خلوقك سسى
ترنم أيليور سسك،
نه سويليوربيليرميسك؟
دييوركه : « ايشت ليل اولور، طلوع اولور، نهار اولور؛
« شتا كچر، بهار اولور؛
« زمين شكوفه‌زار اولور؛
« چيچكلرك طراوتيله پر طراوت شباب٬
« كزر، قوشار، اوچار، كولر... كولر بوتون ذوى‌الحيات؛
« كولر بوتون ترانه‌لر،
«كولر هپ آشيانهٰ‌لر؛
« بو قار، بو قيش، بوسردئ هواكه تيتره‌تير سنى،
« شو انجماد آتشين‌كه ياقدى روح كلشنى،
« شوبرف پاره‌لركه طوغروسى اوشوتميور بنى...
« أوت شو برف‌دانه‌لر،
« نشاطمه بهانه‌لر،
« تف حيات بخش آفتابه قارشى بى ثبات٬
« أرير٬ آقار؛ اونڭله رشحه‌ياب فيض اولور تراب؛
« او فيض ايله نهار اولور٬
« زمين شكوفه‌زار اولور. »
ملك چوجوق٬ باباك سنك سسكله بختيار اولور؛
ترنم أيليور سسك٬
نه روحسك بيليرميسك!
توفيق فكرت