| تا ئاخر ئادەم کەردش موناجات
|
لاڵا وە دەرگای «قاضي الحاجات»
|
| واتش یا ڕەبی من گوناهبارم
|
شەرمەندە و ڕوو زەرد نەزان کردارم
|
| وە حیلەی شەیتان، ئێبلیس بەدکار
|
بە تەعن حەوا، وە شاهدی مار
|
| گردین وە جارێ هجووم ئاوەردن
|
بەندە ڕوو سیای قاپی تۆ کەردن
|
| تەوبە و ئێستێغفار، هانا سەڎ هانا
|
تەوبەم قەبوڵ کەر دانای تەوانا
|
| غەیر جە زات وێت پەی بێ کەسان کەس
|
نیەن، نەداروون، هەنی فەریاد ڕەس
|
| باجەتی ئەو ئێسم چەنی نام وێت
|
ئێسمش موحەممەد بەرگوزیدەی وێت
|
| بگوزەر جە گونام نادانیم کەردەن
|
جە نۆ وە قاپیت پەنام ئاوەردەن
|
| نە ڕەوزەی ڕێزوان ئەگەر هەر چیم وەرد
|
«ربنا» زوڵمم وە نەفس وێم کەرد
|
| من جە نادانی هەر چیم کەردە بۆ
|
با کەردەم جە لای تۆ ویەردە بۆ
|
| سزام کافیەن، کەرەم بێ سامان!
|
بە بەخشەندەی وێت ببەخشەم، ئامان
|
| سا ئادەم ئەوەند کێشا ئاهـ سەرد
|
تەوبەش چوون تەوبەی نەسووح قەبوڵ کەرد
|
| تا شی وە جای بەیت کەعبەی موعەززەم
|
مەگرەوا کەم کەم، مەگێڵا دەم دەم
|
| حەوا شی پەی دەور سەر کۆی عەرەفات
|
وە زاری و زگار هەر ئێڎش مەوات
|
| ئادەم! جە کام لا تۆ وێت شەردەوه؟
|
تا وەی تەور من دای وە دەم دەردەوە
|
| تو خوڎا جە کۆنی ماوەر بەهانە
|
پەی تەسکینی دڵ باڵات بنمانە
|
| یە خەتای من بی گەنم پێت وەردم
|
دیدەم لێڵاو بۆ، گۆیا خاس کەردم
|
| مەحروومی بەهەشت هەم مەحروومی تۆ
|
شەوان تا وە ڕۆ، ڕۆمەن سا هەی ڕۆ
|
| سا خوڎا با هەر بەهەشت بۆ پەی وێش
|
من ئەر تۆم ببی بەهەشتم پەی چێش؟
|
| ئەر تۆ جە لام بای، کۆی قافم دەشتەن
|
سەعیر و دووزەخ جە لام بەهەشتەن
|
| وە بێ تۆ بەهەشت دووزەخەن جە لام
|
ئادەم جە کۆنی وە سەرگەردت بام؟
|
| سەمع سەر بەرزان وە ناڵین کەڕ کەرد
|
سەحرای عەرەفات وە ئەسرین تەڕ کەرد
|
| حەق ڕەحمش جۆشا تەرەحوم کەردش
|
کەم کەم تا ئادەم وە لای ئەو بەردش
|
