Янгамо (2006)/Ламбамо нартемкс/7
[79]
— 7 —
Ломанесь сизи — лотки, озы, мади оймсеме. А сатыть анак оймсе кувать ливтнемс вийнензэ озязнэнть. Пры. Кулы. Цянавось вана — мекевланг. Ливтни сон чоподасто чоподас. Маряви, а соды сиземаяк. Те а истя: сонзэяк илыкезэ аволь певтеме. Касы-касы — лотки [80] чинь налтнэнь мельга пансемеде рацяня килеесь, алганзо сырнесэ цивтёрдыця горниповось. А соды сизема, а лоткси, зярдояк а пупорькшни ансяк шкась: чуди ёлдорсо, лексемань апак полавтне, киньгак апак кунсоло. А мезть кунсоломскак, сон пилевтеме. Мезеяк а мари. Пилевтеме ды, теде башка, дюм сокор. Апак маря ды апак нее сонензэ весе вейкеть: ават-цёрат, сюпавт-кажовт, превейть-айшат, сэрейть-алкинеть...
Теке исяк ожосо копачазь чувтнэ вастневсть ансяк тия-тува, течи уш — штапот, ожо тюс оршамопелест усксевить Пильгест алга. Лопавтнить эйсэст сёксень пиземеть. Кенерсь, эзь саво учнемс, кельмевтемазояк. Арды кияк крандазсо валскень сэтьме шкава кшникс теевиця кинть ланга, маряви ки соды костояк. Гон-гон-гон... — каяты ве велень пестэ омбоцес. Лезды васолдо марямс коштоськак: экше, ванькс, тантей. Кудотнень икельга молицянть сеске а содасак: юты прянь кепедезь, покшкавтнезь, ёжонзо мари пародо парокс. Сыренть мельга одоськак а кенери.
Эрьмезьвелесь буесэнть аволь вишкинетнеде. Кудонзо сравтовсть тей-тов менчевиця Карда леенть кувалма. Видьстэ меремс, ансяк лемезэ лей. Аволь лей — лейне. Седеяк виде — чудикерькске. Чиреванзо нувара кальтнень, куракштнэнь, вармань шкасто каштордыця чейтнень потсто сеске а редясакак. Маней кизэстэ коськекшни допрок. Сестэ чудильмаванзо мик лисьминеть чувныть. Лей — а лей, ялатеке симди перьканзо чувтнэнь, сатны ведезэ чиреванзо ойсевтезь эмежтнененьгак.
Вить ёнга — зярыя вайгельпень кувалмосо куринка, керш ёнгаяк истямо жо. Сынст трокс юты — веленть кавтов яви — покш ки. Рузвелев. Секскак лововить велесэнть ниле куринкат — Пичепе, Алопе, Понкспе ды Покш куринка. Эрьва песэнть сядодо ламо кудот. Эрьвасо сисемшка эрицят. Ловт, зяро лисить Эрьмезьвелень эрицянзо. Урьват, пенерьват, парыят, альнеть, ававтт, покштят, киялт... Пурнави цёрань-авань эйбаро ушмо. Ловить азё, варчик!
Сёксень те шкась — урьвань сайнемань шка. Паксянь тевтне удалот, скалтнэ-реветне кардазгат, утомтне-лартне пешксеть ули-пародо. Ули мейсэ каванямс одирьвань вешницятнень, урьвалятнень, урендейтнень, кашадо ярсыцятнень ды лиятнень, кить тердевить тейтеренть ды цёранть ёндо.
Тень кувалмаяк те шкась ён: кельмевтекшни допрок; пелемс — илязо чиния сывелеть — а эряви. Секс эрьва кудось мезеяк ды печки: реве, туво, ваз. [81] Венельксэсь, содазь, полавтневи. Лиясто кельмевтемадо а арсияк, эрси кумажава рудаз. Сестэ уш кирдть: коцькеряк, ливтть кудостот-кудыкельдеть рудазонть!
Иестэ иес Эрьмезьвелесь те шкастонть моли бизныця мекшвеле ёнов — жойнезь жойни чиявтомань моротнеде. То ве песь вий саи, изни кенярксонь ды нусманячинь моросонзо, то омбоцесь. Лиясто вейсэ, велувсо сорновтнить вайгельсэст менеленть. Велесь покш, сыретнень полавтыцятнеде ламо, мекс а шалномс урьвань саемань шалномасо, мекс а морсемс.
Моры-урни Эрьмезьвелесь тедедеяк. Истя жо кирнявтни кенярксонь ёжось кудосто кудос, куринкасто куринкас. Шкань-шкань сезни сонзэ урниця тейтерень лужаня, седейс авториця вайгель. Эрси лиякскак. Эрямонть а совавтсак ажия юткс, а кармавтсак молеме ков эряви. Ве кудостонть, эрси, кайсетить моронь вайгельть, омбоцестэнть — охордомат, лайшемат, тюремат.
Истямо апаро лиссь тедедеяк.
Колызе моронь жойтенть сельмень сявадомась.
Те ормасонть сэредпть ламот. Веенстнэ — сонзэ апак маря, омбонстнэ — стенава куземас пачколить. Сынь содыть вейке: мекс сонзэ ули, монь — арась? Прок сукс поти истямонть потсо. Сестэ мезе, кода улемс? А мезть кевкстнемс: саема! Саема, кие кода машты: валсо, мокшнасо, рицягасо, толкельсэ... Муевиндеряй теде башка ломань, кона невтьсы вачо сельмтненень саемань-саламонь кинть, учок раужо тевть. Ваномо мезе лангскак а кармить, верь валови аволь аламо.
Муевсь истямось.
Каясь «сэредицятнень» превс-оймес оргат, ды те апаро ёжось сыргась якамо весе вийсэнзэ. Нельгть, нельгть, нельгть — кирдсть кой-кить мельсэст. Те меленть теизь Пазокс ды топавтсть раужо тевест Сонзэ пельде. «Сайть», «нельгть», «амзордак» валтнэ чачсть, паряк, ломаненть чачомадо икеле. Сынст тевс нолдтнесть аволь ансяк пандтнезь понкссо якицятне, седеяк стакасто «сэредсть» амзордамонь кирдадонть сюпавтне, пештявомань асодыцятне. Ваканшка сельмест — покш толонь кирвазтицят.
Часонь маятник ладсо: тей-тов, тей-тов... Васня сюпавтне ваткить, зяро ваткави, сокийтнень эйстэ улить-парот, мейле, мекевланг, — снартнить велявтомс пельдест саезенть сокийтне. Седе сеедьстэ изнякшныть ярмаков зептне. Свал истя ульнесь, Тюштянь пингстэ саезь неень шкас: виесь ярмактнесэ.
Ней виесь «алцетнень» кедьсэль. Прявтост перька [82] пурнавсть тевде пелицятне, нузякстнэ, кинь сельмест сявалесть лиятнень эрьмест лангс. Вейсэ кундасть «видечинть» путомо, аравтызь: Эрьмезьвелестэ сокардамс «кулаконь» кемень пизэть, улист-парост, содазь, саемс. «Од пазнэнь» озныцятне — велень «активистнэ» — кундасть тевентень псистэ. Колмо юртт уш тапасть. Ульнесть велесэнть мельвановикс ломанть, парсте эрицят, кадовсть эйстэдест ледстнемакс поркснезь вальма кудост. Ульнесть — арасть. Часонь маятникекс: тей-тов, тей-тов... Мезе кармить тееме урозокс кадовозь эрямо таркатнень марто, содасть ансяк пансицятнень прявтост. Веенст ютыцятне вансть лангозост седейризкс марто, лиятне — кецнезь: умок, умок уш эрявольть почаксамс кендялонь таркатнень, потясть верденть.
Вана мекс ливтнесть веленть велькска сюмордомань ды кенярксонь вайгельть, вана мекс веенстнэнь сельмсэ кувтолдсь кенярксчи, лиятнень сельмест эзть коськене сельведтнеде. Секс чиявтомань моротнеяк икеле ладсо эзть жойне, ды велесь неявсь-марявсь мейсэ-бути сэредицякс.
Пиргужонь юртсо сюронь рамсицянть, Паксютычень, туемадо мейле «кулактнеде» кортамотнес велявтнесть а весть. Та-кода чинь-кавтонь ютазь, чинь-чоп эвтемадо мейле, толонь апак вельмевте, таго ушодсть текеде.
— Эрявить, васняяк, скалтнэнь ковгак ильтямс, — каятотсь чоподасонть Вирязонь чевте вайгелезэ. Сон аштесь озадо эземпесэ, оймсесь.
— Те кода истя — «ковгак ильтямс»? Кода? — штатолнэкс кирвазсь стуворонть тона песэ аштиця Элюва.
— Самай истя. Вейкень эряви печкемс. Валске чоподава. Сывеленть ливтемс базаров. Омбоцентькак эряволь, ды а миеви сеске. Омбоценть... киненьгак максома. Вадря ули, ветиндеряса теке жо вестэнть... тейтерем туртов, — меельце кавто валтнэнь Виряз ёвтынзе лип чатьмонемадо мейле.
— Мезе-мезе? Тейтереть туртов? Вантака, вантака, тейтеренстэнь! Эли тон урмазкадыть? Тейтеренстэнь — скал... — допрок нолдынзе ведьмензэ, лаказевсь азоравась, стясь ды сонськак эзь сода мекс юрк ютась каштом икелев.
— Вадря. Кинень лиянень? Ёвтык. Омбо велесэ ули тонь кияк? Паксютыч? Сонензэ тонстеметькак цяк сась. Пулонзо те шкас эзизе шля? Рамиця, паряк, муят? Пароль... Тагояк омбо велень, — сэтьместэ, Элювань ацирьгалеманзо апак редя, арсезь ветясь тевенть атясь.
— Тон марят, мезть кортат? Учок, стувттадызь. Текеде арситькак. Сюронтькак эряви ковгак теемс. Ваи, кодамо ильведькс сестэ нолдынек — эзинек максо Паксютычнень. Тон сестэ иердекшнить. Вейкеде ней пря а сэредевель. Ярмакткак зяро а зяро улевельть. Сынст марто, эйкакшоськак соды, косояк а ёмат. Ней вана... Зярояк пурнавить?
Элюва чатьмонсь. Нежедизе конянзо стуворонть пес путозь кедьсэнзэ ды мельде-валдо, сизезь кунсолось Вирязонь превс путоманзо.
— Трёшникть... — теке удомань пачка перьгавтызе кельпрястонзо валонть.
— Мон вана мезе меревлинь. Сельгемс кудотнень-читнень лангс ды... цёратень. Азё вешнек, кона ёнов ношкстась вармась, — састыне, мездеяк берянде апак арсе мерсь Виряз ды путызе кедензэ нинть лавтов лангс.
Элюва, теке мезеяк пупизе, тоцк стясь, арась атянзо каршо ды пиксезевсь кежтнеде — ёвтазенть ловизе покордамокс.
— Вай, вай, мезть лаборды! Кадомс улим-паром?! Те кода истя? Пинге пурнынь-майсевинь — ней кадомс? Ковгак а туян. Тесэ мон чачинь, тезэнь кулангак. Кадомс истямо кудо, кардаз ракшат, пиреть-тингть... Ловинь тонь седе превеекс, тон жо — кадыть кудот-чить. Те тонеть мезеяк а эряви, тонеть ялатеке. Тон сынст эзить ташта.
— Оймак. Иля сувтне валтнэсэ. Каня а чарькодят, мезе учи тонь, минек: лавтовот трокс кескав ды чийть лембе кудостот куш ков! Секень вант, «куш ковонтькак» ёртык прястот. Ков — ёвтасызь «активистнэ». Цёрать кедьсэ, кеман, седе берянь а ули.
— Чарькодян, — аламодо матрась Элювань псизэ, — пек чарькодян. Аволь айшан. Ансяк превс а саеви — лисемс эсеть кудосто, лисемс чавонь кедть. Теяк: цёрать туртовгак штапо мукоро а молят. А содан, а содан мезе теемскак. Велязь велить превень...
— Оймак, бриндат илить нолда. Вандыде мейле таргочи. Юртаень кодамо ёжозо, эзик нее? Ветешка чить уш эзинек тердтне. Муса. Скалонть печкема. Сеске жо базаров. Ансяк аволимизь кунда, — кавтолдозевсь Виряз, видемтизе рунгонзо, путынзе кедензэ кумажа лангс. — Оймить? Озак, мезть икелень аштят.
Элюва кувакасто таргизе оймензэ, новольсь атянзо ваксс.
— Тон теке эйкакш. Текень лият: кадсамизь, кадсамизь. Колмо пизэть уш велестэнть нардасть. Лувсост мезе-бути каладсь — энгамсть, кадымизь зярс. Учок, тевест поладсызь, — кортась Виряз, сонсь арсесь чинев чеядавксстонть лисемадо. — Омбоценть куш течи саевлия тейтерем туртов.
— Арась, арась, теде иля арсеяк, — кирдсь эсь ёнксонть Элюва. Эзть сато виензэ мендямс, кармавтомс эсь прянть арсемс ды теемс лиякс.
— Лишметнень марто мезе теемс, арсить? — таго савсь токамс Элювань Сэредькс тарканзо. — Сынст марто седеяк стака карми. Лишметнень васенцекс вейс пурныть. Кода улемс? Эряви тарка вешнемс. Миемат. Лия велев. Теске арсемскак а мезть — мусамизь.
— Истят лишметь! Зяро вий, зяро мель путозь эйзэст! Ней на, максыть кинень-бути. Мезень кис?! Ледстика Тештинесэ базаров вейсэ якамонок, — васня эль а сельведень пачк, мейле седе чевтемгадозь поладызе кортамонть Элюва. — Чизэ лембель, манеель. Мезде-бути арсесь менелесь. Мельсэть Сэняж чирес симеме лотксеманок?
— Мельсэнь, мельсэнь... Колмо ковткак эзть юта. Сэняж лейстэ симдия лишменть, тон кайсить тень лагуннэстэнть... — Вирязоньгак токизь гай мазый се чиденть ледстнематне. — Мезе, ков теемс Вармань ды Тештинень? Ужо. Эрьга васня скалтнэнь таркава-эземга, кода кортыть, ладсесынек. Тосо вансынек...
Тевенть шожда теемс кельсэ. Кундат эйзэнзэ — чарькодьсак, кодамо келей юткось валонть ды тевенть ютксо. Келей стакачисэ ды шкасо.
Ашолгадозь Виряз атя ютась Юртайнень. Меремс, совась кудозонзо — а виде. Кудо ёнов а моли. Эрямо тарка. Тенстте а мезть ледстнемскак — сон тей эзь совсе. Стуворонть лангсо резинань ташто кем, пилевтеме шапка, вакан. Стенатнева, вальматнева понгавтнезь шанжань коцт. Зяроцеде атясь а сы Урайнень, свал абунгады азортомочинтень.
Юртай апак кайсе, пилысэнзэ ташто, ламоксть пандтнезь кедень кемть. Прянзо ало, тодовонь таркас, мейсэ-бути эцезь кескав. Удось кирьмицязь вить боканзо лангсо. Копачазь шуба нуласо, конасо малавгак эзть вельтяво рудазов кемсэ пильгензэ. Кудосонть якшамо.
«Пайстомо ломань, — арсезевсь Виряз тень неезь, — [85] мон яла пеняцян, монень берянь, монь эзь лисе эрямом... Кода сестэ сонзэ, те ломаненть? А ни, а эйкакшт, а авань ёжо... Ярсамскак — косто понги. Печкемеяк нулгодян тердемс».
— Юртай, а Юртай, стяк! Кортамо мартот сынь. Стяк! — серьгедсь Виряз. — Марят-арась?
— А? Мезе? — соракадсь удыцясь, нолдынзе пильгензэ коникстэнть, озась. Ёзынзе сельмензэ ды кортазевсь чарькодевиксстэ: — Мезе, Виряз леляй? Мезекс эряван?
— Тевесь оно мейсэ: скалонок седе курокке печкема. Текень кувалма якангак.
— Ну мезе, молян.
— Сак шкань апак таргсе. Мон молян зярс пикст-мезть анокстан. Кортынек эно, — мерсь Виряз ды эскельдясь кенкшенть ёнов.
«Нулгодян эйстэнзэ. Ансяк кинь лиянь саят, — кашкасть прясонть превтне, — эрьвань тевть, мелявкст, Юртай вана нетнень а содасынзе. Лиятне питнеяк пельдеть судодить, Элювань ёжонзо коласызь. Те... Ансяк орма кодамояк якстере парго прясь илязо педявто. Вана мезде пелема. Кедензэ шлявтомат. Пси ведьсэ ды сапоньсэ».
...Лиссь арсезенть коряс. Таргочистэ Виряз ускизе сывеленть базаров. Кочкурвелесь покш, ломанть ламо, муевсть рамицяткак. Кадык аволь питнейстэ, нолдазь-потазь, пёлькстнезь-пеедькшнезь, товаронзо миизе. Кодат «эчке» питнеть, седе курок ильтямс!
Элюва, лембестэ оршнезь — якстерть-тюжа шубасо, лембе пацясо, понань кемсэ, — учось мирдензэ вальмало. Лиссь уш колмоцеде. Шкань-шкань варштни кинть ёнов: Тештине прянзо эзизе невте?
Окойники рединзе ардыцятнень.
Келес панжизе крандаз кенкшенть.
Виряз чатьмонезь совась кардазс. Крандаз петькелезэ эль-эль токавсь палманентень.
«Апарс», — эськанзо тешкстызе азоравась.
— Берянь кулят? — пшкадсь Виряз лишменть лоткавтомсто. Чарькодсь: мезе-бути теевсь, истя, натой вальмало, низэ-ялгазо зярдояк эзизе вастне.
— Колмоцеде уш лисян, учан.
— Неян. Мезе лиссь?
— Чинь куншкава ютась вальмалганок Алькань Тумаш. Содасак? Ну те, кода... Некшник сонзэ. Эртевинь эйзэнзэ ведьс лисемстэ. Якась, ёвтызе, Сеськевелев. Тосто, валонзо коряс, ютазь вестэ пансть та-кодамо [86] Казахстанов кавто семият. Келя, курок пачкодить Эрьмезьвелевгак. Мезе теемс, ков чиемс?! — талнозь кортась Элюва, зярс Виряз котьмась лишменть вакссо.
— «Келявтомояк» содави, кона ёнов онкстнэ чиремить. Умок эряволь тенень анокстамс. Тон яла... шканть таргсить, — мерсь поланстэнь лишменть кардс совавтомсто. — Кельмить, неян, азё кудос.
Виряз пурнынзе-понгавтнинзе сивекстнэнь-ведьметнень ды совась кудос.
— Э-э-э... — прась кельпрястонзо, зярдо маризе кудонь лембенть ды каштомсто качадыця сывель ямонь чиненть. — Ушосонть якшамось судос автори...
Лембентень кецницясь понгавтызе тулос нурька шубанзо ды сакалонзо кавшакавтнезь-вадяшазь ютась икелев.
— Эрь, кирдть! — таргась понкс зепстэнзэ ды венстсь Элюванень ярмак кувта.
— Зяро? — кевкстизе Элюва. Сон аштесь столенть вакссо апак кайсе, учось, бешом, мирдензэ совамонть.
— Зяро улить — весе тонь, — мельспаросо, натой пеедькшнезь кецневтизе полазо. — Киштть — миевсь, теяк паро. Тон мекс а кайсят?
— Собой, — укстась Элюва ды каинзе оршамонзо каштланго чирес. Ютась каштом икелев. Таргась сывель ям, ловсос керсезь модарькат. Чинеденть Вирязонь судоварянзо кутьказевсть, сон мельспаросо озась стувор экшс.
— Мон арсян течи веть ильтямо омбоце сюракшонтькак, — пси ямдонть корштнезь, кортазевсь Виряз. — Паряк, тейтерем муи рамиця эли сонсь зяродояк сайсы. Тон арсят, азарсь тевесь моли ансяк тесэ? Маняват. Масторонть келес. Секскак базарось сывельденть пешксель. А ков теемс. Те уш та-кода монь лиссь истя валанясто.
Виряз Сайне леде, тейтердензэ ледстямсто учось Элювань пельде толпандя. Тона мыркак эзь мере.
— Сыргак. Паряк, теяк ковгак тонгови, — эзь снартнеяк пелькстамо. Алькань Тумашонь кургсто марязь кулясь рипакавтызе седеяк.
...Дюм вень куншкат Виряз кильдизе Тештинень, сюлмизе пирестэ ливтезь скалонть крандаз удалов, путсь эсензэ алов озамо таркакс тикше, ды «караванось» каштмолезь лиссь кардазстонть.
Седеяк якшавтсь. Тештне пупсесть пшти, липниця кежей налсост лангозост эрьва варштыцянть. Ковось, прок нарвицька, мелявтозь ваннось тештнень-цилакатнень мельга, бажась пурнамс сынст эсь перьканзо.
[87] Коштось ванькс ды кельме. Валось ёвтамстонзо гайгезеви човине суликинень гайтьсэ. Якшамось автори мик судос. Паро куш лембестэ оршнезь «караванонь» прявтось: шапка, шуба, понань кемть. Телекс. Эзь стувто тонгомс варьгаткак. Шождасто оршнезь какарьгадовлить.
Веленть ютызе аволь кудотнень юткова киванть. Тинге удалга. Кияк апак учо илязо вастово. Мезекс невтнемс пря? Нетядызь — сеске пачтить ков эряви. Берянь обуцясь — кандтнемс кулят «верев», ды мезеяк а теят, ней истятнэде Эрьмезьвелесэ сатыть. Зярыя пингень перть тонавтызь ломантнень вейкест-вейкест лангс невтнеме.
Сайнелев пачкодсь ашолгадомадо икеле. Юткось аволь покш — вете вайгельпеть. Чачома веле. Тия, веленть перька паксятнева-лугатнева, чийнесь Виряз атянь кепе-штапо пиже эйкакш пингезэ: тесэ, неть ёнкстнэсэ, — куломазонзо а стувтови — тундонь тештев вене кунсолокшнось вечкевиксэнзэ марто цёковонь морот. Куш варштамс, аламошкас панжомс ды совамс се эрямонтень. Арась, эрямось мекев эскелькст а соды. Аволь ансяк неть нурькине, мазый, астувтовиця шкатне ютасть тесэ. Те веленть марто сюлмавозь весе пингезэ, Ансяк сисемшка иеть, кода юв-яв давол вармась автордызе нучк ды салызе лия ёнксов, кадовтызе вечкема велестэнзэ. Вай, авакай-тирякай! Ушодындерят ледстнеме...
Вирязонь покш тейтерезэ, Валдоня, умок кандтни лия кудолем. Ней сон аволь Дораень — Вардонь Валдоня. Виряз атя кирдсь Вардотнеде мельспаро, «Кежей» кудолементь лангс апак вано, буесь сынст истямокс арасель, тюремат-сёвномат кудосост эзть лисне.
Вень инжесь локшо недьсэ весть-кавксть канкадсь вальма чирес. Аламос аштезь марявсь каштордома, эскельксэнь гайть. Панжовсь ушов лиснема кенкшесь, ды лиссь Учай содамозо. Сэрей, виде рунго цёра.
— Те тон, тети? Я! Косто истя вень чоподава? — абунгадозь кевкстизе ватанзо.
— Ужо, Учай, иля капша. Васня эрь «пулом» совавтсынек кардазс. Кудосо кортнесынек, кода-мезе.
Истя тейстькак.
Валдонянь эйкакштнэ лушсо удость кие-косо.
Аваст уцор-ацор валгсь каштлангсто ды седе курок вельмевтсь тол.
— Инешкипаз, тети, тон косто истя валскень чоподава? Кодамо апаро стардынзеть? — талнозь, эль марявиксстэ пшкадсь Валдоня.
Совась Учай.
— Адядо каштом икелев. Тосо кортасынек, — мерсь сон ды эскельдясь тов васенцекс.
Виряз атя нурькинестэ ёвтнизе, мейсэ тевесь, кодамо анамаз яки велетнева.
— Тесэяк истя? Тесэяк кой-кие лангс пейть човсить? — прядызе ёвтнеманзо кевкстемасо.
— Теке, тетяй, мазычись. Тесэяк орькс кискакс кайсевить пильге лангсо аштицятнень лангс, — пачтясь ватанстэнь Учай. — Муевсть та-кодат «активистт-коммунистт»...
— Кода ней улемс скалонть марто? Тынсенк кодамо? Зяроксть вазыякшнось? — пшкадсь тетяст ды варштась тейтерензэ сельмс.
— Мезе меремс, сялдомс а савкшны. Оно зяро кургт анды, — мерсь Валдоня, каштлангсо-косо удыця эйкакштнэнь пелев ахолдазь.
— Бути миемс? Рамиця муеви велесэнть?
— Велесь покш, — каясь вал Учай. Сон аштесь стядо каштом кургонть каршо. — Минек куринкасо, содан, рамсицядо эзь марсеве. Валдоня, тон а содат?
— Чинь-чоп пивтян кудосо. Эзинь марсе. Микшницятнеде седе ламо.
Тетят-тейтерть аштесть озадо вишка эземсэ. Велькссэст типельдсь вальма кундос чавозь эекс понгавтозь лампине, кона сундерьксэнь валдосо валдомтсь каштом икельксэнть ды кортницятнень.
— Берянь аволь уле Эстенекак саемс, — валтнэнь таргсезь ёвтызе мелензэ Учай. — Ансяк ярмакт косто муемс?..
— Тикшенекак анокстазь, мерян, ве пряс, — поладынзе поланзо валтнэнь низэ. — Улевельгак кизэ...
— Истяяк мереват, — каясь вал Учай, — шкатне вельть сумборят. Кавто скал марто, секень вант, «кулакокс» совавттадызь. Вана мезде пелема.
— Теяк виде, цёрам, — прась Виряз содамонзо марто ве мельс. — Эно кода ней тенек улемс? Кода арсетядо?
Теевсь каштмолема.
— Паряк, печкемс саемс? — васенцекс кортазевсь Валдоня.
— Теде монгак арсинь, — поладызе Учай. — Кажось вейке: ярмактне апак нарва.
— Алкуксонь питнеденть колмоце пельксэсь кодаяк а пурнави? — кевкстезь ёвтызе питненть тетяст.
— Монь койсэ, колмоце пельксэнть кодаяк уш изнясынек, — истя жо мизолдозь мерсь Учай.
— Нейке?
— Мутано.
— Ну и паро. Тосо вансынк: печкемс эли кадомс полавксокс. Скалось а берянь, вазыякшнось нилексть. Сак, ансяк седе курок, кавтошка эли хоть колмошка улавт тикшеяк максан. Ков сонзэ? — пе путсь кортамонтень Виряз атя.
Пакшань керьксэсь кармась сыргоземе.
Вальмаванть варштась зярс аволь виев валдось. Валдоня пувазь мадстизе лампиненть, ды колмонест ютасть икелев.
Виряз озась стувор экшс, вальманть ваксс.
Васенцекс редизе ды мольсь малазонзо Кизай, покшось, мельганзо — Костюш... Покштяст таргась кансткестэнзэ ламбаськайть ды жомкат, пряникть. Эрьванень венстсь зярыянь-зярыя. Мельспародонть вишкинетне чольдердезевсть горниповнекс. Эйстэст веженсесь кузсь покштянзо элес ды лекшкадсь мештезэнзэ.
Вирязонь эль кирдевсть сельведензэ. «Чаула пря, мезе тон теить сыречисэть?! Вант, кодат чольдерькайть касыть тонстеметь! Чуросто-чуросто некшнесыть...» — эвтсть прясонзо нусманя арсематне, седеензэ пештизе янксемань ёжо.
Зярс Виряз кортнесь, налксесь «тарадкензэ» марто, Валдоня кенерсь уштомо каштомонть ды панеме пачалксеть. Совась кардазсто содамозо. Озасть ярсамо. Пурнавсь сырень, одонь ды овсе вишкине цёрань стувор. Аволь домка ваканс лангсек-лангсек путнезь пачалксень «пандынесь» алкиньгадсь сельме икеле. Валдоня эзь кенере псисэ лексиця пачанятнень кандтнеме.
Чамсь ваканось, ды чамдыцянзо, мельспародонть ветердезь, калдор-калдор стясть стуворонть экшстэ. Виряз атядо башка.
Допрок ашолгадсь. Учай ды Кизай лиссть кудонь-кардазонь тевтнень тееме, вишкинетне верендясть эсь тевезэст — рожодомсть налксеме.
Валдоня кандсь ваканнэсэ пси, кансёройденть цитниця зяро-бути пачалксеть, сявордынзе ваканонтень ды озась тетянзо каршо — каямс кургозонзо, мезе Пазось макссь.
— Кода ават? Яла сэреди? — аламнеде виздезь, [90] седейсэнзэ апаронть лепштязь, тошказь ладсо пшкадсь Виряз тейтеренстэнь.
— Мезе меремс, шумбрачисэнзэ пря шнамс а савкшны. Такшарды аламонь-аламонь, — эсь мелензэ каршо — тетянзо чумокс ловомадонть — ёвтынзе валонзо Валдоня.
— Яла кеж кирди лангозон? Ёвтак, вастоват, — чуман. Чуман явомасонок зняро, зяро сон. Сонськак пек илязо пезэрде, илязо эрдекста.
— Угу. Кода тонсь, тети?
— Тонсь неят. Икелеть. Эрян. Эрян тосо, седеем — тынк марто. Улкоть апаро он неинь — Лияна цяк эзь вая... Кодат тевензэ? Тонеть, кадык чуросто, пачколян, сонензэ вана... Пакшанзо покштясткак а содасызь. У-ху-ху... Мирдесь сонзэ Оржаень Тикшаень? Юртось а берянель. Тикшай эзь куло? Ават ськамонзо кудосонть? — яла кевкстнесь малавикстэнзэ Виряз, аноколь нейке ливтямс икелень эрямонтень. Маряви, тейть эскелькс ды улят тосо. Арась, теке леентень, кода кортыть, одс а совават. Эрямосонть весемесь максови ансяк весть: чачомс, чийнемс эйкакш пингеть, урьвакстомс, куломс. Конантеньгак эйстэст мекев а чопавтят.
— Лияна ды Вертян эрить мелень ванозь. Берянде эзинь марсе. Якан тенст. Лияна колмоцесэ. Авам эри ськамонзо. Сеедьстэ сакшны миненек. Седе ламо эри Лиянань кедьсэ. Вана истя, тетяй.
— Мезе, сырган? — стясь стуворонть экшстэ ды лиссь Валдонянь тетязо пурнамо-сэрнямо. — Маритинь — седеем витевсь, канстом прок седе шождалгадсь. Седе сеедьстэ эряволь вастневемс, ансяк... кавтов явовомась — стака.
Тетят-тейтерть оршнесть-тейсть ды лиссть ушов. Учай кенерсь менстемс крандазстонть скалонть, каямс тензэ тикше. Тона порнесь, кие лангскак апак вано, теке азорозояк эзь полавтово.
— Скалось покш. Алкуксонь лато. Одарозояк, неяви, эйбаро, — шнызе скалонть Учай. — Я, тон мекс ведравтомо лисить? Потявтык. Нолдатанзат-арась?
Валдоня вал эзь правто, тусь ведра мельга.
— Кирдевельгак тенк, нежекс улевель а берянь. Паряк, сонзэ кувалма «кулакокс» а тейтядызь. Кудонк вельтязь олгсо, аволь икельть-удалт, лишменк вейке, эйкакшонк... Теде эно иля ледстнеяк, кие сынст лангс ваны! Вант, бути мезе, печкинк.
Учай мурдавтызе ватанзо кильдезь лишменть ушо ёнов. Атясь кузсь ридванозонзо, озась каязь тикшенть лангс ды саинзе венстезь ведьметнень.
Ильтицятне вансть мельганзо. Эйкакштнэ — вейкесь эйстэст, Кизай, малав тетянзо сэрьсэ — ахолясть кедьсэст.
Виряз меельцеде варштась лангозост, ципадизе ведьметнесэ Тештинень ды цярнозь тусь ардозь. Пси сельведтне кеверсть чамаумарьганзо. «Савить-арась одс неемс? Зярдо? Эрямосонть эрьва мезть эрсить».
...Эзь кенере чипаесь невтеме прянзо олгсо копачазь латотнень удалдо, Виряз уш кудосоль.
— Ну кода? — васняяк кевкстизе Элюва полань кондямонзо, кона эль кенерсь эскельдямо тарчксонть трокс.
— Велявтынь скалтомо. Ловсосо пулькамось прядовсь. Микшнемат прядовсть, ней — тонсь рамсек. Кода кармат эрямо скалтомо, ловсонь пеке, а чарькодеви, превс а саеви.
— Вантака... Те тон мезе, нарьгат лангсон? — токавсь аванть томбавозь ойминезэ.
— Нолдык чумом, кельпрястон прась, манявинь, — чарькодизе атясь — а се валось ёвтавсь.
— Ков ильтик Сюракшонь?
— Тейтерем туртов... Ков сыргсинь.
— Лиядо эзинь арсеяк, теке ведьс ванынь, — кежтнень кирдезь тешкстызе Элюва.
— Эрь, кирдть, — максынзе вейс тапардазь ярмактнень; ёвтызе, зяро целковойть, мекс аламо. — Мезе маряви тесэ, велесэнть?
Виряз арсесь, «седейпельксэзэ» ушоды моравтомо аламо ярмаконь ускомадонть. Амарсевикс тев: ловномосткак эзь карма, безардезь ёртынзе, прок нардтнема нула, ужосо пазаватнень икелев.
— Кевкстнят, теке мерят тарго араселить. Мезе лиси веньперть? Валскестэнтькак кияк эзь совсе.
— Веньперть... Ней ветькак вант ды вант. Пачколинь Сайнелев. Тосояк теке мазызэ.
— Мезе моли, арсян, Инешкипазоськак а соды. Содавольгак, истят тюньголькс тевть аволь сравтне, — нусманясто, мезескак ды мезе лангскак апак кеме, скирдызе Элюва Пазонтькак.
«Мендявсь авась! Кодамо вий, оймень ды рунгонь кодамо вий эйсэнзэль! — арсезевсь кунсолыцязо. — Кода а мендявомс, зярдо нельгезь нельгить кедьстэть ведьгемень иеде ламонь перть таштазенть? Кода а рангомс истямо сэредькстэнть? Сокамот, видемат, [92] пивсэмат, потявтомат, кудонь путома... чистэ чис, иестэ иес сядот тевть тейсть аволь сэрей-келей авань сонзэ кедтне. Мезень кис ней эрямс? Паз, паз... Кодамо Паз? Аволь Паз, сонсь Идемевсесь вети-яксевти тевтнень модамасторонть лангсо, сон томби-човори эсь човарсонзо паронть беряненть марто...»
— Ильведькс, Элюва, монень маряви, теинек, — Колызе Виряз каштмолеманть. — Эрявсь васня сюронть тия-тува шикиемс. Ней, видеяк, а мезть лырномс, мезе теевсь — теевсь. Вана кода ильведьксэнть витема: вачкамат кавто улавт — эрьвас кавксо кескавт товсюро — ды ютама кодамояк велева. Кеман, сайсызь. Сырезьвелесь аволь васоло, сисем вайгельпетькак арасть. Васняяк тов эрявить ажиятнень аравтомс. Кода тень лангс ванат?
— Кода ванан... а содан мезе теемскак. Эряволь...
— Чикуншкадо икеле лисевтяно? — пшкадсь Виряз.
— Кескавтне анокт, мекс а лисевтяно, — кемевтизе низэ. — Оршнян ды лисян лездамо. Тон апак удо... Валдоня куш андынзеть?
— Пекем эзь вачо. Ве вень апак удо а врадан.
— Кильдть сестэ азё, мон зярс пурнан-сэрнян, — кода икеле, кармавтыця, кавтолдомань асодыця вайгельсэ ёвтызе мелензэ авась ды кундась оршнеме.
Сырезьвелень кондят велеть вастневить чуросто. Эйзэнзэ стенакс нежеди пиче вирь. Те вирентень совиця Чувар лейненть кувалт, ёзнэкс менчевезь, таргавсь зярыя вайгельпень кувалмосо вейке ульцязо-куринказо. Кавтов сонзэ кери шабра велев ды седе тов чииця-молиця кись, Покшкавтнемачист тесэнь эрицятнень, васняяк, чарькодеви, виресь. Сон нолажты сэрей пандонть чирева видьстэ леентень.
— Сюро, сю-ро-о! — рангстась Виряз, ансяк совасть велентень. — Кинень сюро-о-о?!.
Сеересь ды кескавтнень лангсо озадо аштезь ванкшнось кавто ёнга: лиси-арась кияк рамамо? Ниле-вете кудонь ютазь таго рангсты:
— Сюро, сю-ро-о!..
Удалце улавось чатьмони. Эряволь сееремс кавто вайгельсэ, седе марявлизь, ансяк Элювань арасель мелезэ. Аволь нузялдсь. Мезе истямо нузялдомась, сон эзь сода. Таго кундась эйзэнзэ седейризкс, «ялатекень» ёжо. Ютасть байтяк. Окойники лазсо вельтязь вить ёно кудостонть каршост лиссть мельде-валдо оршазь цёра ды ава.
— Товсюро, од цёрка, товсюро, — валаня вайгельсэ, кода алкуксонь микшниця, содавтызе Виряз, — тедедень, ванькс, коське. Почт эйстэнзэ лисить — келеть нильсак. Прякат, сюкорот, мезе мелеть панть!
— Эрьга, атя, вансынек, — сайсь мель «цыганось».
— Ванодо, ванодо, — Виряз эрязасто юксизе васенце, кодамо понгсь, кескавонть, — эрьгела, ванькс, а сюват, а мезть. Самай яжавтомс. Тынсь несынк, валт а эрявить. Ожолды, теке сырнестэ валозь. Саеде, саеде, янксеме а карматадо.
Раужо пря цёрась нерьгстызе, ков нерьгстави, кедензэ кескавонтень, таргась коморо товт, кепедизе кедензэ муюков судонзо алов ды кувакасто Кавксть-колмоксть никстясь. Сайсь зярыя пей алов. Меельцекс мекс-бути кепедизе прянзо верев ды чувтомсь.
— Саян, — прок кев, прась кургстонзо валось, — вете.
Сеске вете кескавтне «кирнявтсть» крандазстонть кинть чирес.
Элюва кадызе улавонзо. Ютась рамсицятнень юткс атянстэнь лездамо.
Састь омбо ёно кудотнестэяк.
— Зяродо, зяродо? — кайсететсь эрьва ёндо, эрьвась бажась варштамс микшневикс сюронть лангс.
Сялдыцят арасельть. Питнеськак эзь сусконе. Дока авась Элюва. Кескавтнень пештинзе вейкетьстэ — эрьвантень кайсесь колмо пондт. Кодаткак онкст а эрявить. Шка а мезть ютавтнемс. А ёвтавияк, кода маштовсь пондонь-пондонь кайсевтема мелесь.
— Монень кавто! — каятотсь авань вайгель.
— Монень колмо! — поладызе цёраломань.
Васенце саицясь, муюк мартось, ветясь лишме ды ёртнинзе ки чиресэ кескавонзо эсензэ крандазс. Кепсинзе, теке аволь товсюродо — сювадо пештязь. Сонсь коськана, вензав, виесь эйсэнзэ овтонь. Максынзе ярмактнень ды велявтызе лишмензэ кудов.
Икельце крандазось чамсь. Элювань улавс кадовсть кото «таркат». Сыргасть седе тов. Икеле ней эсь крандазсонзо Элюва. Вакссонзо ялго эскели мирдезэ. Зярыя ютконь ютазь, зяроцень кирда уш, каятотсь текесь:
— Сюро, сюро-о-о! — содавикс валось сравтневсь кудотнень, латотнень, штапо чувтнэнь юткова. Ливтнесь а стяко, кинь вешнесь — муинзе. Маризь, редизь. Улавтне лоткасть. Эйзэст лиссь вейке, мельганзо — омбоце. [94] ... колмоце. Веенстнэ маризь валонть, лиятнень ливтинзе кевкстемась: «Мезе тосо? Молянгак варштан». Эзь редявояк, кода улавтнень перька пурнавсь базарнэ.
Элюва, тень лангс ванозь, питненть аламнеде кепедизе. Кода илязо уле, кото «таркатнестэ» мезеяк эзь кадово. Ульнесть рамсицят — арасть. Срадсть. Кадовсть атят-сырькайть кавонест.
— Мезе, атя, кудов? — пшкадсь Элюва мизолксонь пачк, вайгельсэнзэ марявсть кецнемань гайтькеть. Ёжозо полавтовсь, нуварачизэ аламодо солась.
— Адя. Шканть а мезть таргсемс, — мартонзо ве мельс прась Виряз. Юксизе Элювань крандазсто лишмензэ, озась эсензэ крандазс. Мурдавтызе лишменть, дондядизе аламнеде ведьметнесэ ды зэрнезь тусь кельмевтезь кияванть. Мельганзо теке ладсо ардсь микшниця ялгазо — Элюва.
«Аволь беряньстэ яксевтинек тевенть. Товаронок миевсь базардо куроксто. Эзинь арсеяк. Ансяк илямизь кунда. Комсаултнэ прок покш пря коршт, ветькак неить. Капшамс, капшамс эряви. Ансяк... Мезекс те монень весе? Ков, мезекс капшамось? Маряви, седей лазксонь кандтнемадо стака ёжо арась, свал поти эйсэть, а кадны, — чарасть-велясть Вирязонь превсэ арсематне-мельтне. Шкань-шкань ожасонзо нардтнесь сельмекочкарястонзо начконть — сыречи, ков эйстэнзэ кекшат. Арды-арды, таго ожа песэнзэ ахолдасы. Летькемкшнить каракштнэ лембестэ экшес лисемстэ. Мезе ней, а содави. — Эрян тесэ, седеесь тосо, икелень эрямосон, эйкакшон марто. Пинень эрямо... Мезеяк а теят, эрят — нежедть. Седеяк — кинь-бути кудосо эрязь. А кузят жо каштлангс потолокс сельгенеме, эриця ялгакскак киненьгак а эряви каштлангсо кирьпецень ёзыцясь. Эрят — кирдть, сатст нардеть, иля новоле «урьва», «письмар», «копонь уре» валтнэде... Кода улемс, мезе теемс, превс а саеви».
— А-а-у! — сезизе арсемань лувонзо, удалдо каятотсь Элювань рангомазо.
Виряз ускинзе эстензэ ведьметнень, Варма лоткась. Мельганзо лишмесь, ардомадонть сеедьстэ лексезь, аламнеде эртевсь Вирязонь крандазс.
— Аштек, ваксозот озан!
Валтнэнь сеерезь, Эюва валгсь таркастонзо, панст ведьмеде сюлмизе лишмензэ Вирязонь крандаз пулос, ливчанясто, прок кодгемень иетне ютасть вакска, кузсь икельце крандазонтень ды лоцьк озась атянзо ёжос.
— Ладс лиссь тевенек! — кецнезь, теке эйкакш мазый казнентень, ёвтызе мелензэ Элюва вакссонзо аштицянтень. — Ванды таго сатано!
— Ха-ха-ха! — раказевсь Виряз марязенть поладомга. — Мельсэть, тапарязь пря, се чись, а? Сестэ истя жо лавтовдо лавтовс токшевезь ардокшнынек. Мельсэть? Те ульнесь куроксто мартот васень вастовомадонок мейле. Истя? Вай, кода шкась ливти... Иеть ютасть. А кемевияк.
— Тон, атя, ванан, сырнеме кармить. Мон — тевде, тон — ледстнемат... Мезе ульнесь — ульнесь, а велявтсак! — эзь нария, мекевланг, мельспаросо, натой аламнеде эльнезь, ёвтынзе валтнэнь Элюва чаронь калдорксонть пачка.
— Тевде, тевде! Текень содат. Прок эрямосонть сындест башка мезеяк араськак. Каня «тев» вастовтымизь? — мерсь «сырнеме кармицясь», чаво паксятнень ёнов ванозь.
— Кода арсят? Сатано-арась ванды? — эсензэ содась авась, малавгак эзь нолдтне мельтнень кортамс лиядо.
Эсензэ содась Вирязгак.
— Ульнесь кизэнь маней, лембе чи. Истя? Якинь се чистэнть станцияв. Лиссь истя: ялган тусть кудов, кадовинь ськамон. Шказо талай чикуншкадо мейле. Онкстнемс кувака вайгельпетнень мелем арасель. Ды понгить тон. Сакшныть лишмесэ. Пельки ардынек вейсэ... Седе тов, Сайнелев, молинь ялго. Тон сестэ каик прястот пангонть, ды лишмень ноцковтомадонть пилеть велькска менчевезь чертне токасть монь чамабокас, монь пилес. Чевтть-чевтть... Сынст кутькамось вечкевикс лембинекс ютась пачкан. Арась, арась, дугай, се ёжось а стувтови, валсояк а панжови. Те ульнесь он. Нурька коволнэнь перть та-ков ёмакшнынь: мезе перькан — эзинь нее, марявсь тень ансяк черень вадяшксось. Кода тон мерить, мезе ульнесь — ульнесь, мекев а велявтсак.
— Косто тон саевить прязон? Емат, ваязь ваят мартот! Мон вейкеде, сон — сонсь а соды мезде, — ордадсь, сускинзе турванзо Элюва.
— Валскень чиденть кортат? Иля мелявто. Течинсенть васня ютавтома, — редикскак эзь тее Виряз музгордемазонзо.
— Вантака лангозонзо! Куш кортак тензэ, куш иля. Ней мезе, соват кудос ды венемат эземпряс? — [96] казякадсь «валскень чиде арсицянть» вайгелезэ. — Течи чокшне, зяро кадовсь сюронок — пештяма кескавтнес. Весе миема — розь, суро, ликша. Видьметненьгак. А мезть кадномс.
— Видьметнеде башка мезеяк ламо эзь кадово. Пинеме зярс, виде, байтяк. Пелян, рамицят а улить. Розесь туи, — матрызе Виряз вакссонзо гувныця «толкеленть».
— Истя теемаяк. Тон, шержей сакало, лиясто паро мельтькак таргсят, — явасть кежензэ, пейдезевсь Вирязнизэ.
— Тондеть а берянть! — згилязь пандызе Виряз.
— Ну-ну, мезть а эрявить иля лабордо. Мондень вадрят, вантака кодамо...
Истя машнетезь-пеедькшнезь эзь марявояк сёксень паксятнева таргавозь кинть ютамозо. Совасть Эрьмезьвелес. Элювань лавсезэнзэ, косо содавикст сонензэ весе кудотне, эйсэст эйкакшонь пес эрицятне, чувтнэ, янтнэ, пандтнэ, китне... Те велесь — сонзэ масторозо. Тесэ кивчк ютась тундокс шольниця эйкакш пингезэ, умарькс ашолгалесь од шказо, эрязь эрявсть кодгеменень трокс эскельдязь иензэ. Кода тензэ, Эрьмезьвелентень, а мерят — монь чачома велинем, монь чачома мастором?
Элюва а содасы «валске» валонть. Мезе изняви течи, улезэ изнязь. Лиясто празь пры сиземадонть, ушодозь тевенть, мезе тееви чоподанть самс, тейсы. Сёксень читне аволь тундонь. А кенерят варштамо — сундерькст. Пачкодсть, совасть ортатнева сюронь микшницятне те шканть малава. Виряз перьгавтынзе лишметнень, урядынзе каршавост ды совиксэль кудос, чоп вачо — сэвемс куш кши печтьке.
— Вантака лангозонзо! Те мезень мазычи? Ков тон? — куродызе «одирьвазо-ялгазо». — Стувтыть кескавтнень? Пештямат. Мекс тонь прясь истямо варяв?
— Пекесь вачсь. Сусктано адя.
— Монь, арсят, пешксе? Мекев-васов совсемадо васня пештнесынек, — эзь арсеяк потамо авась.
Совасть утомс. Элюва кандсь-вельмевтсь фонарь. Теде мейле кундась кирдеме, Виряз атя — кескавтнес пондонь-пондонь кайсеме.
— Вантака, мезе теи! — Виряз сеске эзизе чарькоде, мекс апаркстомсь кескавонь кирдицязо. — Тон мекс велькска пештят парненть?
— Аволь верьга, самай истя, пондонь сталмосо, — пелькстазевсь Виряз атя. — Вант, самай пондо!
— Те кода истя?! Сестэ пондо а лиси. Те мезе, ломанень манчемат? Истя? — васня абунгадсь, мейле ацирьгадсь Виряз атя.
— Я, ботнозевсь... Покш кажось — аламнеде пондо а лиси. Кие карми онкстнеме? Тон? Кайсек зняро, зяро мон мерян.
«Мон мерян» валтнэ совасть Вирязонь седейс сардокс.
— А карман.
— Вантака, а карми. Кармат!
— Арась!
— Кармат, мон мерян!
— Тон мерят... На, кирдть, кайсек, зяро «мерят». Куш пелевидьга пештнить кескавтнень... Ломанень манчемась тонеть содавикс!
Элюва автордызе атянзо кедьстэ кедьгенть ды псистэ верендясь эсензэ мельсэ кескавтнень пештнеме.
Виряз кармась кирдеме.
Кескав, омбоце... ветеце... Элюва псилгадсь, кутьмерезэ ливезденть летькемсь, турвасонзо марявсь салозо. Сиземадонть, седеяк пек поланзо акунсоломадонть ды кежтнеде, сорнозевсть кедензэ. Окойники, «на» мерезь, онкстницясь стясь кескав кургонь кирдеме. Кармавтомо, зяронь-зяронь пештнемс, эзь карма.
— Мезе, кежкептерь, течис пе? — пшкадсь Виряз меельце кескавонть тарказонзо путомсто.
— Лия тонь превсэ мезеяк арась — седе курок кудос. Пенгеть валскенень совавтозь? Ведеть кандтнезь? Кареть... — мериксэль «кодазь». — Ну кадык эно, васня кудос соватано, мейле уш...
Стомамосо ютасть сёксень кувака ве ды ювк нурькине чи.
Совасть атят-сырькайть шлямдо ды ярсамодо мейле икеле кудос. Лембе. Куш уштозельгак чикуншкадо икеле. Прок аволь кирьпеценьгак. Толонь вельмевтеме эзть карма. Ярсасть-тейсть ды седе курок бока лангс, рунготне лоскиезь лоскиесть улавонь сталмосо теезь тевтнеде.
Виряз коникензэ вакссо каизе алга панаронзо, юксизе понкс повонть ды арсекшнесь чопавтемс вельксэнть потс. Чоподастонть каятотсь Элювань эль марявикс вайгелезэ:
— Сака тей.
— Мезе?
— Мезеяк арась. Мадть ваксозон.
— Стена ёжос мадть, — мерсь Элюва ды айгсь коникенть чирес. — Парсте, пек парсте теевсь течинь тевенек.
— Тон таго текеде, налкставинь! Паряк, мадтяно, а? — эзь цидярдо, кепедевсь Вирязонь вайгелезэ.
— Монь мекс-бути дух эзь са удомам... Ловт, кадовсть таркас апак аравто лишметне, кудодонть арсемскак а мезть. Ковгак а тейсак.
Кода эзь бажа Виряз, кортамось ушодовсь «таго текеде». Мезде лиядо кортамс Элюва марто?
— Лишметненьгак ковгак а ильтясыть. Снартнемскак а мезть. Ковгак. Кецнек, скалтнэнь ды сюронь микшнеманть марто эзимизь амзорда. А кенерить, маряви, тевест ламо.
— Те виде, атя. Лисиндеряй тевенек ванды, карматано арсеме курмонь-кармонь пурнамодо. Поездс билетэнь саемадояк мелявтома.
— Кортазевинек, удомамгак кекшсь, — валонзо ёвтазь, Виряз кутмордызе ды весе вийсэнзэ лепштизе вишка Элювань чевте, валаня киське ёлганя рунгинензэ.
— Вай, авакай! Тон мезе истя теят мартон, сыре панго? Пеняцить — сизить, тонсь... теке од цёра, атят-сэрдят, визьксэтькак арась, — тошказевсь Элюва кунст мадезь.
— Арась, арась, дугинем! Петнявкскеяк арась. Кодат визькст, — моткодсь Виряз нинзэ палсемстэ.
Зярыя шкань ютазь чоподантень ялгакс теевсь каштмолемась. Юткозост совась стенас понгавтозь частнэнь кшнинь коське-калгодо вайгелест. Перьгедсь, прок лопа нерьстэ ведьбайге, эрямостонть таго чи. Мезе кандыть вандынь валскесь ды полавтыцязо чись, содыть ансяк сынсь.