێم
|
| لاکێن کەلامێ سەعبم شنەفتەن
|
ئارۆ دەندانم گشت جە دەم کەفتەن
|
| چوون من کەلامم بێ حەساب دیەن
|
مەعلووم ئێڎ کەلام زیی بەشەر نیەن
|
| ئەبووجەهل وات مەر شێعر و نەزمەن؟
|
واتش نە نەزمەن نە بەزم و ڕەزمەن
|
| ئەبووجەهل وات چوون ساحێب ڕوتبەن
|
کەلامێ وەی تەور ئەگەر هەن خوتبەن
|
| وەلید وات نەخەیر من گووشم دەردەن
|
جە عەقڵ بەشەر گوزەر نەکەردەن
|
| خوتبە کەلامێ موتتەسێل دوورەن
|
ئەو خۆ کەلامێ ئەعلای مەنشوورەن
|
| بەعزێ بە بەعزێ تەشبیە نەدارۆ
|
ئایات وە ئایات نوور لێش مەوارۆ
|
| ئەبووجەهل وات چ عەلامەتەن؟
|
سێحر و جادووەن یا کەهانەتەن؟
|
| واتش نە سێحرەن نە جادوو ئەفسوون
|
نە کەهانەتەن نە عێلم نە فنوون
|
| ئەبووجەهل وات ئاخر سا چێشەن؟
|
من جەی کەلامە دەروونم ڕێشەن
|
| واتش سەبر کەر تا فکرێ کەروون
|
بەڵ ڕیشەی مەتڵەب جە بێخ باوەروون
|
| دووبارە وەلید بێ جەنگ و داوا
|
خاک پای حەزرەت موقەددەس یاوا
|
| عەرز کەرد نە خدمەت شای بوڵەند پایە
|
واتش بوانە جە نۆ یەک ئایە
|
| حەزرەت یەک ئایە جاری کەرد دەردەم
|
سەرسام بی وەلید ناپاک دوژەم
|
| ﴿انَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ڎِي الْقُرْبَى وَيَنْهَى عَنِ الْفَحْشَاءِ وَالْمُنْكَرِ﴾. الى آخر سورة
|
| وەلید وات جە ئێڎ حەلاوەتێوەن
|
عەجەب دڵڕبا و تەراوەتێوەن
|
| جوملەی عاقڵان جە مەتنش ماتەن
|
بەشەر نەبەستەن، زیی ڕۆح نەواتەن
|
| دەر دەم ئاخێز کەرد شی وە یانەی وێش
|
هەم ئەبووجەهل جە نۆ پەرسا لێش
|
| واتش عەموو تۆ کامین فکرت بەرد؟
|
چەنی موحەممەد نمەز چێشت کەرد
|
| با وجوود مەزاناش حەزرەت بێ عەیبەن
|
ئاگاش جە ئەسرار نەهانی غەیبەن
|
| غەیر جە موعجێزە و ڕەسم سەروەری
|
مەبەڕان جە گشت سێحر و ساحری
|
| دمای قیل و قاڵ مەشوەرەت کەردەن
|
حەزرەت وە ساحر مەحسووب مەوەردەن
|
| بەعزێ مەواتن ساحێب کەماڵەن
|
حەکیم حازق حاڵ زان حاڵەن
|
| جە شیرینی لەفز گفت و کەلامش
|
بەعزێ وە جادوو مەبەردن نامش
|
| بەعزێ مەواتن بدیە تەنها و فەرد
|
دوشمەنەن چەنی هەفتسەد هەزار مەرد
|
| سا چوون موشرێکان سپای سەنگی سام
|
دیشان سەحابە شای «خير الأنام»
|
| ئان وە ئان دایم هەر زیاد مەبۆ
|
یەک یەک گشت وە دین حەزرەت شاد مەبۆ
|
| ئێتێفاق کەردن جە بەین وێشان
|
یەک نەفەر عالم جە بەین ئێشان
|
| بە عێلم و بە شێعر بە نەیرەنگ سازی
|
یا بە فەساحەت نوکتە پەردازی
|
| بکیانان وە لای «ختم المرسلين»
|
بەڵ وە هەر نەوع بۆ زەعیف کەرۆ دین
|
| شایەد جە مەقام مەسئەلەی دەعوەت
|
جە ئەمر تەبلیغ حوکم ڕێسالەت
|
| نادم کەرۆ شای «ختم الأنبيا»
|
سلسلەی ئەسحاب جە هەم بان جیا
|
| ئاخر ئێختیار قورعەی بەدیعە
|
کەوت ئەو عەتەبەی ئێبن ڕەبیعە
|
| یەکێ بێ جە ئەهل عولەمای قورەیش
|
فەسیحتەر جە گشت فوسەحای قورەیش
|
| ئاخێز کەرد نە جا وە بێ چەند و چوون
|
بە هەزار تەزویر دەمدەمە و فسوون
|
| جەو دەمدا حەزرەت شای «خير الأنام»
|
تەشریف بەردە بێ وە «بيت الحرام»
|
| عەتەبەی گومڕا بێ چارەی غافڵ
|
ڕەنگ سیاهی کوفر و کین نە دڵ
|
| وە خەیاڵ فەن سوخەن پەردازی
|
واتش موحەممەد مەدەروون بازی
|
| مەشعەلەی خامۆش بێ تەئسیر جە کۆ
|
نوور ئافتاب جەهانگیر جە کۆ؟
|
| غەرەز، عەتەبە سەد خەیاڵ نە سەر
|
تا شی وە خدمەت شای «خير البشر»
|
| وات ئەی موحەممەد خەیاڵت چێشەن
|
جە خەیاڵ تۆ عاڵەم دڵ ڕێشەن
|
| تۆ ئەمرێ عەزیم گێرتەنی وە دەس
|
مەیسەر نمەبۆ هەرگێز پەرێ کەس
|
| روئەسای قورەیش گشت ساحێب نەسەب
|
کەردی وە سەر ژان تایفەی عەرەب
|
| توخم جودایی جە مابەین شانای
|
ئێلاهان قەوم بە باتڵ زانای
|
| مەشغووڵی دایم بێداری تا نەوم
|
بە تەکفیر جەد بزورگان قەوم
|
| عاقڵان قەوم وە ئەحمەق وانای
|
بزورگان وە کەلب سیای گەڕ زانای
|
| ئەر تۆ مەقسوودت وە سەلتەنەت بۆ
|
هەوای تەکەببور شەئن و عێززەت بۆ
|
| ئانە وە پەیمان وە میساق مەبۆ
|
وە جمهوور قەوم ئێتێفاق مەبۆ
|
| ئەمر حکومەت جوملە خاس و عام
|
مەسپارین وە تۆ سەراسەر تەمام
|
| یا خۆ ئەر مەیلت سەفا و لەززەتەن
|
باعسش غروور هەوای شەهوەتەن
|
| هەر جەمیلەیێ وێت کەریش پەسەند
|
ماوەرین پەرێت وە بێ چوون و چەند
|
| ئەگەر خۆ سەبەب هەر فەقر و فاقەن
|
مەنزوورت مەعاش ئەهل عەلاقەن
|
| هەر ئەوەند دەوڵەت گشت بدەین وە تۆ
|
جە مەککەی شەریف نەزیرت نەبۆ
|
| یا خۆ ئی دەعوا نەشئەی ئازارەن
|
جەو بۆنە ئەروات جە تەن بێزارەن
|
| ئەمواڵ وێمان سەرف مەکەین نە ڕێت
|
حەکیمێ حازق ماوەرین پەرێت
|
| دەوا بڎۆ پێت دایم نە خەو بایت
|
تا «يوم الممات» سڵامەت ڕەو بایت
|
| حەیفەن قەوم بە تۆ گشت برا و خوێش بۆ
|
وەی دەعوا یەکسەر جە تۆ دڵ ڕێش بۆ
|
| بۆ دەست کۆتا کەر جەی ئەمر سەردە
|
جەی کار کەردەی قەدیم نەکەردە
|
| تۆ کارێ بکەر جەی وەر کریا بۆ
|
تەعامێ بوەر قەدیم وریا بۆ
|
| هەنی مەکێشە پا جە ئەندازە
|
بەتاڵ کەر ئوسوول ئایین تازە
|
| ئاخر عەتەبە بێ ڕای بەد ئەندێش
|
تەمام کەرد ئەفسوون ژاژا و خوان وێش
|
| جەو دما حەزرەت شای ئەعلا سێفات
|
«سيد الكونين» خواجەی کائێنات
|
| فەرما تۆ حەدیس وێت ها تەمام کەرد
|
دەلیل دنیات گشت وە هەم ئاوەرد
|
| من هەر یەک حەرفەن هەر ئێڎ مەزانوون
|
گۆش دەر تا ئەلئان پەرێت بوانوون
|
| فەرما کە «بِسْمِ اللَّهِ الرَّحْمَنِ الرَّحِيم»
|
«حم تَنْزِيلٌ مِنَ الرَّحْمَنِ الرَّحِيمِ»
|
| وانا قەرائەت تا ئایەی سجوود
|
سوجدە بەرد وە شای «واجب الوجود»
|
| عەتەبەی بەد بەخت هەر سەماع مەکەرد
|
ئەرواش هەم جە تەن «الوداع» مەکەرد
|
| پەی پەی دەس مەڎا وە پشت دەس دا
|
چوون نێش دەرمان زەخم بەرەس دا
|
| شای فریشتە خووی «جنت الماوا»
|
عەتەبەش جە نۆ ڕوخسەت فەرماوا
|
| عوزر خواهی کەرد جە «خير البشر»
|
تا یاوا وە لای قەوم کەم هونەر
|
| یەکسەر پەرساشان موحەممەد چوونەن؟
|
کەلامش سێحرەن یا هەر ئەفسوونەن؟
|
| وات وەڵڵا حەرفێم شنەفتەن وە گۆش
|
مەغز تۆی ئەعزام گشت ئامان وە جۆش
|
| وەڵڵا نە سێحرەن نە کەهانەتەن
|
گشت بەحس عەزاب ڕۆی قیامەتەن
|
| ئەی قەوم قورەیش قەبیلەی کەم هۆش
|
دەخیل پەند من مەکەن فەرامۆش
|
| موحەممەد پاکەن شەئنش عەزیمەن
|
لوتفش بێ حەددەن عەتاش عەمیمەن
|
| فەرزەن بووسە دەی دایم ڕکابش
|
دڵ ئازار نەکەن ئال و ئەسحابش
|
| نمەبۆ زەڕێ هەرگێز زەواڵش
|
بوڵەندەن پایەی تەخت ئێقباڵش
|
| ئەر جەمشید جەم دارا و ئەسکەندەر
|
سپای سەلم و توور چەنی هەفت لەشکەر
|
| بیان نە مەیدان بجۆشان پەرێش
|
ئەگەر موحەممەد تەنها وێش بۆ وێش
|
| شکەست ماوەران جە ڕەزمگای ئەو
|
پەنا ماوەران وە خاک پای ئەو
|
| ئەی قەوم قورەیش ها واتم پێتان
|
هەنی ئێختیار گشت ها بە وێتان
|
| قورەیش وات کە ئەی عەتەبەی فەقیر
|
تۆیچ گرفتار بیت وە دام تەزویر
|
| نە بەنگت کێشان نە کەیفت وەردەن
|
یەقین موحەممەد سێحرش لێت کەردەن
|
