Бабай менән- юлсылар беҙ,
Ул эстән көйләп килә,
Мин, студент, педвузымдан,
Ҡунаҡҡа ҡайтам өйгә.
Башын ҡағып бара ҡашҡа,
Бөркөлөп ҡала тыны.
Аҫылып килә ҡолаҡҡа,
Өшөттөргөс ел йыры.
Күбектәй йомшаҡ мамыҡҡа
Елбиҙәк һипкән кеүек,
Юл буйынса һибәләй аҡ ҡар,
Күҙ ҡыҫа ем-ем итеп.
Һыуыҡ, Ҡашҡа моронона
Боҙ булып туңып бара,
Йә сана аҫтына ҡалып,
Әсе итеп һыҙғыра.
Шатлыҡ, дуҫтар, күрәһең,
Йөк булалмайҙыр инде-
Юҡһа ҡашҡа, юртыу түгел,
Тарта ла алмаҫ ине.
Бабай менән-юлсылар беҙ,
Ул эстән көйләп килә.
Мин, студент, педвузымдан,
Ҡунаҡҡа ҡайтам өйгә.
