اساں طلب سائیں دے نام دی
چور کرن نِت چوریاں
عملی نُوں عملاں دی گھوڑیاں
کامی نُوں چِنتا کام دی
اساں طلب سائیں دے نام دی
پاتشاہاں نُوں پاتشاہیاں
شاہاں نُوں اُگراہیاں
مہر نُوں پِنڈ گراؤں دی
اساں طلب سائیں دے نام دی
اِک بازی پائیاں سائیاں
اِک اچرج کھیل نباہیاں
سبھ کھیڈ کھیڈ گھر آؤندی
اساں طلب سائیں دے نام دی
لوک کرن لڑائیاں
شرم رکِھیں تُوں سائیاں
سبھ مر مر خاک سماؤندی
اساں طلب سائیں دے نام دی
اِک شاہ حسین فقیر ہے
تُسیں نہ کوئی آکھو پیر ہے
اساں کُوڑی گلّ نہ بھاؤندی
اساں طلب سائیں دے نام دی
|
This work was published before January 1, 1929, and is in the public domain worldwide because the author died at least 100 years ago. |