Янгамо (2006)/Сюдома
[158]
| СЮДОМА |
Эрьва сёксня кучнылимизь студент марто велев якстерькаень-мезень урядамо. Ульнесть паро тевть, ульнесть ацирьгалемат; неть «лездамотнеде» лиснесть раксематкак. Кода илязо уле, лиясто ков, лиясто мик кавтояк савкшнось, кода кортыть, трямс кендялт. Ве велесэнть эрямом кадовсь тень кенярксто пешксе ды теке марто ризксэнь кандыця ледстнемакс.
Пургазвелесь — покш веле. Кудонзо пичень, одт ды сэрейть. Прок баягат. Вастневить кирьпеценьгак. Эрицянзо арсить валскень чиденть: малав эрьва кудонть икеле чочкт, лазт, кирьпецть. Ансяк сынек, велень [159] прявтнэ мусть тень эрямо тарка — ськамонзо эриця сыре аваломанень кедьсэ. Кудозо веленть песэль. Мелезэнь те эзь тукшно. Якамс васов, ичемс рудазонть зняронь тарка кинь мельс туи? Мезеяк а теят, лия «гостиница», седе вечкевикс ды мельс туиця, — арасель. Секскак эрьва чистэ чопоньпелев савкшнось тень эскелямс веленть кувалт ве пестэ омбоцес.
Туема чизэнь пень кудотне теевсть тень седе содавиксэкс. Се оно покш, седе сюпав, тона покшкавтни «сеериця» артовкссонзо... Весе вадрят, эрьвась эйстэст, неяви, эри эсензэ уцяскасо, эрьванть сонсензэ эрямозо. Азортнэстэ ламот кирдить кискат. Видьстэ мерян, Пургазвеленсетнень коряс седе гайгиця вайгель пинеть вастнемс тень эзь савкшно. Талай чокшне кода ушодсызь «концертэст» — куш велентькак кадык. Мерят, пиризь веленть эрьва ёндо ды эцить саламо тёжат орт. «Ламо сюпавт — ламо пинеть», — аволь весть совсесь превзэнь мелесь. Весемеде вадряльть ды тукшность мелезэнь кавто кудотне. Сынь веленть куншка видьсэльть. Кавонест кевень. Вейкесь артозь сэнеласто, омбоцесь — ожосто. Вальмаст алга, пирявкске экшсэ, минень-сюнонь чахрат. Сёксень шкаваяк, налкставиця пиземетнень лангс апак вано, кувтолдсть-пеедькшнесть ламо тюссо. Аволь кудот — сельмень сявадомат. Ванозь вановлить лангозост!
Сынст ютксо таркась ансяк мель калавтнесь. Тесэяк эрямо иезэ... Вай, ды кодамо те кудо? Лемезэ ансяк. Паряк, ульнеськак истямокс зярдо-бути, ней уш кудонокак а ловсак. Аламо мезе кадовсь икелень покшкавтнемадонзо ды мазычидензэ. Лазонь латозо раужкадсь, таркань-тарка лазнэтне наксадсть ды прасть алов. Вальмань таркас — ниле ужосо варят. Вармань ургатемстэ кудопотмось пешкеди тандавтнемань увтсо ды вешксемасо. Маряви, сёксень дюм чопода вестэ тей пурнавкшныть эсь ды шабра велень весе эвстнелецькайтне. Сакшныть тей киштеме-морамо, раужо тевдест арсеме. Вешкеманть марто марсеви мелень калавтыця кодамо-бути калтаема. Сонзэ марязь, ж-у-уйк мери седееть!
Паро куш килеесь чаво юртонть вансты. Озавтокшнызь сонзэ зярдо-бути овсе кудонть каршо, зярыя эскельксэнь ютко. Сон сыре, аволь пек сэрей, тень таркас вельть рацяня. Чова тарадкензэ, прок валанясто судрязь черть, нурнть-чпртить коштонь эрьва лекстявкстонть. Тей-тов, тей-тов... Кие сонзэ озавтызе? Косо ней те ломанесь, эри-арась?
Кудонть-килеенть вакска эрьва ютамстон совсесь [160] потмозон та-кодамо кельме, навола ёжо. Мезде, маряви, пелемс? Весть эзинь кирдеве, полавтыя молема ёнксом, саинь мель варштамс каладо кудонть потс. Венстия кирьгам вальмаванть. Судозон каятотсь наксадома ды куштамо-кулома чине. Весе таркасост: тия-тува лондадозь потолокозо, киякс сэдявксонзо. Таркасонзо каштомоськак, ансяк кадовсь эйстэнзэ кирьпець пельксэнь пандыне. «Мекс кияк а витнесы?! Пенгекс куш калавтневлизь...» — мерькасть прясон мельтне.
Эрьва ютамсто макснинь эстень вал: кевкстнемс азораванть, мекс кияк а сы эрямо те мазый таркантень. Сан — стувтса, икелень арсематнень нардасызь лия мелявкстнэ.
Велетнева, кода уш меринь, лытамс тень савкшнось аволь аламо. Тедеде тов, сы иестэ лияв... Туво кардонь «якстере ужинесэяк» натой савкшнось удсемс. Се иестэнть лиссь лиякс: эрямо таркакс тень ульнесь икельцть-удалцть вишка кудыне. Икельцесь — «монь». Валдо, ванькс, лембе. Сеедьстэ мольсь пиземе марто лов, тарькс якшамо. Чинь-чоп паксясо поксарямодо мейле лембесь ды лембе кедьсэ теезь урядось марявсть тень ормаменьксэкс. Шлян-теян, ярсан ды саян книга. Зяро тансть, зяро мелень витиця ледстнемат кадовсть сеть чокшнетнеде!
Се чистэнть валом кирдия — кевкстия кудазораванть. Сон совась мезень-бути кис «монь» пельксэв, ды пшкадинь тензэ:.
— Яла стувтса. Ёвтыка, мезень тамашань тев лиссь веленть куншкасо кадозь-стувтозь кудонть марто? Эчке килей икелензэ.
— Ёвтнеса, ёвтнеса, — мерсь Канява сырькаесь.
Таргась штере, пона моцькине ды озась каршон штердеме. Мон тензэ меринь Канява патяй. Аволь сэрей, коськана бабине. Валдо тюс. Кавтов судрязь черензэ шержейть. Эсь пачкан меринь тензэ лиякс — «ванькчинь азорава». Мезеяк а мерят, ломанесь вечксь урядонь кирдеме. Ансяк пры ютко шка, сеске саи нардтнема нулыне ды тенсть. Тюжасто артозь кияксось кувтолды, челькев таркине костояк а муят.
Канява патям пингензэ ютавтсь ськамонзо. Мирдензэ марто недляяк эзь эря. Саизь войнав, ды тосто уш эзь учово. Чавовомадонзо мейле чачтась тейтерне. Кастызе-тризе. Сась шка, ды тякинезэ лиссь мирденень. Тусть эрямо васоло ошов. Сакшность чуросто. Секскак ськамочись ульнесь Канява патянень свалшкань ялгакс. Эсензэ вийсэ путызе-пурнызе эрямо [161] пизынензэяк. Лиятат пеняцить ськамочист лангс: келя, пек стака печтямс пингеть ялгиневтеме. Канява патям теде вал эзь правто. Войнанть прядовомадо мейле ламот цёратнеде чиявтыксэлизь. Киненьгак эзь моле. Васня тевензэ тейнесь тейтерензэ марто, мейле — ськамонзо. Эрясь кецнезь, валдонь неезь, паронь марязь.
Канява патям сельгсь керш кедь сурозонзо ды кармась штердеме. Штердсь ды аламонь-аламонь сэтьме вайгельсэ ёвтнесь «раужо кудонть» историядонзо:
— Кемголмовошка иеть тень уш ульнесть. Покшкелинь, мезть кортамс. Эринек сестэ Кильдяень каршо. Чарькодить, киде моли кортамось? Секскак весе мельсэнь, мезе лиссь те, кода тон мерят, «раужо» юртонть марто.
Эрясть-аштесть се таркасонть колмонест — Кильдюшонь Промза, Мазава низэ ды Ламзурь тейтерест. Истя сынь эрясть, авань ёвтнеманзо коряс, монь чачома иес. Ульнесть атят-бабат аволь одт. Кулость. Кулость, кода авам мериль, ве коволсо...
Канява патям путызе штеренть стул лангс ды полавтызе кортамонь лувонзо:
— Оймсян аламнеде. Сельмтне-каракштнэ мекс-бути сизить. Паряк, чайнеде копордатано, а?
Мон мезеяк эзинь мере.
Зярыя шкань ютазь сырькайнесь кандсь удалце кудосто кавто пенчкеть, лакавтозь чай ды лиятат-мезть.
— Урядыть аламос книгат-тетрадеть! — кармавтымим пешксе кедь совицясь.
Мон сеске шаштынь конёвон ве пелев, ды патясь «озавтынзе» кедьгетнень чамдозь таркантень.
— Ну, ней седе ён ули тенек калякамо. Штердемстэ мезе... Мелеськак, секень вант, сурекс штердеви, — мизолдозь ёвтынзе валонзо ды седе малав айгизе чайде пешксе бокалом. — Мезде уш мон ёвтнинь? Мезес пачкодинь?
— Кода Ламзурень тетянзо-аванзо кулость, — ледстия мон чаем човорямсто.
Евтницясь весть-кавксть копордась ламбамо ведтенть, нардызе човине турва кургонзо нардамосо ды поладызе ёвтнеманзо:
— Те семиясь ульнесь аволь лиятнень кондямо. Эйкакшост, Ламзурь, вейкель. Весемень ветень-ветень, сисемень-сисемень, сынст — вейке. Сеяк тейтерь. Ава-ломаньс, содат, мода эзть максне. Берянель, кода ней арсян, те коесь! Азё варчик модавтомо эрямонть! Сонстемензэ содак вейкеде: анокстак кескав — ды вальмалга кедень венстнеме. Ламот истямос пракшныльть. Эно [162] ков молят? Кильдяень, мекевланг, идинзе ды мейле стявтынзе пильге лангс семиянь вишкачись. Тонсь арсек, зяро эряви ве пакшань трямс?! Мазавадо, Промзань нидензэ, а ледстнян. Кадык сонзэяк паезэ арасель, эсензэ андомга тевть уш тейсь.
Шкась ютась. Эзизь редяяк, Ламзурь теевсь аванзо туртов лездыцякс. Аволь кувать учозь тетянтеньгак теевсь куш ков нежекс. Яла мерить, ансяк ускицянтень лезэсь лезэкс ары. Кода «усксть» Промза ды Мазава, весе велесь содась. Лишметь — аволь ломанть ульнесть. Вастневить, нейгак истят понгонить. Ули истямо семия велесэнек.
Пургазвелесэ Кильдяйтне лововсть васень ломанекс. Кирдсть пире реветь, скалт, лишметь. Модасткак аламошка ульнесь. Монь ледстнемга, Ламзурь эрясь, хозяйстванзо ветясь ськамонзо. Мекс ськамонзо, а содан. А мирде, а эйкакшт... Кода тевтнень ветясь? Ветясь. Стака шкатнестэ сивелесь лездыцят. Ве аваломань кирдсь кудосо пень перть. Вый, кода уш лемезэ... А-а-а, Татюш! Истямо ёроков ульнесь, истямо киткав!
Ламзурь...
Истямо ава сондензэ мейле эзинь некшне. Косто эйзэнзэ зняро виесь пурнавкшнось?! Сонсь вишкине, моньшкангак арасель, виесь, виесь эйсэнзэ — цёрань. Аволь ава — тол. Сока недьскак кундсесь, чарькодят? Арась-арась, истят ломанть эзинь вастне! Уски, вачки, нуи, пивсы... Ды истя ливчанясто, истя эрязасто! Аволь аватне, цёратнеяк ламо тевсэ мельганзо эзть кенерькшне. Аволь ава — варма. Валозо вейкель — курок, седе курок. Паряк, шкань аразде мирдененьгак эзь лисе... Косто истямонтень мирде муеви?
Пазоськак лиясто нарьгамонь тевть тейни.
Вейкенень бабань пеште — а превть, а мезть, лиянень — весе. Ламзурнень, лия ёнкстнэде башка, мазычидентькак венстекшнесь апак вано. Сельмензэ менель сэнть, черензэ ашназат, туст... Монь мельс весемеде пек тукшность виде, аволь покш судозо ды човине турванзо. Весе эйсэнзэльть: мазычи, певтеме ёрокчи, се шкань коряс, улить-парот. Чанстезэ вана — арасель. Те кодамо эрямо, тонсь ёвтык, бути эзизе варчне авакс улема чанстенть? Мезекс уликстнэ-паротне, бути эзить кирде мештесэть эсь покольнеть? А полавтсак. Кинень мезе. Эрьвась бажи амольдямс куш кедькоморнэ чанстьке чанстень лисьмапрястонть, ды а амольдяви.
Кой-зярдо истят мельть сакшныть превзэнь: мекс ломантненень а вечкевить лия коень кирдицятне?
[163] Ульть истямокс, кодат весе! А улят — учок музгордемат. «Скал прок! Кодаяк а пештяви... Яла тензэ а саты, яла тензэ аламо... Колмо пингть, маряви, арси эрямс...» — сялгонить яла тевень вечкицятнень. Эсень саемак. Иля мере, пря шнан. Зярдо путынь пелькашка те кудыненть, сэвекшнымизь шабратне. «Косто ярмактнень саи? Косто чочктнень ускинзе?» Сельмест сявадыльть мик, мекс пиресэнь уряд, мекс модарькан сынст коряс покшт эрсить. Мон уш седе ламо чатьмонекшнян, козонь а эряви а эцнян, келем а венстнян.
Те мон вана мекс эсь эрямом ледстия — Ламзурде седе домкасто ёвтнемга. Седе парсте чарькодевлик те ломаненть. Тонсь арсек: бути монь лангс истя ваныть, истя колсить седеем, сестэ кодамокс ловсть сонзэ? Кеман, а весть пачколесть пилезэнзэ: верень потий, кендял, апештявиця, кежей кажварч... Мернесть тензэ, содамга, сельмскак. Удалга кортамотнеде а мезть уставакшномскак.
Мезень кис? Паряк, куш тон ёвтасак?
Мекс те «нимилявнесь» кавто цёрат аштиль? Мекс мазыель, тень эйсэль чумозо? Монень те кодаяк а чарькодеви.
Канява патясь апак учо стясь таркастонзо, ушодсь тунь лиядо.
— Вай, допрок каладынь. Тонгак чатьмонят. Чаенек умок кельмесь. Учок аламос, молян эждьса, — автордызе чайникенть ды эрязасто, теке аволь сыре ломаньгак, лиссь удалце кудов.
Кадовинь ловновиця книгам марто.
«Ков вети ёвтнемасонзо? Мезес прыть Ламзурень эрямо ноготонзо? Кодамо сюлмавкс «раужо кудонть» ды сонзэ ютксо?» — ульнесь мелем содамс.
Панжовсь кенкшесь ды, мизолксонь кирдезь, прок чивалдыне, совась Канява сырькаесь. Нуртясь монень ды эстензэ лакиведь, каясь сахар ды чай. Каязенть човоринек бокалтнэс путозь сиянь пенчкетнесэ. Корштынек весть-кавксть ды ве шкасто, прок кортазель, кепединек вановтонок вейкенек-вейкенек лангс. «Ну кода, ушодсак ёвтнемат?» — кевкстнесь вейкесь. «Ужо, ужо, дугай, васня ойминем таргаса...» — мерсь омбоцесь.
Кивчк шка, ды таго сиянь чудикерьксэкс жойнезевсь Канява патянь апак капша чудиця вайгелезэ:
— Ушодовсть колоньгеменце иетне. Велетнень ланга ютыця се шкань бурятнеде-кандыловтнеде тонеть ёвтнемс а мезть. Сындест мондень ламо содат.
Вишка Ламзурне, кода тензэ мерильть велесэ, сюпаволь. Мезе эйсэнзэ учось — чарькодят. Чарькодсь аваськак.
[164] Шказо кизэль. Куринкань тейтернетнень марто, мельсэнь, налксезевннек се чистэнть чоподас. Марясынек: бах-бах-бах равтыть Кильдяень кенкшс. Каятотсть цёрань верьга вайгельть, сёвномат. Минь, теке метьказнэть, чиинек седе малав. Кекшинек шабраст, Индялонь, кузтемпес. Эйкакшт, мезе эйстэнек саят... Вансынек, кузтемпе кенкшенть рестеезь панжизь. Тапицятне уцор-ацор совасть кудыкелев. Мезе тосо тейсть, эзь неяво. Марявсть сееремат, тандавтнемат. Апак лотксе банговтнесть кудо кенкшс. Бажасть, бешом, таргамс петлянек. Сеске теевсь општ. «Совасть...» — сынь мельс.
Учинек-учинек, мелесь мольсь. Арсекшнынек уш сралеме. Тесэ кудонть икелев пурнавсть ломанть. Малавикст, шабрат, ютыцят. Малав весе куринкась пурнавсь. Те минек кирдимизь кудова тукшномадо. Бути уш пурнавсть зняро покш ломанть, те а стяко. Учотано, мезе седе тов ули...
Учомс савсь аламо. Хро-оп! Бах! — каятотсь апак учо. Мерят, пурьгине ледсь. Вантано: кавто ёндо кирдезь, кавто бурина цёрат ливтизь кузтемпес Вишка Ламзурень. Вана мезе мон сестэ неекшнинь.
Седе мейле иетнеде ютасть аволь аламо. Пельпинге. Ламо мезе савсь неемс. Ансяк вана истямо апаро, ава лангсо истят нарьгамот, кодат неинь се чокшнестэнть, — эзь савкшно.
Весе те прок исяк ульнесь... Ламзурень мазыйстэ викшнезь покаезэ кутьмерьстэ саезь карксамо видьс сезезель. Кувака тусто черензэ почаксазельть, чамазо раздезель. Сонсь верь потсоль. Веревельть кедензэяк. Кепе. Минь, тейтернетне, стувтынек кекшнеманокак. Стинек пирявкскенть экшстэ ды пелезь ванынек эйстэнек овсе маласо нарьгамонть лангс. Те ней ламо мезес тонадовсь. Сестэ, пиже эйкакш шкастон, марявсь тень кие соды мезекскак. Рунгинем палозь палсь...
«Нехй азё ков мелеть! — каятотсь мельганзо. — Валске чикуншкава лиятнень марто туят васов!»
«Сюдоса эрьвань, кие сови эрямо монь кудос! Тоначисэяк илязо муе паро!» — серьгедсь Ламзурь верьга вайгельть. Сонсь, бувсо лайшезь, чиезь чийсь каршонзо аштицятнень юткс. Ломантне шалнозевсть. Кие-бути саизе Ламзурень эстензэ...
Валске чоподава сыргозтимим авань вайгелезэ. Пувтась тетянь эйсэ. «Пичай, седе курок стяк! — сеересь. — Азё варштыка, мезе Кильдяень лиссь!» Сонсь авам лиссь ушов. Мельганзо капшазевсь тетямгак.
[165] «Кильдяень...» — кивчкадсь превсэнь, ды ношкстынь мельгаст. Ушосонть экше. Кельме росась пицесь пильгесерькан. Варштынь — Кильдяень каршо килеенть ало ошокон ломанть. Седе ламо ават. Чиинь ульцянть тона чирев. Эцинь мезде-бути салава кортниця ломантнень юткова икелев. Эцинь-эцинь... лотказевинь. Неезденть таймазкадынь... Икелень, килеенть алце тарадсо, поводезь аштесь... Вишка Ламзурне. Потыксэлинь мекев, эзинь потаво. Повазенть полгаря, лангс лисезь, теке суликань сельмензэ вансть верев. Лангсонзо ульнесь кувака, кочкаряс токиця ашо паля, секс Ламзурь неявсь седе сэреекс, седе ёлганякс. Ванынь ды яла тень эзь кемеве...
Редимим авам. Кундымим пиледе ды панимим кудов.
Вана истя прядовсь модамасторонть лангсо пайстомо Ламзурень эрямозо.
Ёвтницясь конинзе сельмензэ ды зярсыя чатьмонсь. Мейле кепедизе прянзо.
— Я! Чаенек таго тунь кельмесь! Каладынь, лоткамот а содан.
— Саты, саты, Канява патяй. Сюконян. Ансяк вана «раужо кудонть» уцяскадонзо мезеяк эзить ёвта.
— Те уш, дугай, омбоце ёвтнема. Ушодозесь, кода кортнить, певтемекс а эрси. Прядса ёвтнемам, Видяз ялакскем, прядса, иля мелявто. — Ды таго чольдерьгадсь валонзо: — Теле лангс Кильдяень кудос совась од азор, Немоень Дрига кирькс эйкакшонзо марто. Пургазвелесэ весемеде арасьчисэ эриця. Эсензэ кудынезэ — шлямо кудынешка. Аволь кудо — сезьганонь пизэ... Кода тосо эрясть-пивтсть зняронест? Мезекс марявсь тенст Ламзурнень жой мери кудозо — сынсь содасть.
Немоень ве тейтерькаст марто ульнинек кирдажт. Чийнинек мартонзо ульцява. Ламоксть ульнинь, чарькодеви, кедьсэсткак. Ламзурь патядон мейле кудонть урядозо тень эзь содавкшно. Кияксось тенсть эзь некшне. Сынст тевесь... Лиядо арсян теть пачтямо... Иешкань ютазь лиссь ризкс — калмизь Дригань. Сэньстэ палыцядонть кикась. Мельганзо, зяро-бути ковдо мейле, — низэ. Мезде, кодамо ормадо, кияк паро ладсо эзь маря. Кодат сестэ, тонсь содат, доктортнэ ульнесть? Сёрмадыть «пекеде» — ды паро.
Ён кудось чавокс а кувать аштесь. Кучсть та-косто Пургазвелев вельхозонь прявтокс кодамо-бути «тысячник». Кудонть витнизе-петнизе, урядызе ды совась семиянзо марто эрямо. Руз. Фамилиязо пек мазый, секс [166] кирдевськак мельсэнь, — Жаровский. Войнань ушодовома шкас яла усксь вельхозонок коммунизмас. Усксь-усксь, эзь усково — куродызе орма. Тусь тоначив. Мезде, кода — веленть келес кияк эзь сода. Кие карми ёвтнеме резыця ёжодо? Низэ саинзе эйкакшонзо ды ёмась та-ков.
Велеванть тусть лытамо-азгондямо «келят». Васняяк сыре ломантнень юткова. Те, келя, аволь стяко колмоце семия врады. Мезе-бути анамазтнэ човорить-тапить. Ледстякшнызь Ламзурень сюдома валонзояк. «Келятне» весе вейкеть — яксить-теить ды лепиить.
Тесэ ушодовсь войнась. Чаво кортамотне айгезь айгевсть. Кияк эзь эря кудосонть. Вай, ды кода эзть эря! Еврейть, таркастост панезь еврейть зяро-бути эрясть. Те ульнесь войнанть омбоце иестэ. Лангсост, зярдояк а стувтови, шожда пальтынеть, сынсь вачочиденть берякадозь. Телешка эрясть. Вейкесь эйстэст Ламзурень кудос кулоськак. Кандолазтомо калмакшнызь. Паряк, коест истямо?
Войнанть прядовомадо мейле, зярдо пурнавкшность цёратне, кудонть витнизь-петнизь. Одс «вельмевтизь». Я! Овсе стувтокшныя: еврейтне, телень перть пенгевтеме эрязь, ламо мезе каштомс ёртнекшнесть. Киякс лазтнэньгак натой таргсекшнызь. Ламо тенст савсь майсевемс. Витнизь-петнизь, тагояк мерян, эрямо пизэнть, ды кармась эйсэнзэ эрямо сонсь колхозонь прявтось. «Сонсь» — истя тензэ мерильтькак. Эри ие, эри омбоце, колмоце... Весе веленть сорновтызе куля: Суняйть семиянек кулость. Тувталось вина мейсэль. Ушосонть цят якшамоль. Уштызь кудонть вадрясто. Валскес кельмемадонзо пелезь, качамо варянть пекстызь шкадо икеле. Те пачтинзеяк пес.
Вана истямо зыян вий те кудосонть... Велесэнек се калмамодонть мейле сонзэ малас кияк эзь сакшно. Ансяк шкась. Неик, мезе сон тейсь мартонзо, мезес пачтизе? Истямо сон. Эрьванть истямокс тейсы.
...Пургазвелес понгинь зярыя иень ютазь. Савсь ютамс се куронть кувалт, косо сельмезэнь каявкшнось нусманя ды ризкс ёжонь вельмевтиця «раужо кудось». Вастымим чаво, тикше потс ёмазь тарка. Марчось ды рукшна лопась эседеньгак сэрейть. Пряст невтнесть ды теке ракасть лангсон пиципалакстнэ. Седеяк сэрейкс ды мазыекс неявсь сыре килеесь. Вармань зэхельнесь кочксесь ланганзо нолдазь нурьгиця тарадонзо-черензэ. Ней кияк одтнэде а соды, кодамо апаро теевкшнесь сонзэ ало. Паряк, секс перьканзо ливтниця нармунтне а валгонить тарадонзо лангс?
[167] Эзинь нузялдо, ютынь седе малав ды эртевинь палозь мукорьс-тонолс. Чарькодия: те велестэнть туемадонок мейле «раужо кудонть» стардтнизе тоначинь тол.
Кие, кода, зярдо? Паряк, тень ёвтиевлизе тень Канява патям. Ансяк сонзэ таркас вастымизь лазнэсэ чавозь вальмат, пиципалакс потс ваиця кудыне. «Колмо иеть уш, — ёвтасть тень каршо шабранзо, — Канява патят тосо, косто мекев ки арась».