Якстере теште/1924/32/Седе вадрясто ютафтодо ютко шканк

Якстере теште, № 32, 25 октября 1924 г. редактор Глухов, Пётр Семёнович
Седе вадрясто ютафтодо ютко шканк

Кодамо тев ащи эрзянь-мокшонь студентнэнь икеле→

Якстере теште. Еженедельный орган Мордовской секции при Ц. К. Р. К. П. (б.). — № 32, 25 октября 1924 г. — с. 1

[ 1 ]

Седе вадрясто ютафтодо ютко шканк.

Пачкодсь соксь ланҥо. Паксянь ды пирень тевть прядовсть. Читьне яла нирькиньгадыть. Велесэ эрицятнэнь кизэнь коряс чаво шкаст (времаст) ламолгады. Кода ютавтылезь те шканть икеле? Чокшнэ лата, анцяк прядовить (оделавить) кардазонь перька тевть а кенерить как ужинамо тейтерть чиить ащима кудос (сидинькас). Од цёрат мельгаст. Тосо ащить атякшонь морамос. Мезень ули, лезэзэ ащима кудова, сидинькава шканть ютавтозь? Од ломатьне мезеньдяк парос тосо а тонадыть. Шканть (времанть) ютафтыть стяко. Седе сыретненьдяк шкаст юты аволь седе парсте. Молить сынь шабраст туртов и чокшнэнзэ перьть келест езыть, побасенкань ефтнезь.

Ней истя ютко шканок ютавтомс а эряви. Коммунистической партиась ды Советской властесь терьди эйсэнек тонафтнеме. Анцяк тонафтнезь пурнави—сэрневи паро эрямо чинек, витлеви каладозь хозяйстванок. Анцяк тонафтнезь минь карматанок содамо, кода седе ламо сюро саемс паксянок лаҥсто, кода паролгафтомс скотинанок. Косо жо велесэ эрицянень тонафтнемс? Ловнума кудосо, изба-читальнясо. Тосо сокицясь муи кодамо: кинига сонензэ эряви. Ловнума кудосо эрьва (каждой) ломанесь газетнэнь кувалт содасы кодат новость улить Советской республикасонть ды весе мастор лаҥсонть. Вана ловнума кудосо миненек эряви ютафтомс ютко шканок. Партиянь ячейкантень ды комсомолцтнэнень эряви ваномс, штобу парсте молест ловнума кудонь тевензэ. Улезэ тосо вадрясто развитой ялга кона содаволь бу кинень кодамо кинига максомс, кинень кодамо совет ефтамс. Улест ловнума кудосо эрявикст кинигат. Кодат кинигат арасть — эрявить Уполитпросветэнь трокс вешемс. Иляст аще ве ено, ве пеле ловнума кудодо учителть, агрономт, ветеринарт. Сынь велесэ самай тонафтозь, образованной ломать. Сынь лекциянь ловнозь сокицятнэнень теить покш лезэ.

Ловнума кудо (изба-читальня) улезэ велесэ весе велень эрицятнэнень самай вечкевикс таркакс. Козой капшаволь эрьва ломанесь ютко шкастонзо.

Парсте путозь ловнума кудо карми покш тев тееме чопуда велетнень эзга.

Аволь стяко Коммунистической партиянь XIII прумксось мерсь, васенце тарка велень культурно-просветительной тевсэ улезэ ловнума кудо.