Эрязденть арсезь (2010)/Свал чийнезь

by Нуянь Видяз

[83]

Свал чийнезь

КИЗЭНЬ пси чи. Кудосонть азортнэ минь, калява, ловт, понкссо чийницятне. Покштне колхозсо-косо важодить, минек трить.

Коля марто лисинек кудыкелев. Тесэ псись истя а маряви. Мезес кундамс? Кузтемань таркас ужотнес эсксэ чавозь трокскетнева, кузтемаванть, ялакскем псакакс кузсь кудопотмарс.

— Э-эй! — каятотсь тосто човине вайгелезэ. — Кундак! Эзинь кенере прянь кепедеме, бизнэвтсь верде чиньжарамонь чуказь пря. Содан, эйстэст тосо байтяк. Мон юрк коминь, автордыя киякссто ёртозенть ды вырновтыя мекев. Коля каршон — лиясо. Понгсь эйзэнь.

— Ужо, ужо, пандса! — рангстынь ды цюхадия казямо, прок сэме, панжакай ёнов молиця лапужа прянть.

— А понгат! Мон васолан! — кенярдозь серьгедсь Коля ды вырк таго ёртсь.

Сонензэ седе ён: тосо чаво чипаня прятнеде — мар. Потмаронь сундерькс чоподаськак тензэ лезды. Ансяк «леднек».

— Вансынек! — эзинь максо пря ды нолдынь Коляс од «панжакай». Понгинь тензэ лавтовс.

— Кирдть! — каятотсь верде.

«Леднинек» вейкенек-вейкенек лангс псилгадомазонок. Весть «ледемстэ» Коля мезес-бути пупставсь ды увол-авол... прась ёртозь чипанянть мельга масторов.

Чиинь эйзэнзэ, стинь ваксозонзо кумажа лангс.

[84] — Коля, Коля, мезеть томбавсь?! Кона таркась сэреди? Каршон — кувсема. Венемсь сэдявкстнэнь лангс.

— Ёвтык, мезеть сэреди? — кевкстнян сорнозь вайгельсэ, монсь а содан, мейсэ-кода лездамс.

— Вана, — кепедизе вить кедензэ, невтизе пря боканзо.

Саия кавалалдо ды састыне-састыне ветия кудыкеле коникентень. Лездынь куземс эйзэнзэ. Кудосто эрязкалезь ливтинь тодов. Апак капша, ёжомарязь путыя прянзо алов.

Аштян стядо ялакскем вакссо. Ванан ловтаня чаминезэнзэ. Янксян. А эряволь ушодомс те апаро налксеманть.

— Сэреди? — кевкстия састыне.

Коля панжинзе сельмензэ, турванзо токинзе мизолкске.

— Юты, Коля, иля мелявто! — кончтынь тензэ. Монсь совинь кудос ды ливтинь кечинесэ ведь.

 

*  *  *

Сеть умонь шкань чапамо-сэпей, ризксэнь кандыця налксемадонок ледстнезь, сакшнан мельс: зяро вий Пазось максы эйкакшонтень, зяро эряви чийнемс, кирнявтнемс, менчевемс, ливчакавтнемс рунгонть виень таштамга-ламолгавтомга! Кивчк шка эзинек аштекшне ве таркасо, свал пильге лангсо, свал чийнезь. Истяко лавшось а касы виевекс. Те сестэ. Умок-умок.

А ней?

Налксемадонок...

Вант ды вант оймамонь асодыцятнень мельга! Теде соды эрьвась. Ней, зярдо чачтави вейкине, ваныть «сяткиненть-горниповненть» мельга зярыя сельмсэ. Илязо пра, илязо пупорде, илязо туеве витев, кершев, илизь... сала, Лиси, эйкакшось кодаткак стакачить яксеме тонавтнемстэнзэ саезь касомазонзо а варчи, а юты. Мезес те сонзэ пачтьсы? Чийни, кортыть, — касы.