Эрязденть арсезь (2010)/Эряк ды содак
[223]
| Эряк ды содак |
Телень цят якшамо ве. Удотано каштлангсо. Сыргозинь. Кузтемпеванть, мейле кудыкельга чикор-лакор ды чакиязь марявсть та-кинь эскельксэнзэ. Сыргозсь, кунсолозевсь, лексемазо а маряви, авамгак.
Чо-ожк панжовсь кудонь стака кенкшесь. Велявтынь пеке-киськем лангс ды кепедия кенкшенть ёнов прям. Ванан, сурневтиця якшамо сувонть марто совась, яла тень а кемеви, се, кинь самонзо учинек ванды, — минек Коля.
— Те тон мекс истя — дюм веть? Ванды эйсэть учинек. Тон... Маряви, курок ашолгадомо карми, — колызе вень [224] каштмолеманть талномадонть сорныця авань вайгелезэ.
— Лишмем, авай, ёмась, — маринь алдо, чалгавксонть вакссто сюмора вайгель.
Коля эль эзь аварде.
— Вай, Инешкипаз! Ды те кода истя? Мезе лиссь? — авам капшазь тонгсь кемть, валгсь, каясь ланганзо шаль ды кирвазтизе вальма кундос понгавтозь ченьгакай лампиненть. — Вай, авакай, ней мезе теемс? Кода улемс?
Коля чувтомозь, прок покш чумо тейсь, аштесь тарчксонть икеле, шлёркаесь судосонзо. Эзь сода, кода улемс, мезе теемс.
— Вай, Верепаз! Вай, кодамо апаро лиссь! Ды тон мекс а кайсят? Нейке, нейке каштлангс кузть, — мерсь седеймарязь авам, сонсь тандадомадонть чарась-велясь кудованть.
Фуфайканзо, пиле марто шапканзо, варьганзо-мезензэ кайсемстэ, юткозонок куземстэ ялаксонок ушодсь ёвтнеме апародонть.
— Теня, кандынь-совавтынь клубс кинонь меельце ящиктнень. Лисинь ушов — лишмем кузтемпесэ арась... Мон тей, тов! Кавксть луньк-луньк чиезь ютынь клубонть перька. Стяко. Челькеяк эзинь редя. Тандадынь. А содан мезе теемс...
Ялаксом кузсь «сёвонень пандонть пряс», эцесь, седе лембе улезэ, монь, лелянзо, ваксс. Лекшкадсь кирьпецтнень ёжос, лекстясь-тейсь ды поладызе ёвтнеманзо:
Арсезевинь: совхозонь контора икелев эзь туе? Берть-берть чиинь тов. Арась. Чинезэяк тов эзь пачколе. Мезе сонензэ тосо теемс? Улевельгак од ловне, паряк, ёнкске муевлинь... Ве челькинеяк эзь кадово.
— Пшкадевлить эно Антай лелятень, — трокс вал каясь авам. Сонгак кузсь лембе масторозонок ды венстизе рунгонзо стенанть ёжова.
Антай лелянок, тетянь ялаксозо, эрясь эйкакш пизэнзэ марто Совхозсо, козонь эрявсь пачтямс ды пачтявкшность кинонь курмотне-кармотне, клубтонть аволь васоло.
— Дюм ве, авай, секс тенст эзинь молеяк. Мейсэ, арсинь, лездыть? Аштинь-теинь, прынь мельс: лишмем кие-бути тандавтызе, ношкстась кудов. Мезе теемс? Сави мельганзо туемс. Ды туинь. Кува молян, кува кижнэмазон, цяк оймем таргсеви, чиян. Монсь ваннан перькан. Ве, мезе неят...
— У-уф, — укстась авам, — истя, цёрам, чинтькак вень куншкава кото вайгельпетнень чаво паксятнева?.. Эзить пеле?
Сась валскесь. Ашолгадсь.
Ёрвалдынек лелят-ялакст чаманок, оршнинекды лисинек ушов. Эряви ютамс эсенек буень ломантнень ланга. Кодаяк лисема кажостонть. Серьгединек Критун лелянок, тетянь веженсь ялаксонзо, Оверь Миколень, омбоце юронь, кавто иеде мондень покш, лелянь, од покштянь — тетянь лелянзо. Састь, кинень пшкалинек, ёвтнинек, весе. Кортнинек, кува вешнемс, кинень ков молемс, ды сыргинек эрьвась эсензэ «маршрутка», Совхозонть ёнов ёмазенть вешнеме. Веенстнэ ялго — матразь, варматнесэ валакавтнезь ловонть ланга эскеляват вадрясто, лиятне — сокссо.
Чись маней. Ожо пря чипаесь ваны кецнезь, бажи шкадонзо икеле эждемс ашо велькссэ вельтязь моданть. Коське якшамо. Ламодояк ламо ловонь тештинеть сиякс цитнить верде ваныцянть мизолкстонзо, сельмть начтыть, а вановат.
Якинек-лытынек Орданьбуенть ды Совхозонть ютксо таркатнень, ашо ононь неиця паксятнень ланга аволь час, аволь кавтояк эскелинек ушкс-трокс. Пурнавинек, уш чинзэ валгомадо мейле, минек кудос. Вейкесь шлыгорк совась, омбоцесь...
Тевенек эзь лисе. Пилыть ансяк чавинек. Лишменек прок моданть пачк тусь. Прок кияк нилизе. Кияк мезеяк эзь маря, эзь нее, эзь редя.
Мелявтозь-ризнэзь ютась таго ве. Весемеде стакаль сон тириенек туртов. Удось чульть-чальть. Авань седей... Валскень сазь совась, теке учость сонзэ, Алькань Ягорь бригадирэсь. Кевкстсь, мекс арась ракшась. Сёпомадо мельтькак арасельть. Коля ёвтнизе весе кода ульнесь.
Сыргинек — Неенсетне — мучкамо омбонь кирда. Зярс нучк-пачк лытынек кельместэ лексиця паксятнева, чипаесь шаштсь чинзэ омбоце пелев. Якшамось, маряви, седеяк кежиявтсь. Автори кавонст понксонь пачкаяк, эзэльди кумажатнень. Одс азгондтяно лушмотнева-кува. Критун лелям тусь ванкшномо Петровкань вирненть ёнов, сон Совхозов киденть авасоло.
Чись ютась. Аламонь-аламонь пурнавинек минек кудос. Авам, патян ды сазором учость, кемсть. Минь вана таго чавонь кедть: кияк паро куля эзь кандо. Стяко чоп кашкинек.
Лелят-ялакст мусть тарка, озасть каштомикелев. Таргить. Шкась моли. Учотано Миколень. Сельмс удалга тензэ лиясто мертяно Тумай. Те покшчинзэ кис. Кода кортыть, кенкшка а кельги. Кемемась вейке: сон мезе ёвты.
— Ванодоя! — кецнезь рангстась ды невтсь сурсонзо ульцяв ваныця вальманть ёнов Коля.
Весе прынек вальмантень. Кудонок икеле керь нурдс кильдезь Тюжаня! Косто истя? Кона ёндо? Миколь эрязасто стясь нурдостонть, каинзе ведьметнень лишменть трокс ды эскельдясь кузтемпе ёнов.
— Те косто истя тон? Косто? Ёвтнек... — каятотсть зярыя цёрань ды авань вайгельть, ансяк кенерсь Миколь, сэрей шуморкс цёрась, мельганзо пекстамс кудонь кенкшенть.
Чукадинзе ужос путозь тенстьсэнть кемензэ ды ютась уштозь голландканть ваксос, озась табуретка лангс.
— Мезе ёвтнемс?.. Чарынек-чарынек пайстомо лишменть вешнезь, эртевемс эйзэнзэ эзинек эртеве. Баришом латксоль! Ага. Мезень вий тозонь кандызе-панизе — ве Пазось соды. Киськак аволь маласо. Тандавтызь, бешоконь. пек. Ага. Паряк, рицягасояк каясть тензэ. Ардсь, пайстомось, сонсь эзь сода ков. Ага.
Вана мезе мерян: туворсоль Тюжаня. Ага. Латкось, содатадо, аволь домка. Совхоз ёндо чирезэ вандора. Валгсь, эзизе маряяк. Омбоцесь, каршонзось — ватола. Теке чапо. Нежедевсь лишмесь эйзэнзэ. Снартнизе потамс — эзь лисе. Полозатне удалдо нежедсть вандора чиресэнть а покшке чувовкскентень. А икелев — а удалов. Ага. Теде башка кавто ёнга — чувтт. А витев — а кершев. Алкуксонь ту вор! Эрьва кода лишмесь снартнесь эйстэнзэ лисемс. Мик вить ёндо ажияпентькак порнизе. Лисиксэль истя. Косто?.. Каня лисеват истямо туворсто?! Ага. Паро, верьгизт эзть эртеве. Веенст ловажат кадовольть эйстэнзэ...
Седеень сезневтиця мельтне-ёжотне лиссть кудостонок. Авань вайгелезэяк, марявсь, полавтовсь, теевсь седе гайгицякс, седе чевтекс. Васенцеде неть читнень-ветнень перть лекстясь шождынестэ.
Кода а полавтовомс? А муендерявольгак бригадань лишмесь, Колянь, допрок од цёрыненть, зярыя иес кекшевлизь, секень вант, панжома экшс. Идек азё прят — тетям чавовсь, касынь урозокс... Марикскак а теить.
[227] Велень эрицятненень меельце шкас паспортт эзть максне: чачить велесэ — кулокак велес. Лишментень вана, вашинентень сеске сёрмалесть паспорт: зярдо чачсь, ки авазо, тетязо, сэрезэ, кувалмозо, кодамо поназо, кода лемезэ. Мезеяк эзь стувтневе. Секскак аволь муевеяк «ёмаськесь», парт учнемс ульнесь а кона ёндо.
* * *
Совхозсо эрясь Орданьбуень ломань, Пулянь Сёдор. Ульнесь, валонзо коряс, фронтсо. Паряк. Теке марто лиякскак кортасть эйстэнзэ: тосо, фронтсо, порохонь чинентькак, келя, эзизе никсне. Маряви, истя ульнеськак. Шумбрачинь коряс эзь неяво — ульнесь «тюрема паксятнесэ»: чамазо якстере, зорякс палы, виесь эйсэнзэ — бука пулодо сяворды. Важодсь завхозокс.
Эскели та-косто Сёдор дюм чокшне клубонть вакска кудов. Вансы, лишме. Ланганзо каязь, седе лембе тензэ улезэ, тулуп. Покш. Пензэ малав модас токшить. Каня кирди седееть?.. Ноцковтызе сонзэ зяро виезэ ды, илизь нее, — чиезь... Лишменть седеезэ эль эзь сезеве тандадомадонть, каявсь ков сельмензэ неить.
Минек велестэ, Сёдордо башка, лияткак эрясть Совхозсо. А весть некшнизь, кить содылизь тетянь, «фронтовикенть» лангсто сонзэ покш, паро, лембе, раужосто артозь тулупонзо. Тетям маштовсь — оршамопелезэ кадовкшнось тенек ледстнемакс ды лембе чевте алксокс-вельксэкс. Кадовкшнось...
Сёдорнэньгак салазенть кувать эзь саво оршнемс. Иень ютазь, чопода веть, мольсь лишмесэ шабра велень капасто тикшень саламо. Аволь васенцеде. Кундызь. Кундыцятне ульнесть аволь лавшо понкст. Кавксть-колмоксть «озавтызь» кельме мода лангс, мейле — эсензэ нурдос ды теке мезеяк араськак ильтизь кудов. Ковонь-кавтонь перть резэмадо мейле «фронтовикенть» ильтизь Совхозонь калмазырев.