Эрязденть арсезь (2010)/Сырнекс цитни товзюрось...
[146]
| Сырнекс цитни товзюрось... |
Пиземе. Ордали нилеце чи. Лотки-лотки, ванат, таго сови вийс, таго лостерь-лостерь ушоды ёвксонзо ёвтнеме. Пезеря, пачк начтыця. Сюронь урядамо шка — урядамс а максы. Пирень-кардазонь тевскак а лисеват: начко, рудаз. А потомдасак, а мерят: «Бодяй, саты!». Секс саинь лався лангсто конёвон-ручкан ды озынь мартост стувор экшс «бухгалтериянь тевень» ветямо. Таштавсть байтяк, теемат.
1951-це иень кизэнть самга прядынь вейксэ класст. Шкатнень [147] коряс те аволь аламо. Кадык математикатне ды эрьва кодат лия метриятне кечкересть эйсэнь эрьва ёндо, путнеме-сайнеме, ламолгавтнеме-явномо тонадынь, содаса, кода онкстнемс колмо-ниле ужосто паксянь пелькстнэнь-икелькстнэнь. А стяко Тилюс Андрей, минек Пичепень бригадирэсь, «чин» тень макссь — аравтымим бригадань учётчикекс. Аволь кодамояк кокорка — «начальник»! Эно кинь лиянь путат? Аволь ансяк пестэнть, велестэнть ськамон, ловт, пачкодинь кеменце классос.
Тевтнеде — кирьгава. Якама сёрмалеме, кие косо важодсь ды важоди, мезе ды зяро, васняяк, тейсь. Мейле, кудосо уш, эрьва фамилиянть каршо путома трудочи, максома теезентень питне. Кинень путат чи, кинень чи ды пель, кинень — кавто. Эрьва тевенть, сокамонть, нуеманть, сюлмсеманть, ледеманть эсензэ питнезэ неть самай читнесэ. Колхозниктнень лемс панжтнезь «трудонь книжкат». Васня праксташка конёвозон сёрмалян эрьва чинь тевест ды трудочисэ пандома питненть. Тестэ уш «кандомат» книжказост.
Тешкстнян, нардтнян, цянкаян цётатнесэ... Петерди-арась пиземесь, тевем эскели.
Ушов, куринкав ваныця вальмантень аштян копоре ёндо.
— Тук-тук-тук, — каятотсь апак учо, натой тарск теинь.
Велявтынь. Икелень, вальманть тона ёно, ашти Бозань Груня. Прязо ды лавтовонзо начкт. Чамазо аванть, теке Якстерть мери пешксе ков, келей, сельмензэ ванькст, покшт, прясонзо кошинекс сюлмазь ашо паця. Те Бозань Раянь — школав мартонзо якинек — од авазо. Мезеяк а мерят, лангс ванозь неявикс, мельс туиця авась. Ансяк... Эрить эйстэнек Верепе ёнов сисем-кавксо кудонь трокс.
— Мекс ютазь ковсто аламо чинь? — пшкадсь калгодо, кежей вайгельсэ, ансяк кенеринь вальманть панжомо.
— Груня пати, зяроксть лиснить, зняро тешкстынь, — меринь ды невтия ютазь ковонь картам. — Якить важодеме кеветеексть, вана варштак.
— Зяроксть-зяроксть?! Кеветеексть? Тон мезе, нарьгат лангсон? — лаказевсь, эчке мазый турванзо кежтнеде мик сорнозевсть. — Ковонь перть якинь! Ловомо а маштат?! А содан, кие путынзеть истямо тевс...
— Груня пати, тонсь вант: ковонь ветеце чистэнть саезь кавксоце чинтень араселить а паксясо, а тинге лангсо, а лиясо косо. Эзить лисне вейксэце, комсеце ды зярыя лия читнестэ.
— Те тон стяко кортат! — эзинь кирдеве, а сеть валтнэнь ёвтынь. Манявинь.
— Мон?! — рангстась, кирвазсь келей чамазо ды полгарьгадсть покш сельмензэ «видечинь вешницянть».
— Да, тон, — прядыя стяконь пелькстамонть ды пекстыя, эзинь карма седе тов кунсоломонзо, вальманть.
Содаса те ломаненть. Важодеманть пек а вечксы. Сень кис келесь сонзэ — лаужа, сёвномо-сюдомо — сон. Раянь пельдеяк кой-мезть «парт» од авадонзо марсинь.
...Аватне нуить розь Пичепень, лиясто, мертяно, Верепень песэ паксясонть. Зярдо чипаесь кундась чикуншкадо мейлень тевезэнзэ, саинь блокноткем-карандашом, сэлем ды сыргинь нуицятненень, теезест онкстнеме-сёрмалеме. Сындест мейле ютан лия таркатневаяк.
— Палай пати, зяро течи нарыть? — пшкадинь сехте маласонтень, Охрянь Палайнень, аволь сэрей, кирьксаня чама авантень.
— Те уш тонь тевесь, цёра, онкстык, — маринь сэтьме, чевте вайгель.
Авась нерьгстызе тарвазонзо вакссонзо пултонтень ды видемтизе рунгонзо, оймамс лип шкас.
Сэльсэнь трокс-кувалт ютыя-эскелия нуезь уманзо. Келенть содазь, ловомс а кувать.
— Кемнилее соткат, Палай пати, — кецневтия валсон учиця аволь сыре, аволь одгак аванть. — Норма! Чинь норма, Палай пати!
Палаень вакссо икельксэсь Элина патянь, тетянь мазый вайгель, дошуз сазоронзо. Мерить тенст Сергеень, Сергей Элина. Кода лиятнеяк, нусь, сюлмсесь пултт, кандтнесь ды путнесь пулттнэнь копоняс, Апак онкстаяк неявсь — сон аламнеде икельдинзе шабранзо. Истя лисськак.
— Кемнилее пель марто соткат, Элина пати!
— Сюкпря, цёрам! Курок школав пурнат?
— Эно кода. Кавто таргот кадовсть. Ютыть — а марявитькак! Аню аноксты. Элина пати? — кортамонть поладомга, кевкстия омбоюронь сазордон.
Вана Бозань Грунянь нуевксэзэяк. Аравтыя сэлем ды эскелия уманзо трокс-кувалт.
Кецневтимем. Мезеяк эзь мере. Сёвномо, пелькстамо — эзь кемевеяк — эзь карма.
Сёрмадынь нуемань соткаст Васькань Полянь, Купай Наталень, Шабай Олдаень, Зёконь Кулянь... весень, кить нусть те чистэнть Пичепень паксясо.
...Ютась таргошка. Товзюронь урядамо кундасть Петровка вирь неренть чиресэ паксясонть.
Чипаесь якстере покш паргокс новольсь аламонь-аламонь модачирентень. Аволь ансяк ломантне, сонгак сизесь. Чинь-чоп уштсь каштомонзо, лездась паксясо котьмицятненень чевте лембесэнзэ, кепедсь кайкс. Ней арси, ваны, кочки тарка, козонь валгомс венть ютавтомо, козонь чиремемс.
Ютынь весе важодицян. Васня содавтынь муворонь, кода мерить тарваздонть шабра велесэ, азораван, мельгаст — жнейкасо нуицятнень. Ютасть иеть, кода войнась энгамсь, ялатеке колхозсонть ансяк вейке комбайна, ташто «Коммунарнэ». Секскак седе ламо кемемась мувортнэнь-пелюматнень ды лапасост ахолиця, эсь ёност тердиця жнейкатнень-«лобогрейкатнень» лангс.
Минек бригадасо кавто жнейкат. Машинистэст-ветницяст — Пронянь Лёва ды лелязо, Алё. Лиясто, полавтомга, ойси Петянь Вася. Самозон цёратне прядызь меельце кирьксэст ды перьгавтнесть лишмест. Качадсь ливезень, оень ды олгонь чинесэ.
— Шумбрачи, цёрат! — арсинь верьга вайгельть.
— Шумбрат, шумбрат, онкстниця! — текекс маринь каршо. — Мекс-бути кувать эзить са.
— Тынь меельцеть, секс кувать. Оно зяро уш ютынь. Кода течи, агрегатонк эзь калале? — кевкстинь лишметнень мельга якицятнень.
— Арась. Жнейканок течи прок част якасть! — мария Алё лелянть вайгелензэ. Прядызь лелят-ялакст тевест, ёжост вадря.
— Кавто нормат а лисить? — пеедькшнезь пшкадинь цёратненень.
— Онкстык, паряк, лиситькак, — текекс раксезь ёвтызе мелензэ Лёва.
Юткось тей, Петровка вирь неренть ёнов, байтяк. Тевтнеде ламо. Секс паксятнева-кува течи азгондян ласте. Кабразтомо. Сон а эрявияк. Вармакс ливтнемс а мезть, таркасто таркас [150] юткотне аволь кувакат.
Онкстыя Лёвамезень нуезь умаст, ластинь ды апак капша саинь ёнкс кудо енов. Седеем моры. Мазыйдеяк мазыйкс неяви пертьпельксэсь, авасоло вирь нересь, сёксь енов ваныця паксятне, ломантне, сынст ливтниця вайгелест. Каня кемсисемге иесэ ёжось эрси сюмора'?! Покш эрямос совамонь шка. Учить эйсэть келей-кувака кить. Кодат нусмакалемат?
Састо — а панян, — прясонзо верев-алов кайсезь, эскели Тюжай пичкавтозь айгором кевев, рудазонь а содыця кияванть кудов-кардов. Кирьганзо трокс каия сехте эрявикс кедьёнксом, колмо рсйкннестэ «стазь» сэлем. Сонтемензэ мон — кедстеме.
Кинть кавто ёнга нувси, учи нуема товзюрось. Паксясь келей-келей, мерят валозь, седеяк чиньзельть, сырнесэ. Вановт кецневти. Сельметь а саевить эйстэнзэ. Модась тесэ кевев, аволь сюпавтнеде. Тень лангс апак вано, товзюрось тусто, сэрей, гектарось байтяк максы.
Сырнень толсо артозь паксятнень лангс ванозь, совась мештезэнь эрьгела кайкс, ды серьгедия — васня эстень марямга, мейле седе виевстэ — вечкевикс, самай неть ёнкстнэде, товзюродонть, невтеме сэрей менельденть, од шкадонть мором:
Вай, тень вадря, прятнень састо вадяшазь, Чокшнеланга варштамо тей сакшномс...
Эскели лишмем, эскели-ливти сэтьмечисэ копачазь паксятнень велькска седейстэ лисиця мором. Кунсолыть сонзэ товзюронь нолдазь прятне, сыця чокшнесь, чоподасэнь парсейсэ вельтявиця менелесь.
Се шкастонть саезь монь чачома паксям Седеяк питней кармась ды мазый... — кувакасто таргия меельце нотанть, ды каштмолемась теевсь седеяк тустокс. Апак учо сонзэ колызе — мадемадонзо икеле кучсь тень паро арсемат — паксянь кодамо-бути нармунесь.
Моран, кунсолан, ваннан... Просекенть видьс кадовсь аламо. Просекесь — те паксятнень пачка таргавозь пиже луганарсо вельтязь метрань сэрьсэ модань аржо. 17-не пингестэ кепедевтекшнизе сонзэ тия «сэтьмежа» Алексей инязорось. [151] Веленек сестэ, лисни, Рузонь масторс совавтозь арасель. Сон буень-границянь томбалень.
Аржостонть саезь бригадань кардотнень, колхозонь утомтнень, тингелангонть видьс розень паксясь нуезь. Зярс весе пулттнэ скирдас эзть усксеве. Копонятне, прок чопода-ожосо артозь кудынеть, учить тинге лангс пачтямост.
Велес совамсто кись туи тинге удалга. Ланганзо апак капша эскелязь, Тюжай марто эзинек редяяк, кода пачкодинек сонзэ кудос — кардс.
* * *
Правлениянь-вельсоветэнь «вень прявт», почтальон, бригадань учётчик... Свал «начальник», свал шожда тевсэ. Эряволь сюронь кескавт кандтнемс, ледемс, пултт усксемс... мон — сёрминеть велева кандтнян, экше таркинесэ «трудочить» лован, ловомкайсэ лавсаян-цянкаян. Видестэ теинь? Нузяксчисэ а качады? Паряк, аволь келей лавтовон шаштсть эйсэнь «шождынентень»?
Аволь. Ловномас правтомась — «шожда тевесь» чачокшнось мартон. Авам «чумось». Сон чачтымим конёвс ваныцякс. Мекс истямокс сынь моданть лангс — эзь сода. Монгак а содан. Кияк а соды. Истяман, ды весе. Теке кие-бути пельтнень ендо мерсь: иля нулгоде тевтнеде, варчик эрьванть растонзо; юты шка, ды кармат сындест, эрямодонть, неезденть-марязденть ёвтнеме неень эрицятненень ды мельгаст — зярдо тон уш а уляткак — сыцятненень.
Мельсэнь Джек Лондононь эрямопингезэ. Мезекс сон ансяк арасель, кодат тевть ансяк эзь топавто! Ды, шказо сась, весе таштазенть, весе неезенть, весе эрязенть кандызе конёв лангс. Каня ськамонзо сон? Сёрмадейтнень эйстэ ламонь варчнезь важодема таркаст — керькс. Мертяно, Числав Журавлёв: физкультурник, ушман, бортрадист, геолог, тонавтыця, утомонь ванстыця... Те весе ульнесь сонзэ туртов поэзиянтень материалонь кочкамокс.
Виде, кшникс калгодо, налксиця тулгот ды келей лавтовт сёрмадомань тевесь а веши, сень кис эряви ламо мезе лия, эряви покш ды башка, лия ёнов а молиця потмо вий, кона максневи вельть чуросто.