Эрязденть арсезь (2010)/Кодамо лем илязо кандтне...
[105]
| Кодамо лем илязо кандтне... |
ИЮНЕНЬ урядамо шка...
Пелюмасонть ахолязь панарот истя начки, куш пурдтник, шкань ютазь, коськезь ливезденть, вельтяви ашо салсо. Теке марто те шкань юткось — покшчи. Лисить луганть лангс ваньксстэ-мазыйстэ оршазь тейтерть, цёрат, пакшат. Ве ёндо ванозь неявить, зярдо срадыть ледеме-пурнамо, ламо тюсонь панжовксокс. Неть читнестэ пидсить покш, содов соргасо ям. Натой прявттнэ лиясто косто а косто сывельгак мукшныть! Кузи-кепети чипаесь менеленть тёкшс ды каяты ярсамо тердиця кшнис чавомадо гайть. Пурнавить курынень-курынень вакантнэнь перька. Кой-кить аштить озадо, седе ламотне — пекекиськест лангсо мадезь. Калдор-калдор сайнесызь пенчест ды ушодыть эйсэст амолямо, кургозост кандтнеме, вачо пекест пештеме. Тантей сывелень пси ямось. Ва, иля пицевть!
...Моргонь пандо алга ды чамаванзо ледеманть прядызь кавто-колмо чиде икеле. Ушосонть пси. Тикшесь коськсь. Урядатано. Минь, Пичепень бригадань «гуйкалтнэ», усксетяно тарадсто теезь усксемкайсэ капамо таркас тикше. Каясак сянгсо штементь усксемкаезэть ды выз-выз моданть ланга усксак капа пряс кепсицятнень икелев. Сявордсак «улавот» — сыргат одс.
— Седе ламо, каня, тенк а кепедеви?! — кайсети прядовиця капанть тёкшкестэ Алькань Дрига атянь эчке, прок пурьгинень зэрть, вайгелезэ. Истя сон, кува пеедькшнезь, кува апак, кармавты тевест топавтомо тикшень кепсицятнень, кеветее-кемсисемге иесэ цёракштнень. — Кода эно тейтерень кутморямо карматадо!
Дрига покштянень тикше пачтинек меельцеде. Ушодсть [106] капантень конянь тееме. Минек бригадань прявтось, «ойнасо» яжазь пильге Сырезень Сега, кучимизь усксеме таркас, козонь карми путовомо од капа-стога. Тейтяно тевенек. Ускинек ёвтазь таркантень весть, омбоцеде, минсь яла ваннотано Веждей ёнов. Эх! Кода пароль ношкстамс экшелямо, чопавтемс весть-кавксть! Арась, теде зярс иля арсеяк. Тикшень урядамо шка. Капшама. Туиндеряй пиземе, нардасы аволь ве чинь перть теезь тевенть.
— Дрига атя чавовсь! Дрига, вап-вай... — каятотсь путозь капанть ёндо авань рангиця вайгель, сонзэ поладызе човор кортамо, шалт. Каднынек лишменек — ды тов, вайгеленть пелев,
...Атясь аштесь кунст мадезь тикше гавара лангсо. Пульзядо аштезь лездасть тензэ — юкснесть сивензэ, карксонзо, витнесть оршамопелензэ — цёракштне, Солаень Ваня ды Чугуронь Толай. Кие-бути аватнестэ кандсь кельме ведь. Кепедизь састыне кувсицянть прянзо, макссть копордамс. Зяро-бути чудирькст нолажтсть кургонзо вакска, начтызь кирганзо. Томбавозенть панжовсть турванзо ды эль марявиксстэ мерсь: «Юты, юты».
Кажонть, кода сеедьстэ эрси, кияк эзизе учо. Яла мерить: «Содавлиньгак — олгт ацавлинь». Эзь сода Дрига атяяк. Калдоронь Миколь кепедсь кувака недь чувтонь сянгсо покш саевкс ды зярольть виензэ рнкстедшеладсиця(?)-сравтнши(?) атянть пильге малав. Эзь рикстедеве, гаварась нолажтсь мекев. Дрига атя кирдиксэлизе ангорьксонзо ды нолажтсь тикшенть марто. Понгсь сянгонь сюротнень лангс ды, прок сэрьс кирнявтниця, вейсэ сянгонть марто бекадевсь мода ёжос.
...Чизэ валгома лангсо. Перьгавтынек лишменек ды сыргинек кудов. Саты. Кой-кодат тевть вандыненьгак кадома. Ардтано ласте. Ютынек Веждей, мельганзо Покш Сельме лейтнень, кадовсь Маклагаяк. Овсе аламо лиядсь «кудозонок» — Пичепень бригадань лишмень кардтнэс.
Мезе лиссь, кодамо карво сускизе эльдем, а содан. Ношкстась пулякс. Карво сускизе? Паряк, симемазо сась? Содык азё! Ливтязь ливти, весень икельдинзе. Зяро виень ускан панстведьменть. Лоткавтан. Марикскак а теи. Прок азаргадсь. Онкстеськак а лезды. Ютавсь кардаз юткось. Видьстэ-видьстэ, эрязадояк эрязасто ардсь кавтов панжадо кенкшенть пелев, свал аштема тарказонзо — кардс. «Комак!» — теке менельстэ каятотсь пилесэнь авань вайгель. Ансяк кенеринь комамо, лишмем кивчк ютась кенкшканть! Аволия маряяк верде ёвтазь валонть, неть кикстнэ идиця [107] секундадонть сёрмадозь авольть уле. Кенкш верьксэсь конядон калгодоль. А чулговоль. Кажонть кияк а учни, сонсь сакшны.
* * *
Сёвныть ней кой-кить аволь умонь «коллективнойтнень» эйсэ. Арасель, келя, эйсэст интерес вейсэнь тевень теемантень, «вейсэнцесь» нузякскавтыль ломантнень, тонавтсть саламо... Виде, берянденть аволь аламоль. Ульнесь, ульнесь истямось. Сёпомс а мезть. А чарькодеви лиясь: мекс беряненть марто тюшумбар яжизь, поркснизь вадрянть? Теке жо тикшень ледема-капамо читнень мазычисткак.
Пазнэнь-кинень а кеман. Лован сынст киткав кенгелемакс. Эно кие, кодамо вий, ды уш аволь васенцеде, стенакс аракшнось сестэ каршон ливтиця куломам икелев? Паряк, Тоначисэ эриця покштям, эли кияк сонзэ покштятнестэ ледстякшнызе лемем ды ёвтакшнызе идемань валонть? А содан. Кие илязо уле, кодамо лем те виесь илязо кандтне, ознан, модас сюконякшнан икелензэ се чокшнестэнть ды седе икеле Казезенть кис.