Якстере теште/1924/33/Сисемь иеть

Якстере теште, № 33, 4—7 ноября 1924 г. редактор Глухов, Пётр Семёнович
Сисемь иеть

Якстере теште. Еженедельный орган Мордовской секции при Ц. К. Р. К. П. (б.). — № 33, 4—7 ноября 1924 г. — с. 1

[ 1 ]

Сисемь иеть.

Сисемь иеть топоцть, кода коммунистической партиясь Ленинэнь нефтиманзо кувалт ветиньзе робочейтнень ды сокицятнень тюреме капиталистнэнь карчо.

Сисемь иеть ютасть седе мейле, кода 1917 иестэ Октябрянь комсьветее чистэ (одс ловозь ноябрянь сисемеце чистэ) робочейтне ды сокицятне нельгизь эсь кедезэст верень потицятнэнь кецтэ властенть ды тейсть Советэнь власть.

Ламо вий савсь путомс трудицятнэнень, чтобу эсь кецэст кирьдемс властенть, а максомс мекев генералтнэнень, буржуйтненень, помещикненень. Кить анцяк эсть тюрть Советэнь властенть карчо — Юденич, Деникин, Колчак, Врангель и ламо лият — весе а лововить как. Лия масторонь капиталистнэ, верень потиця верьгистнэ, весе вийсэ раздиксылезь робочеень и сокицянь Советэнь властенть! Мезеяк сынь эсть тее. Кеместэ ащесь Красной армиясь. Весе вийсэ лездасть Красной армиянтень робочейть ды сокицят. Сокицят остатка сюрост максылизь армиянь андомо. Робочейть ¼ фунта кшень лангсо эрязь анокстасть снарядт и весе мезе эряви армиянтень. Ёртовсть ве енов, васоло ве пелев весе ашо верьгистнэ. Лия государствань капиталистнэ, кода пеест есть порь Советэнь властенть лангс — мезеяк маронок эсть тее. Ней сынь кармасть Советэнь властенть ловомо законной правительствакс — кучить признаният. Кортыть минек республиканть марто торгувамо тевде. Франция сех пек сюдыль Советэнь властенть, сонгак не читьнестэ кучсь Советской Правительствантень признания. Ней аламо кадовсть государстватнеде, конатнэ ещо а ловить Советэнь властенть законной правительствакс. Францыян мельга сыньдяк курок весе кучить признаният.

Советэнь властесь эрьва чистэ яло кемелгады, яла саи вий. Пек каладозь ульнесь весе хозяйстванок. Пек розорякшнызе войнась. Лавчолгафтокшнымизь 1921 вачо иесь. Кода стака эзь ульнекшне, хозяйстванок кармась витевеме. Машинань килаҥонок ней роботыть вадрясто. Фабриканок ды заводонок кармасть эрьва иестэ роботамо седе парсте.

Городсо робочейть вачо кшефтеме а ящить. Сюровидицят эрьва иестэ седе ламо видить мода. Сюронок карминек уш миеме лия масторов. Хоть ламо таркава тедиде сюрось шачсь пекь беряньстэ минь тедидень сюронь, а чачумадонть эзинек тандант. Ней советэнь масторонть саты виезэ сынест максомс помога.

Ютась иетьнестэ берять ульнесть ярмаконок. Мелят ещо те шкане кедьлаҥанок якасть коневонь ярмакт-совзнакт. Тедиде эрьва ломаненть зепсэнзэ кармасть чольдерьдеме сиянь ярмакт. Мелят пек алкине ульнесь сюро ланс питнесь — тедиде питнесь ащи седе покш, а товаронь питнетне аламонь, аламонь яла валгить. Робочейтнень ды сокицятнэнь правительствась коммунистической партиэнть марто бажить сюронь ды таваронь питнетьнень ровнойгавтомс, чтобу робочейнень можна улевель дешювасто рамамс кше, сокикицянень седе дешювасто максомс эрьва кодамо товар.

Ламо ещо тев ащи робочейтнень ды сокицятнэнь икеле. Хозяйствасонок ламо ещо улить лавчо тарканок, но не таркатнень робочейтне ды сокицятне Коммунистической партиянть маро витьсызь.

Кода кедьте кец кундазь робочейть ды сокицят тюрить буржуйтнень ды помещикнень карчо, истяжо икелевдяк дружнасто кедьте кец кундазь эряви весе вийсэ кепедемс хозяйстванок эйсэ — сокицянень велесэ, робочейнень фабриксэ ды заводсо.

Коммунистической партиянть нефтиманзо кувалт, Ленинэнь заветэнзэ теезь эряви миненек ютамс икелев, чтобу седе курок пачкодемс коммунизмас.

Минек лаҥс ваныть весе масторонь трудицятне. Учить паро чи знярдо сыньдяк якстере знамянь кепедезь ертсызь капиталистнэнь ды туить минек марто ве киява.

Чумбра чи робочеень ды бедной сокицянь паро эрямос ветиця Коммунистической партиянтень.

Чумбра чи Коммунистической интернационалонтень, кона весе масторонь трудицятнэнь вети Октябрьской революциянте ды нефти ки коммунизмас пачкодеме!