Эрязденть арсезь (2010)/Диамат Сура чиресэ
[245]
| Диамат Сура чиресэ |
Кизэнь пси чи. Пси лиядояк — зярыя чинь перть максома зачётт ды экзамент. Сура чиресэ, куракш алга ацазь шожда велькс лангсо ловнотано, анокстатано содамочинек невтеме колмонек — Женя Большаков, Коля Кулавский ды мон. Наукань гранитэнть портяно. Эрьвась эсензэ курыне ало. А безардемс, а налкставомс вейкень-вейкень туртов, седе ламо совазо книгань ёнкскетнестэ колганозонок.
— Саты, цёрат, секень вант, превтне лаказевить, шказо лёй-лёй! — серьгедсь Женя эсь «нупальстэнзэ» ды дубор-дубор, теке од овто, чийсь леенть турвас.
Миненекак эзь саво меремс омбоцеде: сеске юрк-бырк ожо чувар чиренть пелев.
— Кие мельган! — серьгедсь Женя ды киньгак апак учо бул-дырк кирнявтсь ведентень, уйсь «кискакс» куншка видьс ды таго пижакадсь: — Онкстаса, кодамо сэрезэ!
Цёрась кепединзе кедензэ ды гирякс тусь алов. Секундат, ды веденть потсто одс лиссть прязо, кедензэ.
— Несынк?! — рангстась кецязь ды кедьсэнзэ цяпазь веденть ланга.
Шлёборь-шлёборь совинек миньгак Коля марто. Ведесь лембе, чевте, сапоньгак а эряви, теке пиземень. Череть вадрясто шлявить — чевтемить-кавшакадыть.
Соват кирьга видьс — неявить пильгесурот. Редявить, кода вакскат юв-яв укшныть сэперькинень кесакт. Аволить лисеяк!
[246] Аволить ды сави, тевтне а учить. Экшелямось — оймсема, чинть ало чентямодо мейле рунгонь экшендема. Тевесь — кадозь панжадо книгатне, конспекттнэ, авторучкась.
— Саты пулькамс! — серьгедсь Коля-эрзянь цёра чирев уемстэ. — Шка превть кочкамс, алят!
Укшномадонть стакасто лексезь, лисинек ведьстэнть, чиезь чиинек луганть ланга ацазь сёрмадома «стуворонок» экшс. Чинь ютазь — ВКП(б)-нь история. Те аволь эрьгелема. Экзамен! Содама, зярдо, косо, кодат ютасть съездт, конференцият, пленумт-мезть сядо иень перть, содама, мезде кортавсь эйсэст ды кить ульнесть кортыцятне. Кирдема тень весе превсэть.
Тукшныть мелезэнь тонавтнема книгасонть пелькстнэ, конат явозь диалектикань материализмантень ды историянь материализмантень. Васенцесь седе пек. Философия... Мода-масторонть лангсо, менельсэ ды Каргонь Кисэнть молиця полавтневематнеде покш, вейсэндязь мельть, келей чарькодемат, арсемат-койть... «Мекс эйсэнек теде аламо кевкстнить? Мекс неть пелькстнэ натой сёрмадозьгак эль неявикс шрифтсэ? Мекс школасо, кемень иень перть, «философия» валонтькак кекшнесть?» — кевкстнян эсь прям ды салава, эсь пачкан ацирьгалян.
...Чиинь ВКП(б)-нь историянть максомо валске марто, эль а чоподава, васенцекс. А вечкса, те аволь монь корсо — тарномс, ёмавтнемс шка кенкш удало! Час, кавто, пельчи... Зяро шкань перть сорнозь, ёмсевтьсыть колмо чинь перть таштазь содамочитненьгак. Секскак...
Совинь.
— Здравствуйте!
— Здравствуйте! — мизолдозь мерсь каршон, кецневтимим чевтестэ ёвтазь валсонзо, Татьяна Михайловна Вилячкина доцентэсь, Пенза ёнксонь эрзянь авась. — Возьмите билет.
Саинь. Озынь. Ловнынь кевкстематнень. Васенценть, омбоценть — содасынь, колмоцеденть а мезть арсемскак. Сон «Диалектика» пельксстэнть: «Переход количества в качество как философская категория».
Ловт, апак анокста, цярсо ёвтнинь билетсэть кевкстематнень ды «ниле» марто лисинь коридорс. Тесэль малав весе курось-группась.
— Зяро? — васенцекс серьгедсь Женя Большаков.
— Сатыть монень! — згилязь вития мелензэ. — Мекс а соват?
— Вейкень ютазь. Коля вана, мельганзо мон, — ёвтызе [247] мелензэ кедем лепштямсто.
— А пух тенк, а толгине! Мон вейсэнь кудов! — меринь каршо ды сеске туинь оймсеме.
Эрьванть обуцязо, чачозо, мелензэ-коензэ эсензэ. Монь — эрьва экзамендэ мейле эцемс велькс потс ды часос-кавтос теевемс оякс удомань пазонть марто. Вант, илямак токше. Лия, седе лезэв ормаменькс а содан. Стян — а прянь сэредема, а лавшочи, теке эзинь стомавояк колмо чить книгатнень велькссэ.
* * *
Содындерявлиде, эрямопингем перть зяро «поринь» эрьва кодат наукат, конатне мезекскак тень эзть маштово! Теке ВКП(б)-нь историясь, съездэнзэ-пленумонзо марто, минень-сюнонь тригонометриятне... Эли эрьвась куш аламнеде маштовсь тень? Лездась-эзь мейсэяк сюпалгавтомс содамочинь кудом? Чарькодема: школась аноксты эйкакшонть келей паксяс лисеме. Секскак содазо ламо ды эрьва мезде. Те виде. Ансяк аволь педе-пес. Содамочитнень максома аволь весенень вейкетьстэ. Ванома кие-мезес седе чарькодиця. Кона тонавтницясь, мертяно, седе кол кортамонь дисциплинатнесэ — кель, литература, история... — химиясь, физикась, математикась... максовост лия программань лувсо, седе киртязь. Мекевланг, кить эйкакштнеде седе дошузт математикатнесэ-физикатнесэ, максовост седе домкасто.
Орданьбуесэ сисем классон прядомсто, мейле колмотнень «чалгинь» Дубинькань куншка школасо. Кодаткак башка программат арасельть. Те берянь. Весень «нарасть» вейкетьстэ. Эзть кочксе, эзть вано, кинень мезе макссь пазось, кинь-кодат превень уликсчинзэ.