Эрязденть арсезь (2010)/Ильтемань вастома
[34]
| Ильтемань вастома |
ТАЛАЙ чокшне.
Кудораськень сехте «покштне» — мон, вете иесэ Коля ялаксом ды колмо иесэ Веруш сазорнэнек — каштлангсотано. Кудосонть пейсэнзэ чикорды ниленьгемень васенце иень ацамковонь азарсь якшамось. Ужотнесэ цивтёрды ды пек тандавтни лекш. Идицянок каштлангось. Сон — минек куш аламнеде эждиця масторонок. Мезес пачкодевлинек сонтемензэ? Стенас чавозь эекс понгавтозь содовсто типельдиця лампа. Толгельнезэ пикстерди эль марявиксстэ, эйстэнзэ лисиця содонь суринесь менчеви коштонть тей-тов анеявикс якамодонзо.
Минь «лембе масгорсо», авам ды Рая патянок, маряви, котьмить-калдордыть каштомикеле. Чувто лангсо «озязнэтнень» тутмаст, эль кенери валске ашолгадомо, пештямат. Мезде? Теде арсема аванень.
Апак учо панжовсь — лагорк мерсь — кенкшесь, ды якшамонь тусто сувонть марто кулдор-калдор совась ломань — тетянок!
— Я! Ды косто истя тон?! — моргасто лисемстэ ве вайгельсэ серьгедсть абунгадозь авам ды патям совицянть каршо.
— Самай, Васют, тосто, — пештизе кудонть вайгельсэнзэ, — пеедькшнезь пшкадсь тетям, — васоло ёнкстнэстэ, «окопсто».
— Каик ланга оршамкат ды — каштлангс! — мелявтозь мерсь авам. — Каик седе курок. Ушосонть якшамо — варакаяк а ливтяви.
Тетянь прясо кедень шапка, пилетне сюлмазь уло алга, кувака пальтонь ревень кедень сивезэ кепедезь. Мештезэ лекшенть эйстэ ашолды.
— Ну, кода тынь, озяз пизэ, нолгонк эзть кельме? — кайсемстэ, тулос-козонь оршамонзо понгавтнемстэ, эрьведезь пшкадсь тенек тетям.
— Монь ара-ась, — каятотсь Верушонь човине вайгельнезэ.
— Тесэ минек лембе, — яволявтсь Коляяк.
Кецнемадонть шалнозевинек. Эно кода? Аволь костояк, «окопсто», васоло Сурачирестэ сась трицянок-кастыцянок. Сась тосто, косо эждицякс тензэ ульнесь коймесь, ломось ды узересь.
Тетям кайсесь-тейсь, ютась каштомикелев ды мейле кузсь ваксозонок. Эжнема пандонок — тыц. Покшт-вишкинеть... Кадык, истя седе лембе. Лембе вастовомань кеняркстонтькак.
Курок авам кандсь Сурачирестэ туезь казне: суликань пель-литрань кедьгесэ томатонь соуссо соянь товт. Эзь стувто [35] сиянь пенчкеяк. Вейке. Вейкесэяк банкась чамсь лип меремс. Истят тантеельть, истят тантеельть товтне! Келеть нильсак! Ансяк аламольть...
* * *
Се телень чокшнестэнть превскак тенек эзь саевкшне: тетянок марто, цёраломанень вайгелень марязь, эрятано меельце чи. «Окопсто» сонзэ тердекшнизь «ойнав» саемга. «Ковгак а сайсамизь монь тевслявтнснь марто, — яла оймавтнесь сон авань, — содасак, монь шумбрачим кодамо: ках-ках ды ках-ках! Эзть лезда а калонь куясь, а тувонсесь, козан икелекс, кодамо ушман монь эйстэ». Авань ризксэзэ неть валтнэсэ эзь потавтово. Седеезэ марясь — сайсызь.
Саицятне эзть вано мезе лангскак.
Чиньперть ютксонок улемадонзо мейле тетянок уш зярдояк эзинек некшне. Палсь азарсь даволонь толсонть коське чевнекс. Те ульнесь 1943-це иень якшамковонь 16-це чистэ Ленинград маласо Синявина велесэ.
Лиясто, маряви, седеем сезеви эсь пачкан ёвтазь валтнэде: «Мезень кис? Мезень кис? Мезень кис?» Сакшны сынст таркас лия кевкстемаяк: «Кинь кис?»