روضة الصفا/19

by میرزا عەبدولقادری پاوەیی

بەڵێ هەی قادر! شۆعرای بێ شعوور!	دێرەن درەنگەن، مەنزڵ دوورەن دوور
نوور موحەممەد ها هەڵای بەندەن	چەند هەزار ساڵەن موعەتتەڵ مەندەن
دەک لێڵاویت بۆ بێ عەقڵ کەم فام	لێوەی هەرزەگۆ، ئەبلەی خەیاڵ خام
مەر بەنگت کێشان، یا کەیفت مەردەن؟	نوور حەزرەتت فەرامۆش کەردەن
بزانە جە کۆن، گوزەرگاش کامەن؟	ئاخر هەوارش جە کام مەقامەن
نیازش چێشەن وە دڵ واز دڵ؟	تەشریفش جە کۆ مەگێرۆ مەنزڵ؟
مەعلووم بۆ جە لای ساحێب کەماڵان	تەواریخ دانان، تاریخ ساڵان
چوون نوور حەزرەت ڕەسوول خاتەم	ئەوەڵ مەنزڵ شی وە جەبهەی ئادەم
جە ئادەم وە شیست، جە شیست وە ئەنووش	ئەدیان ئەولاد قابیل کەرد مەخشووش
راگەش وێڵ نەکەرد چوون ڕۆشن زەینان	تا شی چوون خوەرشید وە جەبهەی قنیان
جە قنیان ویەرد وە تاو و تەعجیل	تا یاوا وە جام جەبهەی مەهلائیل
هەم جە مەهلائیل دیسان گوزەر کەرد	چوون ئاو حەیات یاوا وە لای بەرد
جە بەرد هەم ویەرد چوون خەدەنگ دووخ	یاوا وە مەنزڵ پێشانی ئەخنووخ
دیسان جە ئەخنووخ ویەرد وێنەی باد	شی وە لای حەزرەت ئیدریس وە دڵشاد
جە ئیدریس ویەرد چوون ئایەی ناسخ	تا وە شاد یاوا وە مەشووشەلخ
ڕۆشن کەرد جەهان سەما تا سەمەک	جا هەم تەشریف بەرد وە جەبهەی کەمەک
جە کەمەک ویەرد چوون ڕەوان ڕووح	تا شی وە تۆی جام جەبهەی پاک نووح
ئاخر جە لای نووح «عليه السلام»	جە دمای چەند وەخت تا یاوا وە سام
غەرەز، «ارفخشد»، «خابر» و «شالخ»	«فالغ» و «ارغو»، «ناخور» و «تارخ»
جە گردین یەک یەک تەعجیل کەرد گوزەر	نەکەرد مودارا تا وە لای ئازەر
جە ئازەر ویەرد چوون دوڕدانەی نیل	تا شی وە جەبهەی ئێبراهیم خەلیل
بەرشی جە سەندووق خەزێنەی خەلیل	کەوت وە پێشانی پاک ئێسماعیل
جە لای ئێسماعیل دیسان کەرد گوزەر	فەڕ قدووم بەرد وە جەبهەی قەیدەر
«نست» و «حمل» و «همی سغ» ویەرد	جە ئودوود تەشریف وە لای ئوروود بەرد
«عدوتان» و «معد» تا وە لای «نزار»	جە هیچ مەنزڵێ نەگێرتش قەرار
«مضر» و «الياس»، «مدرك» دی وە چەم	مەنزڵان تەی کەرد پەی جەستەی خاتەم
«خزیمی» و «نضر» و «كنانة» و «ساوی»	«مالك» و «فهر» و «غالب» و «لوی»
«كعب» و هەم «مرة»، «كلاب» بێ خەلاف	«قصی» تا ياوا وە «عبدالمناف»
جە مەناف ویەرد چوون بەرق ئەنجم	مەنزڵ بەرد وە تۆی پێشانی «هاشم»
هەم جە لای هاشم غەرەز موحتەسێب	یاوا وە جەبهەی «عبدالمطلب»
ئاخر مەنزڵش وە ئەمر ئەڵڵا	بەرد وە جام پاک جەبهەی عەبدوڵڵا