ئەی فەلەک بۆچی

←

ئەی فەلەک بۆچی (1966)
by عوسمان عوزێری

→

302958ئەی فەلەک بۆچی1966عوسمان عوزێری

دەمەو چێشتتەنگاو لەدوای بەیانی	ئەمبیست ئەیانوت ئەرێ نازانی
دوێنێ لە باکوور لافاو هەڵساوە	شاری سلێمانی تەواو تێک داوە
بۆ هەر کوێ ئەچووم هەرا بڵاو بوو	هەر سلێمانی باسی لەناو بوو
ئەگەیشتمە هەرکەس پێم ئەوت برا	چییە ئەو باسە وا بۆتە هەرا
ئەیوت: نازانی شاری کوردەکان	کڕێوە و تەرزە کردوویە وێران
ئەڵێن چەندەها کەس لێی خنکاوە	بە دەها خانووی تێدا ڕووخاوە
کە بیستم وەکوو جەرگم بێتە خوار	خۆشی و پێکەنین لێم گۆڕان بە زار
ئەم جارە بەرەو شاری سلێمانی	کەوتمە سکاڵا بەدڵ پەنهانی
وتم: تۆ جێگای بەرزی کوردانی	تۆ بڵێی ڕاست بێ ئەڵێن وێرانی
جاران هەمیشە لە خەو و خواردن	لە خۆشی و شادی، قسە و ڕابواردن
ئاخم ئەکێشا ئەموت دوو ساڵە	سلێمانیم نەدی و جەرگم زووخاڵە
ئاخۆ ئێستاکە ڕازابێتەوە	وەکوو گوڵاڵە نەخشابێتەوە
کەچی بۆ مژدەی هەناوی بووریان	ئەم هەواڵەم بیست کردمی پەرێشان
کەوا بە جووتە فەلەک و زەمان	بە دەستی پیسیان جەرگمیان هەڵقڕچان
کۆشکی خەیاڵیان تەواو ڕووخاندم	شادی و خەندەیان لە لێو فڕاندم
ئەی فەلەک چەرخت تەفروتوونا بێ	وەک دۆم شیتاڵت بۆ ڕەشەبا بێ
وەک سواڵکەر دایم سەرکز و مات بی	برسی و ڕەنجەڕۆ لاواز و لات بی
ئەو تەخت و بەختەی کە شانازیتە	هۆی سەما و بەزم و ڕمانبازیتە
هەڵوەشێ وەکوو کورتانی دەجال	هەر ڕۆژەی کەرێک بیکاتە جەواڵ
ئەو پێچکەی کەوا سووڕت پێ ئەدا	بەرەو وڵات و گەلانت ئەبا
پارەپارە بێت چەپەرەکانی	بۆ ئەوەی تەواونەکا سوڕدانی
پێم بڵێ ئەرێ کافری بێفەڕ	وەکوو پشیلەی سەرانگویلک گەڕ
چۆن سلێمانیت کرد بە نیشانە	پلارت تێ گرت بێبەزەیییانە
هەر وەکوو گورگی برسیی ناوزەبەن	دەمی گڵاوت لە کوردستان ژەن
لەم سەرزەمینە شارەزا نەبووی؟	وا بەرەو شاری سلێمانی چووی؟
هەی بێفەڕ تۆزێ ڕەحمت ببوایە	کارەساتی وات تیا نەکردایە
ئەو گشت مناڵە بەرمەمکانانە	ئەو کیژ و کچە خەت و خاڵانە
ئەو گەنج و پیاو مرۆڤ و ژنە	ئەو هەموو ڕۆڵە و کۆرپە خرپنە
کێ تاوانکارە کێ وەها ئەمرێ؟	بێفەڕ کێ گوناهی ئەوان هەڵئەگرێ؟
هەی دڵڕەقی پیس گوڵی پڕ لە قین	بۆ جیهان بوویتە چەڵەمە و ناڵین
نایەڵیت یەکێ تۆزێ بخەوێ	ڕێ نادەی گەلێ تۆزی سەرکەوێ
پەتەکەی دەستت هەی بێباری پیس	لوول ئەخوا وێنەی ئەڵەقەی گوریس
بۆ ئەوە گەلان بخەیتە سەما	کاتێکت زانی تۆزقاڵت نەما
لێ یشت دیار بێ هەتاکوو ئێستا	کەس نەیتوانیوە مافی کورد بخوا
هەرچۆن بێ چاوت بە زۆر دەردێنین	گەر بڕواش ناکەی دوایی ئەیبینین
بەڵێنم داوە و وا پێت ئەبێژم	دواتنۆکی خوێنم بۆ کورد ئەڕێژم
نەک من بەتەنیا میلیۆنان وەک من	خۆ بەختکەرن تا کاتی مردن
جا خاکت بە سەر بۆ وات لە خۆت کرد	تۆیش و مام ڕێوی ئەو باوکەتان مرد
کەوا بەرامبەر گەلی کوردەوار	هەژگی کلکتان بکێڵێ کۆسار

1958/10/19

This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:

It is an anonymous work or pseudonymous work and 50 years have passed since the year of its publication
It is a work where the copyright holder is a legal entity or a work of applied art and 50 years have passed since the year of its publication
It is a photographic or cinematic work that is not compositive (artistic in nature) first published before 1 January 1999
It is work published in Iraq before 1 January 1954, and the author died before 1 January 1979
It is another kind of work, and 50 years have passed since the year of death of the author (or last-surviving author)
It is one of "collections of official documents, such as texts of international laws, regulations and agreements, judicial judgements and various official documents."
It is the work of a body corporate, public or private, published by January 1st, 1980 (Article 20, 1971 law).