Эрязденть арсезь (2010)/Каштлангонь "ойна"
[80]
| Каштлангонь «ойна» |
Каштлангсотано. Коля ялаксом а кады, эци эйзэнь, бажи улемс, седе виевекс, изнямс монь. Мезть педсят лелязот?! Монень уш вейксэ, тонеть — сисем. Каня максса прям?! Каст васня моньшкас.
Те элякалемась лембе кирьпецтнень лангсо та-кода опамсь. Мольсь сон а кувать. Саинь ташто, челькев кем ды вырновтыя весе вийсэнь алов. Мельганзо автордынь карькснэк-мезнэк карь. Сеньгак масторов.
Веженсесь эзь арсеяк кадовомс эйстэнь.
— Мон, мон седе васов маштан! — каятотсь цийниця, кеняркс ёжодо пешксе вайгелезэ эсензэ, вишка, раужо понасто кевердезь кемнензэ ёртомсто.
— Иля арсеяк! — серьгединь ды киякс куншкас пукштядинь та-кинь ашо тюс кем.
— Вант вана! — эзь пота, псилгалесь ялаксом.
— Ваномскак а мезть! — содынь эсень.
«Леднинек», зярс кудо куншкасо эзь тееве кемень, карень, пракстань, нулань оровт. Чельке-е-сь...
Авам котьми каштомикеле.
Эзь цидярдо.
— Лоткатадо-арась, шишигат! Мон тенк... — бырсэ ютась каштланго чирес ды кепедизе ёнонок кши коймензэ.
Минь юрк — «ханас», каштомонть ды стенанть ютксо чаво таркантень. «Окопсотано». Муеимизь азё!
А куш а каш.
Аванок тандавтомань, невтемань кис зярыяксть чукадсь каштлангонь кирьпецтнень ланга ды чошк-чошк тусь моргав тевензэ [81] поладомо.
— Кирдевтеметь, улевельгак тетянк... — мерсь туемстэнзэ мотордозь. Мадинек лелят-ялакст кунст. Мезе теемс седе тов? Кундынь Колянень ёвксонь ёвтнеме. Кунсолы, лексемазояк а маряви. Велявтсь вить боканзо лангс, каизе кеднензэ мештень ланга. Вечки ёвкст.
Ёвтнеман прядовсть. Ней мезе?
Ушов, ушов тенек ношкстамаль! Сокссо, салазкесэ кирякстнеме, лов потсо кеверькшнеме, телень ванькс-экше коштсо лексеме...
Мейсэ? Мезе лавтовот ланга каят? Мезе прязот путат?
Паряк, аволь кирвазеяк «каштлангонь ойнась», аволь зэрнеяк тосо, васоло-васоло чивалгома ёно, алкуксонсесь...
* * *
Превс а саеви! Сеть умонь шкатнестэ кирдсь пакшатнень кудосо, эзь нолда ушов кирякстнеме, чийнеме, кутякснеме аразьчись, келейстэ ёвтазь — «отечественноесь». Те сестэ. Чарькодеви. Кие кирди сынст панжома экшсэ течи? Кие? Мезес пачти апак лыка, ве таркасо аштезь эрямось — чарькодеви.
Кие эно кирдицяст эйкакштнень, кие тертинзе?
Васень озавтыцякс ульнесь радиось. Шкань ютазь арась ваксозонзо, теке пистень, телевизорось. Мейле шаштсь ваксозост виевдеяк виев компьютерэсь. Лездасть сыненст човсеме удемтнень минень-сюнонь «аудиотне». Сынь ноцковтызь вишкинетнень ды покштнень кедьстэ книганть ды кармавтызь чинек-венек тарномо «ящиктнень» икеле. Кодат книгат, кодат курот-ульцят! Шка арась!
Стака ловомс, мезе седе ламо кандсь ломантненень икелев, ансяк икелев бажамось, лиякс перемс, прогрессэсь. Кортыть, седе ламо кандсь пародонть. Кода меремс... Кие соды-ёвты, мезе кази течинь «парось» ванды? Ков сон ветясы мода-масторонть?
Эрязденть арсезь истят мельтькак сакшныть тень. Паряк, мерян, «каштлангонь ойнась» ков седе пек эрявсь «телектнень» ды Интернетэнь «точка-рутнень» коряс? А содан. Теде ёвтыть монь мельга сыця шкатне. Невтьсызь, кодат умарть кастась удалов апак варштне бажамось.