Якстере теште/1924/30/Колмо иеть

Якстере теште, № 30, 8 октября 1924 г. редактор Глухов, Пётр Семёнович
Колмо иеть

Якстере теште. Еженедельный орган Мордовской секции при Ц. К. Р. К. П. (б.). — № 30, 8 октября 1924 г. — с. 1

[ 1 ]

Колмо иеть.

Колмо иеть... Нилеце ие туи, кода кармась лисеме эрзянь кельце газета „Якстере Теште“ Нилеце ие „Якстере Теште“ палы эрзянь чопуда велетнень ланксо. Пани эйстэст чопуда чинть. Невти ки ков эряви ютамс эрзянь сокицянтень. Терьди эрзятнэнь весе лия нациянь трудицятнэнь марто од эрямо чинь строямо. Терьди од пингень кис, коммунизмань кис бороцямо. Ламо ютась шка, ламо минек ялгатнэнень эрявсь путомо вий, знярц эрзянь велетне редявлезь „Якстере Тештенть“. Ловныцянзо ульнесть пек аламо. Сокицятне газетэнь лезэнзэ а неилизь. Кодамояк газет ловномо эсть тонат. Аволь газет ловномо, аволь паро эрямонь строямо тонавсь сокицятнэнь инязоронь властесь. Инязоро тонафтыль эйсэнек анцяк кабакс якамо ды пазнэнь озномо. Кирдиль эйсэнек чопуда чисэ. Ней Советской властень пингстэ велетне кармасть чопуда чистэ лисеме. Эрзянь велеяк панжинзе сельмензэ. Неизе кодамо лезэ максы Советской властесь. Чарькодсь ков терьди эйсэнзэ коммунистической партиясь и кармась мельганзо молеме. Эрзятнэяк неизь кодамо покш лезэ максыть сыненст газет и лия газетнэнь ютксто редизь эсь кельсэст сермадозь газет „Якстере Тештэ“. Васеньцэ кавто иетнестэ „Якстере Тештенть“ пек аламо ульнесть ловныцянзо. Седеяк аламо ульнесть сермадыцянзо. Ней кармасть сермадомо „Якстере Тештесь“ эрьва ендо. Сермадыть Саратовской, Самарской губернясто, Башреспубликасто, Сибирьстэ и лия эрзянь таркатнэстэ. Аламонь, аламонь кармасть ламолгадомо ловныцянзо. Сокицятне кармасть чарькодеме кодамо покш лезэ чопуда чисэст максы сыненст эрзянь ялгаст „Якстере Теште“.

Минь кемдянок, што нилеце иестэнть а кадови вейкеяк эрзянь веле козой а пачкодевель бу „Якстере Теште“, а кадови вейкеяк сермас маштыця эрзянь сокиця, кона а ловноволь бу эсь кельсэнзэ сермадозь газет „Якстере Теште“.