دیوانا مەلایێ جزیری/ش
Jump to navigation
Jump to search
ئیرۆ مەلا سەراپا لەو تێک بوومە ئاتەش
[edit]ئیرۆ مەلا سەراپا لەو تێک بوومە ئاتەش | من دی سەحەر خەرامان نەیشەکەرا شرین مەش |
یا رەب چ تورفە مێوە ئەڤ ڕەنگە مەی دبەخشت | شعرا مە تێ پەریشان نەزما مە تێ موشەووەش |
دل گەشتە مە ژ دێرێ ناچم کنشتەیێ قەت | محراب وێ ب من ڕا وەر دا بچینە لالەش |
مەحبووب وەک ستێرا گۆڤەند و عشقبازی | تێکل بچین سەمایێ هشیار و مەست و سەرخوەش |
حەیوان ل کوو دمینت؟ ئەم موفتییێ زەمانین | بێتن ژ دەستێ ساقی جاما زەلالە بێ غەش |
وەر گوهدە چەنگ و نایێ شێرین کو بێن سەمایێ | جامێ بنووشە ڤێڕان چ سادە و چ زەرکەش |
تالع کو تێت و فورسەت موهلەت ل نک حەرامە | من عومرێ نووح نینە وەرە ساقی و ب لەز خوەش |
نەیشەککەرا شرین قەد مە ژ دەست تە مەی دڤێتن | دا سینە پێ جەلا دین رەوشەن بکین دلێ رەش |
جامد چ کن ب حوسنێ کو وان نەزەر ل خوارە | خەرتەبعەتن د ئەبلەهـ چ نێرگز و چ کەربەش |
ئەبلەهـ خوە ناسپێرت جارەک ب دەست دەلیلان | کۆرە چ کت تەوافێ نابینتن بەرێ رەش |
بێزێ دکت ژ قەنجان ژ ناز و ڕەمز و غەنجان | قەدرێ گولان چ زانت کەربەش دڤێت کەرێ رەش |
شۆخا کو ئەز د بەندێ دل گرتییە کەمەندێ | لەتیفە زوهرەسیما ئەبروو هلال و مەهوەش |
فەیزا مە شوبهی نیلە ئەم دجلە و فوراتین | گەر شەیخ و وەر ئیمامە ڤێڕایە من کەشاکەش |
برهێن ژ دەستێ قودرەت نشانە کر نشانی | لامع ژ بەر دبارن چ یەنگییەک وە پەڕوەش |
ئەللاهـ ل من حەیاتە چ شەککەر و نەباتە | ژ نووڤە دێ جوان بم گەر بهن بکم گولا گەش |
شەبێ قەدرێ ل مە ڕەوشەن کە تو ڕووحی وەرە خوەش
[edit]شەبێ قەدرێ ل مە ڕەوشەن کە تو ڕووحی وەرە خوەش | مە ژ نوو خوەش کە ل سەر چەهڤێن شەهیدێن خوە بمەش |
ما ل من کی نەزەرەک لوتفێ ژ دل غەمزەیەیان | بڕەشینی جەگەرێ ڕیش ژ قەوسێن خوە ب وەش |
سەحەرێ جوملە شەهیدێن تە ب ڕم ئاڤێهتی | ئێژمارینە یەکا یەک مە حەمی شەش سەد و شەش |
لێ شەهیدێن تە ب ئەژمار ب خەنجەر کوشتین | هێ نەچووی خوون ژ برینان سەد و هەفتاد و دو لەش |
جەنگێ هندی دکرن فێرس و ڕمبازێ عەرەب | تۆخ و عالا د فەڕەنگینە کەماندارێ حەبەش |
تو بنێ ڕۆم و عەجەم کوشتنە زەنگی د کەمین | هانە هەر تیپ پەیاپەی ژ تەرەف ڕوو خوەش و خوەش |
دا مە شەهزادە ب دەستێ خوە موبارەک قەدەحەک | نە غوبارەک ژ خوماری و نە توندی و نە غەش |
دو قەدەح مەی ب نشانی ددەرت ڕەنگ ب ڕەنگ | نێرگزا نازکە ڕەعنا و گولا تازەیە گەش |
غالبا ئەهلێ زەمانی ما مەلا ئادەمیین؟! | ڤە نە مایین ژ کەرێ مەی ڕەش و گایێ تەیێ بەش |
عارفێن ئەهلێ بەسارەت ژ نەسەق مەردومێ چەشم | سورمە پووشن د بەیازێ وە قەبایا خوەیە ڕەش |
حەیف نینە قەدەما تە کو ل سەر هەفت تەبەق | وەرە جارەک تو ل سەر چەهڤێ مەلایێ خوە بمەش |