Эрязденть арсезь (2010)/Вастовома ламо кизэнь ютазь
[231]
| Вастовома ламо кизэнь ютазь |
Якан-пакан микшнемань лавсятнень юткова. Гользерт, гладиолуст, тюльпант, вишпилявт, куконь эргть... Мазыйть! Пусминетне озавтнезь ведь марто банкинева. Эрьвань эйс нежедезь лазпе. Эйсэнзэ тешкстазь: вейке целковой.
Кепедия цивторкайтнестэ вановтом ды таймаскадынь.
Лавсянть тона ёндо вансь лангозом... Рая!
Тук-тук-тук — капшазевсь седеем. «Паряк, те онстом, Верепаз?» — яла тень эзь кемеве.
Покш сельмензэ, Якстерть чевте турванзо, чачозо, кода ули, Раянь. Чаманзо кавто ёнга яндавинетнеяк сонзэ. Ашназа черензэ кодазь пулос ды нолдазь мештеванзо.
Икелем аштесь панжовома шкам. Вансь лангозом се, кинь марто кунсолокшнынек, кода зорятне пелькстнесть цёковтнень марто.
Ванынь тейтеренть лангс, зярс сон эзь визделгадо.
«Он те эли аволь?» — таго ютась прявам.
— Вана те пусминенть монень, — окойники сынь ёжос ды теке аволь эсень вайгельсэ пшкадинь микшницянтень. Венстинь тензэ кавто целквойть.
Аволь сэрей, кирькс чама мазыйнесь варштась талакадозь лангозон. Сурсо таго невтинь балягатнень лангс. Чарькодимим ды венстизе, мезе вешинь пельдензэ.
Меельцеде варштынь балягань микшницянть сельмс. «Кодат сынь сэнть, кодат домкат!» — меринь марямга ды саинь эйстэст вановтом. Лепштия мештезэм питней рамавксом ды сыргинь ортатнень ёнов.
Пилем прок потомсть: эзь маряво тень найманонь минень-сюнонь шалтось, эзь неяво перькам эвтемаськак. Мон прясто пильгс ульнинь те шкастонть васов кадовозь Од шкань масторсом: кедте кедьс кундазь, апак эряскеле мольтяно минь Рая марто ломантнень юткова ды кортнетяно эсь юткованок икелень эрямодонок...