Эрязденть арсезь (2010)/Кие чумось?
[62]
| Кие чумось? |
УДЫЛИНЕК. Авам совась рангозь, сельведь потсо.
— Эйкакшт, стядо! Варштадояк, мезе умарьпиресэнть!
Минь лелят-ялакст выр-выр ютавтынек панкскестэ стазь сёрмав вельксэнть ды лодорсо ношкстынек модамарь нетькстнэнь юткова янганть умарьпирев. Эзь маряво росанть пициця кельмезэяк. Мельганок сеске сась Надяй патянок.
Эзь кемеве: нешкенек чиремкшнезь-сявордозь, латост ёртнезь, пиже луганть ланга усксевить вельтямо нулатне. Тесэ-тосо авардезевекс бизныть кудовтомо кадовозь мекшть. Теке овто тапинзе-яжинзе кудынетнень.
Ванынек весе тень лангс, седеенек карасть сюмора ёжот. Маней валске, арвонь тансть кошт ды истямо нулгодькс, истямо апаро тев!
Кие тень теизе? Мезень кис? Кежень пандомга?
Тикшенть юткова шешкезь яннэсь всп саизь умарьпирень тона пев. Тесэ видезь кансть. Совинек теке янганть потмозонзо ды малав сеске эртевинек эвсень тевенть поладксозонзо. Тесэ усксевсть сотавтомо-керязтомо яжазь кундот, мерьказь кансть нетькст. Чарькодевсь: ортнэ ойсесть медте ярсамо, кедьгинева сонзэ пештнеме...
* * *
Сакшность пирезэнек кизэнь се вестэнть аволь овтот. Аволь обезьганткак костояк Африкасто. Сакшность... [63] Тетям кадокшнось кото нешкеть. Медесь — медь. Лездась беряньстэ-вадрясто допрок а мендявомс вачочиденть. Седе мейле «овтотне-обезьгантнэ» кадымизь те нежевтементь.
Кие теекшнизе зыянонть?
Апак кундазесь, кортыть, а салыця.
Виде. Ули, теде башка, лия мельгак: велесь — те покш кудо-раське, кинь кодамо поназо-оймезэ — кекшемс а шождыне. Шкань ютазь лангс лисекшнесть медень вечкицятнень леместкак: кавто Петряйть — Тишань ды Федянь. Эрясть кеветее-кемготово иесэ злыдарь неть цёракштне каршонок. Минек умарьпиресь ульнесь аволь меельцекс. Курок сынст кундызь тракторонь стансто керосинэнь саламсто. Ицкавтокшностькак литра-кавто, ялатеке озавтызь. Вейкесь эйстэст — мекев эзь велявто. Кулось тунь од цёракс.
Ламо иень перть эрязденть, се аванькс тевденть арсезь прынь вана кодамо мельс. Цёракштне, кавто Петряйтне, эрясть шабрацек. Кавонест ульнесть вейкине эйкакшт. Секскак тетяст-аваст, малавиксэст пельсть лексемскак лангозост, чарасть перькаст, кольневтсть, кода маштсть. Неть цильнематне яжизьгак пакшатнень уцяскаст, теизь велеванть азгондицякс, салыцякс-колыцякс, теизь пайстомокс.
Неень эрямосонок «вейкинесь» малав эрьва кудосо. Ламот эйстэст, арсян, ламот туить эрямонь киванть тов, ков тусть сеть умонь шкатнестэ Федянь Петря ды Тишань Петря. Кизэнь чопода вестэ сынь яжакшность кото нешкеть. Мезе яжить, сы шка, сынст киява неень туицятне?.. Се яжавксонть покшолмазо онкстави-арась мейсэяк?