Эрязденть арсезь (2010)/Чумом эзь нолдаво
[180]
| Чумом эзь нолдаво |
СЕТЬ сельмтне нейгак икелень. Эзть копачаво ламо иетнень перть таштазь сувонтеньгак. Полгарят, сеерицят, лездамодо энялдыцят. Ледить мелезэнь се шкань читне-ветне ды стить вановтом икелев, теке те ульнесь исяк.
...Бакунь та-кодамо буень клубсотано. Азербайджанонь кельсэ моли спектакля. Кода свал, куншкасо-стационарсо эли районсо-буесэ, залось тыц. Зярс шаршавось пекстазь, тона ёндо марявить аволь гайтев шалт, башка вайгельть, козкстнемат. Кода свал, шаршавонть те пеле, кулисатнень удало, гримёркатнесэ, минек «зепсэ» а лоткси лия ды лиянь эрямо — спектаклянь «чапицятнень».
Мон течи — шаршавонь панжтниця-пекстниця.
Сась шказо. Режиссёронь лездыцясь, спектаклянь ветицясь, ахолдась кедьсэнзэ ды ёвтызе вечкевикс валонзо:
— Поехали!
— Поехали так поехали, — меринь тень каршо ды панжия сценанть.
Ушодовсь налксемась, конёвс кандозь эрямось: мельтне, бажамотне, ёжотне. Залось ваны, кунсолы, каятотсть цяпамот. Ванан эсень таркасто монгак. Ансяк уш кодат ваномат келенть апак сода? Мезеяк а чарькодян. А содаса шаршавонь пекстамонь репликантькак. Стувтыя кевкстемс.
Апак учо, мик таймазкадынь, режиссёронь лездыцясь, аваломань, кавалокс каявсь лангозон, автордызе кедьстэнь пиксэнть ды [181] «макссь занавес». Мон варштавинь кершев ды неезденть эль эзинь аймельгадо: ванан цяк а повави, кижны-кирны, сельмензэяк полгарьгадсть, Азербайджанонь содавикс актёрось Рашид Галлиев...
Пьесанть коряс сон кекши келей-покш сундукс. Эйстэнзэ лисемстэ, ансяк кенери невтеме прянзо, удалдо кирнявты вельксэнть лангс партнёрозо, пови эйсэнзэ. Те шкастонть, неезь эли репликань содазь, шаршавонь кавто пёлькстнэ вейсэндявить, «ловицясь» валги горобиянть лангсто, «полонс понгицясь» эрийстэ-парсте лиси эйстэнзэ. Мон вана курго автнинь.
Кавонест кажос понгицятне чийсть эйзэнь. Кавонест, кедьсэст кежейстэ ахолязь, кундасть «пивсэмень», а стака чарькодемс, эсест кельсэ, лисезь апаронть кис. Кармась тенст «лездамо» эсензэ, рузонь кельсэ, режиссёронь лездыцяськак.
* * *
Мезе сестэ теевкшнэсь мартон, сеске эзь чарькодеве.
Умок уш се мазый, аволь одтнэде, покш, шуморкс цёрась чиретнесэ, ков, зярдо сы шказо, пачкоди эрьвась, ков туема, аламо кадовсь учомс, моненьгак. А вана сеть раужо сельмтнень икеле чумом эзь нолдаво аволь аламо иетнень эрязьгак.
Чумом, ней чарькодия, вейкель — а содылия се цёранть чачома келензэ. Секс содавтнитькак эйсэнь сонзэ лезкстэ энялдыця покш сельмензэ. Кеман, улевельгак шаршавонть экшсэ монь, васолдо сыцянь, таркас азербайджанонь цёра, се оймень саевтиця тевесь аволь лисе. Статистика арась, кияк ловомояк а арси зяро кирвазить чопода ды якстере тевть, зяро ойметь маштовить раськетнень човорямодост, келень асодамодонть. Кавто, колмо, ниле кельсэ кортазо неень шкань ломанесь! Тень таркас тееви мекевланг: бажить кавто-колмосто ютамс вейкес. А чарькодтян тонь, ломань! Вельть уш ойметь чопода.