Ӧтув олӧм
Степко Педӧрлӧн вӧлі кык ныв: Ӧльӧк нима да Опӧ нима, да Савӧ нима пи.
Ӧтчыд найӧ лэбачьясӧн ворсӧны да вензьӧны:
— Ме, — шуӧ Савӧ: — медыджыд, ме лоа кутш пыдди да кыкнаннытӧ гыж вилкиӧн позйӧ лэбӧда.
— Медъён лэбачыс тані варыш на, — шуӧ Опӧ: — ме варыш пыдди, — тіянӧс кокала.
— Ме кылакай, — вензьӧ Ӧльӧк: — ме медвежӧра: менӧ кокавсьӧма, позйӧ нуӧм оз ло ни.
Кывзіс-кывзіс Степко Педӧр да шуӧ челядьлы:
— Вайӧй жӧ меным татчӧ корӧсь.
Вайисны корӧсь.
— Коді, — шуӧ: — вермас чегны?
Челядь мӧда-мӧд бӧрсяыс тільсисны-тільсисны корӧсь вылын, — чегны эз вермыны.
Педӧр корӧсь разис да ӧти ньӧрйӧн кутіс сетавны.
— Ӧні, — шуас: — чегъялӧй!
Челядь став корӧсь ньӧрсӧ руч-рач чегъялісны.
— Сэтшӧм жӧ ӧд, — шуӧ Педӧр: — миян и лоӧмыд: ӧтувтчам кӧ, миянӧс некодлы не вермывны, увтыртны кӧ мӧда-мӧднымӧс кутам да вылӧ пуксьыны, лэбачьяс моз, да разіпельӧ овны, сэки тіянӧс медомӧль мортыс кедзовтас.
|
This work is in the public domain in the United States but it may not be in other jurisdictions. See Copyright.
|