اٹھئے تو کہاں جائیے جو کچھ ہے یہیں ہے
اٹھئے تو کہاں جائیے جو کچھ ہے یہیں ہے
باہر ترے گھر کے تو نہ دنیا ہے نہ دیں ہے
ہم ہیں کہ سر نقش قدم سیکڑوں سجدے
وہ ہے کہ جہاں دیکھیے بس چیں بہ جبیں ہے
صحرا میں پھراتی ہے مجھے خانہ خرابی
یہ ڈھونڈ رہا ہوں کہ مرا گھر بھی یہیں ہے
آتی نہیں نزدیک خیالوں کے یہ دنیا
وہ بزم بھی یا رب کوئی فردوس بریں ہے
تا حد تخیل فقط اک جلوہ ہے یا دل
دنیا میں ہماری نہ فلک ہے نہ زمیں ہے
جی بھر کے ذرا دیکھ تو لیں حسن کے جلوے
پھر کس کو انہیں چھوڑ کے جینے کا یقیں ہے
وہ درد دروں جسم میں یوں پھیل گیا ہے
پڑتا ہے جہاں ہاتھ سمجھتا ہوں یہیں ہے
رہتا ہوں سہاؔ اہل حرم میں بھی نمایاں
ہوتے ہیں اشارے یہ خرابات نشیں ہے
|
This work is now in the public domain because it originates from India and its term of copyright has expired. According to The Indian Copyright Act, 1957, all documents enter the public domain after sixty years counted from the beginning of the following calendar year (ie. as of 2024, prior to 1 January 1964) after the death of the author. | 
|