دیوانی ئەحمەدی کۆر/مەسنەوی
1
[edit]| سوبحان لە شاهی غەففار | یا خالقی کەرەمدار |
| یا عەزیز و یا غەففار | یا کەریم و یا سەتتار |
| لە بێ گیان و لە گیاندار | لە ئیسلام و لە کوففار |
| وەڵڵا بینای کردگار | بەبێ تۆ ناکرێن چ کار |
| قال الحليم الستار | يولج الليل في النهار |
| هەر تۆی ڕەحیم و ڕەحمان | تەوفیق دەری موستەعان |
| لە جوملەیی جینن و ئینسان | بێ تۆ ناکرێن چ فەرمان |
| غەفووری گونەهکاران | دەستگیری هەژاران |
| شیفادەری بیماران | هەر تۆی کارسازی کاران |
| حورمەتی هەر چوار یاران | دوور بین لە ئاگر و ناران |
| یاغەففار و یا غەفوور | لە عەیب و عیللەت بین دوور |
| دوور بین لە عەیب و عیلەل | یا بینایی لم یزل |
| هەم قەییوومی بێ بەدەل | زات و فیعلت بێ خەلەل |
| کەس بێ ئەجەل نامری | پادشاهی قادری |
| ڕەببی هەر تۆی سابیری | هەم کەبیر، هەم کابیری |
| قادری حەییی ڕەشید | یا وەلی و یا حەمید |
| یا قەریب و یا مەجید | فَعَّالٌ لِمَا يُرِيد |
| حەییی بینا و بێ نەزیر | تاق و سەمیع و بەسیر |
| فەردی بە خوڵق و تەدبیر | لە تفڵ و لە جوان و پیر |
| ئەغنیا و دانا و ئەمیر | شاهـ و سوڵتان و وەزیر |
| خودای عەلیم و خەبیر | بۆ هەموان تۆی دەستگیر |
| ڕازقی بۆ مار و موور | نووردەهەندەی ماهـ و خۆر |
| دەستگیر بۆ شەل و کۆر | خودای کەریم و غەفوور |
| تۆی ساحیبی مرادە | چی پێت نەبێ ئیرادە |
| نەفعێ نادا لەبۆ کەس | هەر تۆی خودای فەریادڕەس |
| چی تۆی نەبێ فەریادڕەس | ڕەنجی دەچێ بە عەبەس |
| لەپاش ئەوان کەلامە | گوێ بدێرن خاس و عامە |
| حەتتا بڵێن مودامە | بەحسی کافر و ئیسلامە |
| لە کافری ناپاک دین | ئیسلامی پاک و ئەمین |
| بە ئەمری رب العالمین | هەر دەبین و هەر دەچین |
| لە مەخلووقی سەرزەمین | هیچ کەس نامێنێ یەقین |
| بە ئەمری خالقی سوبحان | كُلُّ مَنْ عَلَيْهَا فَان |
| وەهام بیست لە عالمان | لە کتێبانیان کرد بەیان |
| ئەووەڵ خالقی سوبحان | دنیای ڕۆنا بە ئیمکان |
| شەرق و غەرب و جێ و مەکان | بۆ ڕەسووڵی ئینس و جان |
| وەک من بیستم ئەو مەقال | خلق قبل کل حال |
| نە ئەرز نە سەما بوو | نە ئادەم نە حەووا بوو |
| نە قیامەت نە دنیا بوو | نە ئەنهار و نە ما بوو |
| نە مەخلووق جابەجا بوو | نێوی ویم مستەفا بوو |
| نە لەوح و نە قەڵەم بوو | نە کەعبە و نە حەرەم بوو |
| نە گاو و نە ماسی بوو | نە عەرش و نە کورسی بوو |
| نە ئادەمی سەفی بوو | پێغەمبەریان ناسیبوو |
| نە ڕۆژ و ماهـ و هەرد بوو | نە چیا و نە داروبەرد بوو |
| نە مەخلووق سەرتاسەر بوو | نێوی وی پێغەمبەر بوو |
| بە ئەمری دانای کردگار | دنیا ڕۆندرا سەر تا خوار |
| شەو و ڕۆژ، لەیل و نەهار | شەرق و غەرب، بەڕڕ و بیحار |
| سەبەب ئەحمەدی موختار | دنیای دانا کردگار |
| سەبەب ڕەسووڵی سەروەر | ڕۆینا کردی موقەددەر |
| ئاسمان، ماهی مونەووەر | ئەستێرە و شەمس و قەمەر |
| ئەو ئەرزی وا موعتەبەر | کێوی لێ کردە لەنگەر |
| فەرمووی رب العباد | أَلَمْ نَجْعَلِ الْأَرْضَ مِهَادًا |
| وَالْجِبَالَ أَوْتَادًا | ئایەتێکی بەفائیدە |
| مالکی کوللی ئەنام | بۆخۆی فەرمووی ئەو کەلام |
| ئەرز و ئاسمان، خاس و عام | خُلِقَ فِي سِتَّةِ أَيَّامٍ |
| وەک من بیستم ئەو گوفتار | لە عالەم و نامدار |
| ڕۆژێکی مووسای نازدار | لە ڕەببی خۆی کرد پرسیار |
| خالقی لەیل و نەهار | عالم بە کوللی ئەسرار |
| هەم بە حاڵان خەبەردار | سەمیع و بینا و هۆشیار |
| ئەز دەزانم تۆ خودای | تۆ دەلیل و ڕەهنومای |
| ساحیبی لوتف و عەتای | غافری جورم و گونای |
| لایقی حەمد و سەنای | بێ شەریک و بێ هەمتای |
| لە کەنگێوە تۆ خودای | خودای زەمین و سەمای |
| دای جەواب ڕەببی جەببار | ئەی مووسایی نامدار |
| نابێ بترسی لە نار | لەو قسەی کردت پرسیار |
| ناوێک لە من هەیە حەی | تۆفیق دەری کوللی شەی |
| ئەزەلی و ئەبەدی هەی | ئەوەی بزانە تا هەی |
| عومری من زۆر کەسیرە | نایێتە زەبت و گیرە |
| دنیام ڕۆنا لە ئەووەڵ | ڕزق و ئەعمال و ئەجەل |
| بۆ محەممەدی مورسەل | کە هیچی نەبوو دەگەڵ |
| غەیرەز دەعبای ناو خەرتەل | هیچی دی نەبوو دەگەڵ |
| ئەو خەرتەلی نەدیم بوو | عومری وی زۆر قەدیم بوو |
| بێ عەدەد عومری ویم بوو | لەسەر ئەرزی موقیم بوو |
| دوور بوو لە حەشر و شومار | خالقی لەیل و نەهار |
| لەبۆی خوڵقاند بوو سەد شار | خەرتەل لێی کرد بوون بار |
| لە ترسی مەوتی جەببار | هەر ڕۆژێ جینگڵ دەخوار |
| دەیکێشان داخ و حەسرەت | بۆ عومری کورت و غەفڵەت |
| لە پاشان گریا بە زار | دەنگێک مابوو لە دیوار |
| حەوت ساڵان گرتی دە زار | لە هەوکی نەدەچووە خوار |
| پاشان بە ئەمری ئەکبەر | خالقی کوللی بەشەر |
| دەگەڵ ئەو دەنگی ئاخەر | ڕوح لە قالب دەچووە دەر |
| دنیا زێڕ و مڵک و ماڵ | چۆڵ ما تا سی هەزار ساڵ |
| خودای زەمین و ئاسمان | لە پاش هەنگی بە ئیمکان |
| خوڵقاندی جان ئیبنی جان | لە ئاگری بێ دوخان |
| بەو قسەم کرد ئیعتیبار | لە کەلام ڕەببی جەببار |
| وَخَلَقَ الْجَانَّ | مِنْ مَارِجٍ مِنْ نَارٍ |
| خالقی فەردی قەییووم | لە لەفزی خۆی کرد مەعلووم |
| وَالْجَانَّ خَلَقْنَاهُ | مِنْ قَبْلُ مِنْ نَارِ السَّمُومِ |
| ئەرزی نا لە دەستی وان | هێند مەعموور بوو ئاوەدان |
| خەڵقان کێڵایان سەربان | دەیانکردە دەغڵ و دان |
| ڕێ بڕا بوون لە کێوان | لەو پاش بە ئەمری سوبحان |
| بوونە ساحێبی عیسیان | غەزەبیان لێ دەگیران |
| لە ئەرزدا کران پەنهان | لەوانیش یەکیان نەمان |
| ئەوجار وای کرد موقەددەر | ڕۆنیا ئادەم موستەقەر |
| خالیقی حەیی و مەتین | لە ئایەتی کرد موبین |
| بە لەفزێکی زۆر شیرین | «وَ خَلَقنا آدَمَ فِی طین» |
| ئادەمی ڕۆنا لە پاش | حەووای لێ کردە وێڵداش |
| هاودەمێکی گەلێک باش | مەخلوق لەوان کەوتنە پاش |
| بە ئەمری حەیی ئەحەد | خودای ئەزەلی و ئەبەد |
| لەوان پاش کەوت وەلەد | بێ ئەژمار و بێ عەدەد |
| وەک من بیستم ئەو گوفتار | لە عالمی دە نامدار |
| سێ ڕیوایەت بوون ئەخبار | یا سەد جووت بوون بە ئەژمار |
| یا چل ئادەمی بۆ شیس | ساحێب تەقدیس و تەدریس |
| زۆر مێهرەبان و ئەنیس | بۆ ئوممەتی بوە ڕەئیس |
| لە پاشی وی دەهات «نووح» | ساحێبی فەتح و فتووح |
| گەشاوە پێی گیان و ڕوح | بۆ ئۆممەتی بوە مەمدووح |
| نۆسەد ساڵی بە ئەژمار | نووح نەبیی دەعواکار |
| شەڕی کرد دەگەڵ کوففار | دەگەڵ قەومی نابەکار |
| فەرمووی ڕەببی عەللامە | دەر حەق بە وان کەلامە |
| فَلَبِثَ فِيهِمْ أَلْفَ سَنَةٍ | إِلَّا خَمْسِينَ عَامًا |
| حەفتا کەسی بە ئەژمار | لەناو میللەتی کوففار |
| بە ئیرادەی کردگار | پێی موسلمان بوون ئەوجار |
| پاشان گریا بە زارە | دوعای خواست لە جەببارە |
| «لَا تَذَرْ عَلَى الْأَرْضِ | مِنَ الْكَافِرِينَ دَيَّارًا» |
| ئەگەر بمێنن یەک سەر | لە دین دەبن بێ خەبەر |
| نایەنە زەبت و زەفەر | عەبدان لە دین دێننە دەر |
| ئەو جار خالیقی سوبحان | دوعای قوبوڵ کرد لە زمان |
| لەبۆ وانی نارد تۆفان | چل گەز کەوتە سەر کێوان |
| بە هیلاک چوون هەموویان | لەو تاییفەی سێ کەس مان |
| بە ئەمری حەیی فەریادڕەس | خودای دەستدار و بێ دەس |
| لەو تاییفەی مان سێ کەس | ئەو سام و حام و یافس |
| گوێ و لێ بێ ئەی برادەر | گوناهکاران سەرلەبەر |
| لەبەر حوببی پێغەمبەر | ئەو ڕەهبەر و ئەو سەروەر |
| عەزابن نایێتە سەر | هەڵگیراوە تا مەحشەر |
| هەر کەسێکی عاقڵ بێ | یەک جیهەت و یەکدڵ بێ |
| دڵپاک بێت و عادڵ بێ | ئیمانی پێ کامڵ بێ |
| ژینێک مردنی لە دوو بێ | دەبێ چ شایی و پێ بێ |
| گەر بە عەقڵ و کەماڵی | ساحێب هۆش و خەیاڵی |
| لە ترسی زولجەلالی | ڕەنگە داییم بناڵی |
| بەحسی مردنێ و حاڵی فەوت | جحێڵ و جوان، پیر و چەوت |
| خالیق دەیفەرموو بە زەوت | «كُلُّ نَفْسٍ ذَائِقَةُ الْمَوْت» |
| ئەوجار خالیق بە هەیبەت | ساحێبی عیلم و حیکمەت |
| عیزرائیل کرد موسللەت | لەبۆ سەر جەمعی ئۆممەت |
| لەبۆ سەر جەمعی گیاندار | عیزرائیلی کرد دیار |
| عیزرائیل کردی گوفتار | ئەی خودای پەروەردگار |
| هەر تۆی قادر و موختار | تۆ من دەکەی خەتاکار |
| جوابی دا خودای قادر | ئەو عەرز و عاسمان ڕاگر |
| هەر کەس بە دەردێک دەمرێ | کەس خەتای تۆ ناگرێ |
| کاری خۆم ئەز، پێک دێنم | زوو ڕوحی لێ دەستێنم |
| چی ڕزقی لێ بستێنم | سەری لێ دەشێوێنم |
| بەخشەندە و غەففارم | حاکمی کەڕەمدارم |
| گەر بە غەزەب بنواڕم | شاخ و کێوان دەهاڕم |
| سەر دێننە دەر لە قەبران | ڕەببی نەنکەی سەرگەردان |
| عالمان وا خەبەر دان | ڕەببی نەنکەی سەرگەردان |
| بە ئەمری خالقی غەففار | دەکرێتە بانگ و هاوار |
| کوا مەردی لە دنێ سەردار | فەخر و پێ دەکرێ ئیزهار |
| کوا ئیسلام، کوانێ کوففار | کێ بوو دەهاتە گوفتار؟ |
| کوانێن کافری دە دڵڕەش | موسوڵمانی دڵ بە غەش |
| ئەوەی سەریان چۆتە هەش | بێن ئەو مڵکەی بکەن بەش |
| ئەمن کردم موستەقەڕ | خەڵقی دەعوای بوو لەسەر |
| هەتا دنیا دنیا بوو | مەردی وەهای تێدا بوو |
| ساحێب دەستە و سوپا بوو | هەر کەس بۆ خۆی هەرا بوو |
| هێند عاقڵ نەبوون سەلیم | بڵێن «أَستَغفِرُاللّهَ الْعَظیم» |
| ڕۆژگاریان هات و چوون | وەها پێی ببوون مەفتوون |
| «أَيْنَ شُرَكَائِيَ الَّذِينَ | كُنْتُمْ تَزْعُمُونَ» |
| کوانێ ماڵی بە بنیات | گەورە و ساحێب دەستەڵات |
| شار و قۆنگرە و قەڵات | بۆ عەنقای ساحێب داهات |
| ئەو سەرداری بە قووەت | ساحێب هیممەت و قودرەت |
| بۆ عەنقای ساحێب حەشمەت | هەم دیوانی پڕ زینەت |
| زەڕق و زینەت و دیوان | زەمزەمە و سفرە و میوان |
| تەرتیبدەر و بە ئەرکان | بائەدەب، عەقڵ و ئیمان |
| عەدڵ و نەسەق و میزان | نازەنین و نەوجەوان |
| لە بچووک و گەورە و گران | کوان لەوان یەکیان نەمان |
| پاڵەوانی پڕ هونەر | ساحێب هەیبەت و خەتەر |
| هەر چوار یاری پێغەمبەر | ئەوانیش نەمان یەکسەر |
| بورج و قۆنگرە و وشار | زینەتی حەوش و حەسار |
| شاە و لەشکر و سەدار | یەک لەوان نەمان چ جار |
| فەرمووی خالقی جەببار | لە قورئانێ بوو ئیزهار |
| «لِمَنِ الْمُلْكُ الْيَوْمَ | لِلَّهِ الْوَاحِدِ الْقَهَّارِ» |
| گوێو لێ بوو ئەی برادەر | بەحسی دنیای حیلەگەر |
| ئەو جار خودایی ئەکبەر | لە قیامەت دەدا خەبەر |
| «وَمَا أَمْرُ السَّاعَةِ | إِلَّا كَلَمْحِ الْبَصَرِ» |
| بە ئەمری کردگاری | پادشای پەروەردگاری |
| کە ئەو باران دەباری | لە ئەرزێ دەبێ جاری |
| بە ئەمری پادشای جەلیل | دەژیەتەوە ئیسرافیل |
| ئیسرافیل دێتە حوزوور | دەفەرمووی پادشای غەفوور |
| تۆ فوو بکە نەفخی سوور | «فَإِذَا نُفِخَ فِي الصُّورِ» |
| ئەڕواح کە دەبیەن لە ژوور | بۆ قالبان دەبن مەسروور |
| کە نەفخی سوور بوو عەیان | ڕادەوەستن بۆ فەرمان |
| عاجز و فەقیر و هەژار | بێ هۆش و مات و غەمبار |
| دڵ بە غەم و غەمبارە | بێ تاقەت لە گوفتارە |
| «وَتَرَى النَّاسَ سُكَارَى | وَمَا هُمْ بِسُكَارَى» |
| فەرمووی خالقی جەببار | با بێن جەمیعی دەییار |
| هەر کەس بە ئەنداز و میقدار | لە جێی خۆی بگرێ قەرار |
| هەرچی میللەتی کوففار | بێ جوابن و بێ پرسیار |
| دەکەن فەریاد و هاوار | دەفەرموێ خودای قەههار |
| «لَا مَرْحَبًا بِهِمْ إِنَّهُمْ صَالُو النَّارِ | وَأَحَلُّوا قَوْمَهُمْ دَارَ الْبَوَارِ» |
| «جَهَنَّمَ يَصْلَوْنَهَا | وَبِئْسَ الْقَرَارُ» |
| «فَتَأْتُونَ أَفْوَاجًا» | چون بە تەفسیر موحتاجە |
| حەزرەتی خەیرولبەشەر | وای بە مە داوە خەبەر |
| لە وەختی هاتنی مەحشەر | دە سونفیان دێن موقەڕڕەڕ |
| ئەووەڵ دێن وەک مەیموونە | لە زەکات مانع بوونە |
| دووەم دێن وەک بەرازی | بە حەرام بوونە ڕازی |
| سێیەم دێن سەر بەرەو ژێر | سووتخۆری دە گوێ نەدێر |
| چوارەم دێن کوێر و بێ چاو | «جابیر» لە حوکمان تەواو |
| پێنجەم دێن کەڕ و لاڵن | ئەو موعجیب بە ئەعمالن |
| شەشەم دێن زبانی وان | دێتە خوار تا سنگیان |
| کێم و خوێن لێی دێتە دەر | بە سەر بۆنی وی یەکسەر |
| عاجزن ئەهلی مەحشەر | ئەو مەلانە وەعزدەر |
| دەوەستن دەستە و نەزەر | قەول و فیعل نین بەرابەر |
| حەفتەم دێن ناتەواون | دەم و لووتیان نەماون |
| دەست و پێیان بڕاون | وان جیران ئەزیەت داون |
| هەشتەم دێن هەڵاوەسراو | زەرد و زەعیفن تەواو |
| بە دار ئاگری پڕ تاو | دەسوتێن جەرگ و هەناو |
| وان لە دنیا کرد فەساد | ماڵی خەڵقیان دا بەباد |
| بە زاڵمی دە پڕ عیناد | هەر دەکەن هاوار و داد |
| نۆیەم دێن بۆگەنیویان | وەک کەڵەشە تۆپیوان |
| وان بۆ تاعەت مانیع بوون | بۆ بێ دینان تابیع بوون |
| دەهەم دێن زۆر بە دەردە | لیباسێکیان دەبەردا |
| چ جار خۆی لە بەدەن دا | گاز گاز گۆشتی بەردەدا |
| وان تەکەببور لێ دەدا | گەپیان بە خەڵقی دەدا |
| پاشان بە ئەمری سوبحان | لە نێو جەمعی موسڵمان |
| ئەوان دوورن لە عیسیان | نوور لەسەر وان زۆر عەیان |
| ڕووناکە دەور و بەریان | کافر دەمرن لە حەیفان |
| فاسق دەکێشن ئاهان | چلۆن خۆن کرد ماڵوێران |
| ئەگەر عەقڵن هەبایە | بیستبان وەعزی مەلایە |
| قەت ئێمە لە دنیایە | نەندەدیت ئەو جەفایە |
| چاک بزانن برادەر | فەرمووی خودایی ئەکبەر |
| چی لە دنیا عاقڵ بێ | عەقیدەی زۆر کامڵ بێ |
| داییم بترسێ لە نار | هەڵبێ لە فاسق و کوففار |
| دەگەڵ ڕەفیقی بێ دین | ئەسلەن نەبێ هەمنشین |
| لادا لە مەحرەماتان | ڕوو بکاتە واجباتان |
| دوور دەبێ لە ئافاتان | لە جەفا و لە بەڵاتان |
| بە سوننەتی پێغەمبەر | دەنپارێزێ لە سەقەر |
| چی نەکا سەوم و سەلات | وەدەر نەیێخێ زەکات |
| پەنا بۆ دینی نەبات | ئەسڵەن نایبێتن نەجات |
| بە ئەمری خودای ئەکبەر | میزان دەکرێ موستەقەر |
| پاک دەکێشرێن خێر و شەڕ | قورئان وا دەدا خەبەر |
| «فَمَنْ يَعْمَلْ مِثْقَالَ ذَرَّةٍ خَيْرًا يَرَهُ | وَمَنْ يَعْمَلْ مِثْقَالَ ذَرَّةٍ شَرًّا يَرَهُ» |
| هێندێک مزگێنی لەوان | لای خێرانیان بوو گران |
| وەستاون دەستە و نەزەر | خێر و شەڕیان بەرابەر |
| هێندێکیش پڕ دەرد و ئێش | گوناهـ گەورە وەک گامێش |
| خێریان هەر وەک باڵی مێش | بۆ جەهەننەم دەچنە پێش |
| بە ئەمری دانای کردگار | خاس و عامی مە یەکجار |
| دێننە مەحشەری سەرمەست | هەر کەس دەفتەری بە دەست |
| ڕادەوەستن بەبێ هەست | لە خوێندنێ دەکەن قەست |
| هەتا خێرە دەخوێنن | وەختێ شەڕان دەبینن |
| ناوێرن چاو هەڵێنن | سەر لەبەر خۆ دەمێنن |
| ئینسان حاڵی وەهایە | دەکا درۆ و حاشایە |
| حاشا دەکا ڕەببییە | ئەو دەفتەرە ئی من نییە |
| کە ئینسان دەکا حاشا | لێی دەبنە شاهید ئەعزا |
| لە پێش دەستی کردگار | ئەعزا لە سەر تاکوو خوار |
| شاهیدی دەدەن بە زار | تۆ بە منت نەکرد ئەو کار؟ |
| لە قورئانی خۆش گوفتار | خودا وای کردووە ئیزهار |
| «يَوْمَ تَشْهَدُ عَلَيْهِمْ | أَلْسِنَتُهُمْ وَأَيْدِيهِمْ وَأَرْجُلُهُمْ» |
| ئینسان کە وای دیت ئەوجار | گەلێک دەبێ شەرمەزار |
| نایمێنێ عیلاج و چار | ئەوجار دەکاتن ئیقرار |
| بە فەرمانی شای غەفوور | خودای کەریم و سەبوور |
| مەلایێک دەدەن دەستوور | جەهەننەم دێتە زهوور |
| چەندهەزار بوتی کەبیر | دەستیان دەکەن لە زنجیر |
| بە فەرمانی بێ نەزیر | لە جەهەننەم دەبن گیر |
| دەنەڕێنێ و بانگ دەکات | کوانێ تارِیکُ الصَّلَاة |
| کوانێ تارِیکُ الصَّلَاة | مانیعی ڕۆژو و زەکات |
| دوور لە جومعە و جەماعەت | مونکیری خێر و سوننەت |
| جا موسوڵمانی فەقیر | لە ترسی ڕاو وتەکبیر |
| لەبەر خۆفی زەمهەریر | پێغەمبەر دەکەن لە بیر |
| جەهەننەم دەکا پرسیار | ئەوە کێنە بێ سەردار |
| دەڵێن ئەوانەی هەژار | پێیان دەڵێن جوو و کوففار |
| بڵێن یا محەممەد هاوار | دەکەن هاوار پڕ بە زار |
| بە ئەمری خودای ئەکبەر | مەلائیکەت چەند قەدەر |
| بە تەرتیب و بەرابەر | چوون لە تەڵەب پێغەمبەر |
| مەلاییکە لەو جێیە | دەپرسن لە ئەرزێیە |
| ئایا لەو شوێن و ڕێیە | قەبری نەبی لە کوێیە؟ |
| ئەرز وا دەدا خەبەر | لەبەر توندی بای سەڕسەڕ |
| فکرم دەرچووە لەسەر | لە خۆم نین ئاگا و خەبەر |
| بە ئەمری پادشای غەفوور | خودای کەریم و غەفوور |
| لە جێیەک دەبینن نوور | نووری دەچێ بەرەو ژوور |
| کە لەوێندەر هاتە دەر | ئەرز سوجدەی بردە بەر |
| جا محەممەدی موختار | لە پێش دەستی خوای جەببار |
| دەگری وەک جۆ و ڕووبار | بۆ ئۆممەتی گونەهکار |
| دەڵێ ڕوحم کە ئەوجار | بەرناگرن بۆ ئاگر و نار |
| جەهەننەم خەتەرناکە | موسوڵمان ترسناکە |
| فەرمووی خالیقی وەههاب | وەک قورئان دەکا خیتاب |
| جەهەننەم و ئاگر و نار | بۆ میللەتی گوناهکار |
| بۆ بێ باوەڕ و کوففار | کەس لێی نابێ ڕەستگار |
| فەرمووی خالیقی موبین | خودای ئاسمان و زەمین |
| دە کەلامی خۆی یەقین | «وَإِنَّ جَهَنَّمَ لَمَوْعِدُهُمْ أَجْمَعِينَ» |
| فەرمووی خالقی غەففار | چ ئیسلام و چ کوففار |
| لە خەڵقی دە گوناهکار | لە جێی خۆی بگرن قەرار |
| دەفەرمووی خودای عیباد | جا بە گوێرەی ئیعتیقاد |
| ڕایان کێشن بۆ سیڕات | هەر کەس خۆی بدا نەجات |
| هێندێک دێن بێ قەیدییە | دەچن بە ئەمری ڕەببییە |
| چونکە قەت نەیاندییە | نازانن سیڕات چییە |
2
[edit]| کە غوسڵیان کرد هاتنە دەر | ئەو نوورین دەبن یەکسەر |
| کانیەکی دیش لەو قەدەر | پێی دەڵێن حەوزی کەوسەر |
| کانی ئەووەڵین ئاوە | ئینسان دەچی بە داوە |
| ئاوڕی لێ دەداتەوە | جامێکی لێ دەخواتەوە |
| کە خواردیانەوە ئەمجار | چاوەڕێن بۆ دووەم جار |
| بە ئەمری شاهی جەببار | پێی نامێنێ هیچ مەدار |
| وەکوو گوڵی دە ڕەنگین | گوڵی زەرد و سوور و شین |
| وەکوو توحفەی نازەنین | بۆ حۆریان دەچوو مزگین |
| حۆری دەوان زەمانان | دێن لە تەڵەب میوانان |
| دێنە جێ و مەکانان | بۆ خزمەت ئیمانداران |
| دێنە جێی دە غەریب | تورت و ڕەند و عەجایب |
| هەر یەکیە چلان نەسیب | جوان و شۆخ و دڵفەریب |
| هەر یەک نەسیبی چلان | فڵانی بنی فڵان |
| شادی لە باغی گوڵان | دەبن بەوان شادمان |
| با بیکەین سەیر و گەشتێ | شەوق و زەوقی بەهەشتێ |
| زۆر زۆر دڵانی لێ خۆش دێ | لە چوار دەور و تەنیشتێ |
| بەهەشتی هەر تەعامە | لە کافران حەرامە |
| بۆ ئۆممەتی «خَيْرُ الْأَنام»ه | خوا بیدا ئەو مەقامە |
| تێدا نین لەهوی سوخەن | سەیری دەکەی جایی ئەیمەن |
| «مَا تَشْتَهِيهِ الْأَنْفُسُ وَتَلَذُّ الْأَعْيُنُ» | بخۆن چی مەیل دەکەن |
| بەهەشت جێیەکی حەقە | بڕۆنن چەند ڕۆژ بەقا |
| لێی ڕازی دەبێ حەقە | هەر ئەوە دارولبەقا |
| تەیرێکی تیژ و خۆشپەڕ | سەد ساڵ بڕوا کەڕ تا کەڕ |
| لە موڵکی یەک ناچتە دەر | لەو بەهەشتی خۆش نەزەر |
| دنیا خوڵقا لە ئیجاد | بەهەشت خوڵقا لە ئەبەد |
| بە سەبەب نووری محەممەد | هەم ئەحمەد هەم محەممەد |
| یا ڕەببی هەر تۆی ڕەحمان | عالمی سیڕڕی نیهان |
| لە من نەگری هیچ نوقسان | خودای ڕەحیم و ڕەحمان |
| گەر بڵێم تا ڕۆژی مەوت | حەتا عالەم دەبێ فەوت |
| مەدحی حەق نایەتە زەوت | تا هیچ زەمان و موودەت |
| یا ڕەب بە شەوی هەینی | بە شای قابەقەوسەینی |
| ئیمامی قیبلەتەینی | ئیمانیان لێ نەستێنی |
| چونکی هێندە پڕ ئوسوول | بە حورمەت ئیسمی ڕەسوول |
| دوعایەن بکەی قەبووڵ | ئۆممەتی نەکەی مەلوول |
| بە ناوی خود ئەحەد کەی | بە نووری محەممەد کەی |
| ڕەحمێک لەبۆ ئەحمەد کەی | بەهەشتیان پێ کەرەم کەی |
| ئەحمەدی کۆری هەژار | بە تۆبە و ئیستیغفار |
| بە ڕەحمەتت ئۆمێدوار | بە دەرگات ئۆمێدەوار |
| ئۆمێدمان هەیە بە ڕەحمەتی | شادن کەی بە جەننەتی |
| دەگەڵ ئەهلی جەماعەتی | شەیتان غەرق بێ دە نەعلەتی |
| هەزار ڕەحمەت لە گوێدێران | جودا لە شەیتانی ماڵوێران |
3
[edit]| ڕووی دە موهری هەڵدەسوو | خودا وا ئەمری پێ بوو |
| ئۆخەی دڵم تاقەت بوو | بەو بۆسەیە ساکن بوو |
| لە کنت دەبێ مەعلوومە | ڕاست وەبە لێت خۆش بوومە |
| ئەو محەممەدی نازدارە | بە دووان گرتین دوو جارە |
| لەرزی وەک بید و دارە | چۆوە ماڵێ بە بیمارە |
| ئەو خاتەمول مورسەلین بوو | لە موناجات زۆر مەتین بوو |
| پازدە ڕۆژان لە نووین بوو | جێهێشتنی جێ و شوێن بوو |
| ڕۆژی شازدەی چوونە دەر بوو | ئیرادەی پێ سەفەر بوو |
| لە سوبحێکی کامیلە | فەرمووی ڕەببی جەلیلە |
| هەڕۆ خوارێ عیزرائیلە | کن محەممەدی کامیلە |
| فەرموودەی شاهی ئەحەدە | تا بە خۆی دەستوور نەدە |
| چ نەڵێی بە محەممەدە | بەرەو لای محەممەدە |
| وای فەرمووی شای غەفوورە | تا لێی نەدەن دەستوورە |
| بەبێ ڕوخسەت مەچۆ ژوورە | هەر ڕابوێستە لە دوورە |
| عیزرائیل کە هاتە خوارە | بە ئەمری شاهی جەببارە |
| لە دەرکی ماڵی کرد قەرارە | چاوەڕوان و ئینتیزارە |
| سێ سەحاتان ڕاوەستا لە دوورە | بانگی کردنێ بێ زەروورە |
| ئەی ئەهلی بەیتی پاک نوورە | ڕوخسەت هەیە بێمە ژوورە |
| من فەرمانێکم هەیە بە زەروورە | بەو سەییدی ناو مەشهوورە |
| داخۆ ئیزنە بێمە ژوورە؟ | هەتا تۆ دێیە حوزوورە |
| فاتیمەی پڕ دە ئوسوولە | فەرمووی ئیزنە بێمە ژوورە |
| هەرچێکوو ئەو ڕەسوولە | بە دەردی خۆی مەشغوولە |
| ساعەتێک بگرە قەرارە | تا ئەو سەییدی موختارە |
| نازداری وەک پێغەمبەر | هەر کە بیستی ئەو خەبەر |
| ترسا بە جان و جگەر | هیچ ترست نەبێ لەبەر |
| لە فاتیمەی کرد پرسیارە | ئەی فەرزندی منی نازدارە |
| دەگەڵ کێت بوو ئەو گوفتارە | مەکە گریان و هاوارە |
| بەوەی کەمێ کە وەههابە | فاتیمە دەڵێ ئەی بابە |
| بە زبان دەڵێی عەرەبە | مەردێکی عالی نەسەبە |
| لەوێی گرتووە قەرارە | ئەڵبەت بە تۆی هەیە کارە |
| فاتیمە کوتییە نەبییە | بەوەی کەمێ کە ڕەبییە |
| ئەز دەزانم ئەوە کێیە | دە مەخلووقی ئەرزی نییە |
| «ملک الموت»ی سیددیقە | ڕوحان دەکا بە تەحریقە |
| ناوەستێتن یەک دەقیقە | بێ هاوەڵ و بێ ڕەفیقە |
| بە ئەمری فەرمانی جەببارە | خراب دەکا ڕۆزگارە |
| لەبۆ ڕوحیت ئینتیزارە | لێک دەستێنێ برا و یارە |
| حەسەن بۆ حوسەین دڵگیرە | حەبیبی ڕەببی کەبیرە |
| فاتیمە کە بیستی ئەو بەیانە | کردی بە داد و فوغانە |
| بۆ سەرداری ئینس و جانە | دەستی دەکرد بە گریانە |
| فەرمووی بە لەفزی عەرەبی | قەسەم بە زاتی دە ڕەببی |
| دەڵێم بە زار و گریە بی | ڕەنگە لە ئوممەتی من نەبی |
| ئەو ڕەحمەتی شای بێ ئەسەرە | دەردێکی چەند بێ مەفەرە |
| کەس پێی نابا چ زەفەرە | دەبێ بکرێ ئەو سەفەرە |
| لە سێ ڕۆژان بەولاوە ئەوجار | چی من دەکا بە ئیختیار |
| زۆر بۆم مەکەن گریان و زار | دەڕۆم بە ئەمری کردگار |
| ڕازی ببن بە قەزایێ | ئەمڕۆ چاکن لە دنیایێ |
| فاتیمە ئەو قسەی قوبووڵ بوو | لە موناجاتان زۆر مەقبووڵ بوو |
| گوێدێر بە قسەی ڕەسووڵ بوو | بە سەبر و حیلە و سەبوور بوو |
| لە موناجاتان زۆر مەتین بوو | پازدە ڕۆژان لەسەر نوێن بوو |
| عیزرائیل لە قیامە | هاتە خوارێ لە مەقامە |
| لە محەممەدی کرد سەلامە | هاتوویە خوار ئەو جارە |
| سەلامی وەرگرت ئەو جارە | بەخێر هاتی ئەی ئەغیارە |
| داخۆ بە منت چ کارە؟ | وەرگرم یا بڕۆم ئەو جارە |
| هاتووی کە چی ئیشارەت کەی؟ | یا ئەو ڕوحیم لێ غارەت کەی؟ |
| وای کوت عیزرائیل نازدارە | بەوەی کەم کە ئەو جەببارە |
| من پێم هەیە هەر دوو کارە | وەرگرم یا بڕۆم ئەو جارە |
| فەرمووی کە هاتی بە تەعجیل | بە ئەمر و فەرمانی جەلیل |
| لە کوێت چاو پێکەوت جوبرائیل | ئەتۆ هاتووی بە تەعجیل |
| چاوم پێکەوت هات و ڕاوەستە | دەگریا بە دوو چاوی مەستە |
| مەلەکان تازیانیان لێ خواستە | پەلە مەکە ڕابوەستە |
| حۆرییان ئیرادە بوو وەکەن | تەبەقی نووری توحفە کەن |
| شاباش لەبۆ ڕۆحی تۆ کەن | تێکڕا خۆیان موزەیەن کەن |
| هەر چی بوون و هەر چی نەبوون | ڕەببی کاری «کُن فَیَکُون» |
| پاک موحتاجی هاتنی تۆن | ئەی ڕەسووڵی خۆش ڕەنگ و بۆن |
| حەتتا خالقی غەففارە | چاوەنۆڕە، ئینتیزارە |
| کەنگی ڕۆحی تۆ دەچێتە دیارە | ئەی محەممەدی نازدارە |
| جوبرائیل لە قیامە | هاتە خوار لە مەقامە |
| لە محەممەدی کرد سەلامە | دەگەڵی دەکرد کەلامە |
| سەلامی وەرگرت نەبی | دەڵێ وەڵڵاهی بە زاتی ڕەببی |
| دەبێ جێی ئۆممەتیم لەکن بی | لە ئومەتم غافڵ نەبی |
| وی بە جوبرائیل کوت: گیانە | لە پاش من ئەسەح بزانە |
| ئەو مزگەوت و ئەو مەکانە | دەبن چۆڵ و وێرانە |
| ئەو مزگەوت و ئەو مینبەرە | جێنشینی پێغەمبەرە |
| دەبن زیر و هەم زەبەرە | بە ئەمری حەییی ئەکبەرە |
| ئۆممەتی من گوناهکارە | ئەقدەمییان چوون ئەو جارە |
| تەکەللومی کرد بە زارە | ئادەمییان دێتە دیارە |
| کەس نییە وەعزیان لەبۆ بخوێنێ | وەسەر ڕێگەی حەقیان بێنێ |
| دا شەیتان ئیمانیان لێ نەستێنێ | خەڵک بە باوەڕ بمێنێ |
| خالیق خۆی خێوی قودرەتی | ئەمە دەبا بۆ جەننەتی |
| چی دەکا دەگەڵ ئۆممەتێ؟ | هەموان بەرێ بۆ جەننەتێ |
| جوبرائیل هات بە تەعجیلە | گەییە بەر لیقای جەلیلە |
| گوفتاری کردن کامیلە | لەگەڵ ڕەسوولی جەلیلە |
| دەڵێ وای فەرموو شای جەببارە | سەلام لە نەبی موختارە |
| دەغدەغەی نەبێ چ جارە | ئەو دەچێ ئەزم سەردارە |
| من پادشایەکی بە سەبرم | بێ شەریکم قەت نامرم |
| قەدری ئەوان چاک دەگرم | دینیان لەبۆ ڕادەگرم |
| لێن بەشەرن، دەکەم ئیمانێ | کانی خێر و هەم ئیحسانێ |
| فەزڵی ویرد و هەم قورئانێ | لە ئۆمەتی ئاخر زەمانێ |
| بە زاتی خۆم، خۆم جەببارە | لە دنیای بەد و ڕۆژگارە |
| پێت دەبەخشم گوناهکارە | چون پێغەمبەر ئینتیزارە |
| بە زاتی خودای «ذی الأنعام»ە | بەهەشت خۆش و پڕ تەعامە |
| لە هەموو کافران حەرامە | بۆ ئۆممەتی «خَیرُ الأَنام»ە |
| دوو دەستی هێنا بەردانە | ئەو لەوێی بژارد شوکرانە |
| وای کوت بە دڵی بێ ئەندێشە | جانی جانان وەرە پێشە |
| قەبزی ئەڕواحم بکێشە | ڕێگای مەحشەر لە پێشە |
| ئەی مەلەکی پاک و ئەمین | مەئمووری خوداوەندی موبین |
| زوو کە وەرە پێ هەڵێنە | ئەمری ئاغات بەجێ بێنە |
| عیزرائیل لە جێی خۆی هەستا | لە پێش نەبی ڕادەوەستا |
| دەستی دەنا لەسەر دەستە | بۆ قەبزی ڕوحی بەردەستە |
| ئەو ڕوحی نەبیی موختارە | بە ئەمری پادشاهی جەببارە |
| لە ئەژنۆیانی گرت قەرارە | لە پەنجەرەی دەهاتە خوارە |
| ئەو محەممەدە سەرمەستە | شەربەتی ئاوی دەخواستە |
| ئەو دوو دەستی وا نوورینە | دە ئاوی ساردی هەڵێنە |
| بینەی خۆی دە ئاوێ دەنە | پاک و مونەززەهـ ڕەحمانه |
| خالقی کوللی دە ئەشیانە | گیان کێشان چەندە گرانه |
| بەوەی کەم کە ئەو سەببووحە | لە ئاخری دنیا تاکوو نووحە |
| لە تۆم سووکتر نەکێشان ڕووحە | ---------- |
| فەرمووی بە لەفزی عەڕەبی | تۆی ئەوەڵ و ئاخر نەبی |
| حەزێ دەکەم سەد هێندە بی | قەسەم بە زاتی دە ڕەببی |
| هێندە بێ لە سەر ئۆممەتی نەبێ | هەمووی لەسەر قەلبی من بێ |
| هێندە بێ لە سەر ئۆممەتی نەبی | وای دەفەرموو زاتی نەبی |
| ئۆممەتی من گونەهکارە | تاقەتیان نینە چ جارە |
| ببینن ئەو ڕۆژگارە | ئەو سەییدی دە نامدارە |
| هەڵیان گرن بە هەزارە | بە هیممەتی برا و یارە |
| ئەو مەردی چاک و ئەمینە | سەیید «ختم المرسلین»ە |
| ئەوان خوێندیان یاسینە | لەسەر پادشای مەدینە |
| ڕوحی وە ئەعزەم کار کرد | لە دنیای کۆچ و بار کرد |
| ڕووی وە ڕەحمەتی جەببار کرد | خۆڵی بە سەر مەی هەژار کرد |
| ئۆممەتی خۆی بێ سەردار کرد | پاکی بێچارە و هەژار کرد |
| «کُلُّ شَیءٍ هالِک» بوون | بە ئایەت کاری «کُن فَیَکُون» |
| «إِنَّا لِلَّهِ وَ إِنَّا إِلَیە رَاجِعون» | هەر کە ویستی «کُن فَیَکُون» |
| ئیبنوعەبباس و حەیدەری نامدار | ئاویان دەکردن گەرم و سار |
| پێیان شوشتن، نەبی موختار | لەشی پیرۆزی نازدار |
| بوردێکی یەمەنییان بە دوو بەر کرد | لەویان بە کفنی ڕەسووڵی سەروەر کرد |
| ئەو محەممەدی وا سەر مەستە | سێ قەدیان بۆ ڕاخستە |
| لە نێویاندا ڕانەوەستە | قورئانی لەسەر دەستە |
| جوبرەئیل کە هاتە خوارە | دەگەڵ چەهار مەلەکی موختارە |
| نوێژان کرد لە نەبی نازدارە | بە عیززەت و ئیقتیدارە |
| هەڵیان دەگرت ئەو جەنازە | بە عیززەت و قەدر و نازە |
| بردیان بۆ ڕەوزەیی ڕازە | بە عیززەت و قەدر و نازە |
| بە ئەمری شاهی جەببارە | دڵ لە تاوی لەت و پارە |
| دایان نا بەر پشت نەبی موختارە | ئەویان وا لە دەستی شارە؟ |
| ئەو محەممەدە چاو هەڵێنابوو | پاڵی وە قەبری خۆی دابوو |
| بۆ ئۆممەتی دەست بە دوعا بوو | ---------- |
| گەر ئێمە سەد جاران بەدین | ئەحمەدیللا ئۆممەتی محەممەدین |
| گەر ئێمە سەد جار نادانین | ناشی و شێت و هیچ نەزانین |
| ئەلحەمیللا کافر نین و موسڵمانین | ڕێگای دین باش دەزانین |
| هیجرەتی نەبیی موختارە | هەزار و دووسەد و دوو چەهارە |
| ئەو بەیتە بوو بە ئەشعارە | بۆ مەدینەی پڕ ئەنوارە |
| یا ڕەببی بە ئەم شەوی هەینی | بە شاهی قابەقەوسەینی |
| بە ئیمامی قیبلەتەینی | قەڵەم بە گوناهن دێنی |
| ڕەحمەتێکی بێ شومار کەی | لە جەماعەتی برا و یار کەی |
| لە جەماعەتی برا و یار کەی | بۆ ئۆممەتی پێغەمبەر کەی |
| هەزار ڕەحمەت لە گوێدێران | جودا لە شەیتانی ماڵوێران |