ئەی دڵ کۆتا کەر زایەڵە و وەی وەی

←

ئەی دڵ کۆتا کەر زایەڵە و وەی وەی (1965)
by مینە جاف

→

304067ئەی دڵ کۆتا کەر زایەڵە و وەی وەی1965مینە جاف

ئەی دڵ کۆتا کەر زایەڵە و وەی وەی	وەس کەرۆ زاری و شیوەن هەتا کەی
ئێدەن دیاردا خێڵ خانەی جافان	ئاما تلمیت بار موشکین کڵافان
ئاما ئاهووکەی توونی هەردەی دڵ	چەم سیاوەکەی سەر دەلیلەی گەڵ
نازاری سەر عێل ئاما وە هەوار	قەدیم هەوارگەش کەردەن وە گوڵزار
ئەو وڵکە و مەکان دڵ مەدا وە هەم	ئیستە مەدۆ ڕەنگ گوڵ باخچەی ئیرەم
مەگێڵوون وە ناز دیدە خوماران	بیەن وە ماوای نازک نازداران
ئەو هەردە و وڵات گیان ماوەرد وە تەنگ	سەفاش مەدۆ ڕەنگ بای تەخت فەرەنگ
نیەن توانام بگیرۆم قەرار	ئێدەن قیبلەکەم ئامان وە هەوار
تۆیش پەی وێت وەش بەر دومای خەمانەن	جاڕووکەش کەر هەم شادی میهمانەن
ساڕێش مەبۆ زام دووریی باڵاکەش	پەی دەوا کافیەن گەردی پاڵاکەش
ئیمجار وە تاقیق خەم نە زەواڵەن	هجران الوداع وادەی ویساڵەن
واچە وە خەمان کەڵەک شێونان	شادی نۆبەشەن وادەی وەسڵ ئامان
بکەر تەدارەک ئەساسەی سەفەر	پەرێ هەدیەی خاس تو گیان حازر کەر
تاجیل کەر دێرەن بشیم وە ڕاوە	بواچێم وە دەم حەمد و سەناوە
وەش ئامای وە خەیر گوڵباغی باغم	وەش ئامای وە خەیر کەیف و دەماغم
وەش ئامای وە خەیر نووری چەمانم	وەش ئامای وە خەیر دەوای زامانم
وەش ئامای وە خەیر تاووسی گوڵشەن	ئەر هەی وەش ئامای ئاهووکەی خوتەن
قیبلەم وەش ئامای وارگەت باریک بۆ	ڕووی بەدکار چون تای زوڵفت تاریک بۆ
دوشمن خەم خەڵات دۆست ئازاد بۆ	خوێشانت دایم چون وێت دڵشاد بۆ
واچە قیبلەکەم یەڕای ئیمانەن	پەی چێش یە قانوون ئەهلی ویجدانەن
وێت مەشغووڵ وە سەیر وە ئێڵاخەوە	من جە گەرمەسێر ئاخو و داخەوە
سووچیای سەبوون شەرەر ئێش و دەرد	گیرۆدەی خەمان دڵ ئەوگار، ڕەنگ زەرد
شەوان تا وە ڕۆ خەم هەمڕازم بوو	زایەڵەی دەروون سەدای سازم بوو
نەوای نەی ناڵەی دڵەی پڕ دەردم	تەسکینم دەمەی هەناسەی سەردم
وەفراوم هوناو زامی کاری بوو	خۆراکم کەباب دڵ ئەوگاری بوو
شەراوم شووراو دیدەی ئەسرین بار	نەوای نەی کزەی جگەر سوزای نار
ماوا و مەکانم وە هەردانەوە	مەگێڵام وە ئێش وە دەردانەوە
چون قەیس عەوداڵ بێ زەید و ماوا	موانام ئی فەرد سوب تا خۆرئاوا
قیبلەم تۆ نە سەیر سەفای کۆساران	هیچ نیەن یادت جە دڵ ئەوگاران
وەی تەور دا جواو شۆخی شێوا شەم	نازاری سەرخێڵ پەڕەی گوڵ وە دەم
هەرکەس وە مەیلی لەیلێ دڵ کەیل بۆ	مەبۆ ئەو مەجنوون هەردەی دوجەیل بۆ
مەبۆ چون عەوداڵ کەڵبووس وە کۆڵ بۆ	دێوانە ئاسا جاکەش نەچۆڵ بۆ
وە دایم زەدەی زامی هجران بۆ	هامڕازش ناڵە و شین و گریان بۆ
خۆراکش کەباب دڵ ئەوگاری بۆ	وەفراوش هوناو زامی کاری بۆ
لەیل مەبۆ چون لەیل بشۆ وە ئێڵاخ	عاشق چون مەجنوون سوچنیۆ وە داخ
ڕەویەی نازاران سەفا و سەیرانەن	پیشەی عاشقان هانا و گریانەن
هەرکەس وە عەشق باڵام عەوداڵ بۆ	مەبۆ چون مینە وە کۆی زووخاڵ بۆ

1943/8/10

This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:

It is an anonymous work or pseudonymous work and 50 years have passed since the year of its publication
It is a work where the copyright holder is a legal entity or a work of applied art and 50 years have passed since the year of its publication
It is a photographic or cinematic work that is not compositive (artistic in nature) first published before 1 January 1999
It is work published in Iraq before 1 January 1954, and the author died before 1 January 1979
It is another kind of work, and 50 years have passed since the year of death of the author (or last-surviving author)
It is one of "collections of official documents, such as texts of international laws, regulations and agreements, judicial judgements and various official documents."
It is the work of a body corporate, public or private, published by January 1st, 1980 (Article 20, 1971 law).