Эрязденть арсезь (2010)/Бутрав лисьмапря
[133]
| Бутрав лисьмапря |
Ве парта экшсэ аштетяно мон ды Оверь Миколь, омбонь-кирдань лелям, Марфа патянь колмоце цёразо. Удалонок, лексить човонезэнек, Куконь Коля ды Васькань Коля. Эйстэнь ютавксонь трокс, вить ёно — Захаронь Лиза. Лиссь истя: котоце классо тонавтниця ялган малав весе иеде-колмодо мондень покшт. Сынст коряс одан. Кие каднызе тонавтнеманзо, кие аволь вейке ие ве классо превть таштась.
Эрзянь келень урок. Учотано Екатерина Андреевнань. Панжовсь кенкшесь, ды сонзэ таркас прянзо невтизе свал шкадо мейле сакшныця Кендялонь Палю.
— Ха-ха-ха!
— Хо-хо-хо!
— Хи-хи-хи! — классось шалнозевсь ракамодонть, куш ульнестькак эйстэнек, тонавтницятнеде, кемгавтовошка.
Палю сеске эзь содавояк. Вейке шапка пилезэ сезезь, цяк кирдеви. Пилезэ раужо, Раужо судопрязояк. Ваднезь содсо. Палюнь чама [134] киськесь истякак чентяка тюс, содось седеяк «мазылгавтызе».
— Цёрат, негра нейниде?! — рангстась «сыретнеде» вейкесь, Пошань Юрик, згилицянь прявтонок, сурсонзо кенкшенть ёнов невтнезь. — Пеензэяк негракс ашолдыть!
Каршо:
— Ха-ха-ха...
— Палю, мекс чамат теке негрань?! Аволь Африкасто сыть? — эзь кадово Павол Васька, згилямо омбоце маштыцясь. — Аволь каштом почкос прят нерьгстник?
Палю киньгак лангс апак вано выр-вар ютась ды лоцьк озась тарказонзо.
— Мон... ды мон течи стувтыя чамам шлямс, — цёрынесь бажась идемс прянзо, теке эзинек сода атяка псакакс азгондямонь тевдензэ — тонавтниця ялганок, прок од, покш цёра, яки банява... васта вешни.
Панжовсь кенкшесь. Совась Екатерина Андреевна. Теевсь општ.
* * *
Ламо-ламо иеде икеле минек велень од цёратне ды тейтертне пурнавкшныльть чокшнень ютавтомо, теке марто штердеме-викшнеме, моронь морсеме аштемкудос. Мейле велетнес састь попт-церьковат. Эсест койть-илат тейсть. Шкань ютазь сынст «чиевтизь» церьковань яжицят. Од власттне панжсть клубт ды ловнома кудот. Ялатеке аштемкудонь оймесь педе-пес эзь венемкшне. Якшамо шкатнестэ од ломантне клубто мейле вастневсть... банясо. Шлить-парить уштыцятне, туить кудов. Лембесь кадови. Тарказост шкань ютазь либорк сови од шкась. «Ашо банядо» кортамоткак арасельть. Секскак содось, прят кода иля вансто, педиль.
Ульнесь, текенекс, истямо пеедькшнемань-нарьгамонь кой. Сыть лия пень цёрат, нежедьсызь ушо ёндо баня кенкшенть, таргасызь вальминенть, ёвкстыть олога ды ушодыть шолодеме. Толонть мадстьсызь, кепедеви ций-буй, рангамот. Содось потолоксто-косто валги-пры раужо ловокс.
Палюяк, семиясонть вейкинесь, котоце-сисемеце классо тонавтниця, допрок эйкакш, сюлмавозель банянь тевтнень марто. Секс сакшноськак школав «негракс». Тонавтнемадо... Екатерина Андреевна, кода лиятнеяк, эзь кевкстнеяк эйсэнзэ. А мезть, шкань ёмавтнема.
[135]
* * *
Аволь аламо иень эрязь, ламо-мезень неезь-марязь, ловнозь, чарькодия: вейкине, налксезь-кольневтезь трязь пакшанть пельде паро иля учне.
Уцясказоль Палюнь авольламбамо-ризанятнеде. Яксинзе сисем классонзо. Важодсь кудоюртсо, колхозсо. Банява шатамотне стяко эзть ёма. Урьвакстсь вельть одсто. Тунь одсто нидензэ псистэ кутмордызе палыведень суликанть. Авазо козонь ансяк эзизе кекшне чапамонть — сюродо пешксе кескавс, мода потс, ведьс, шукшпряс, — Палю ялатеке муилизе. Сонзэ вельде муизе эсь пензэяк. Телень куншкане шабразо пурнынзе куринкань цёратнень вирень керямо Николаевка вирев. «ДТ»-сь ды эйзэнзэ понгавтозь нурдось учость вальмало. Туемадо икеле, кода свал, «рестасть». Тувтал эзть вешнеяк: а кельмемга. Те «рестамодонть», те «а кельмемадонть» Палю понгськак сявориця чувто алов. Вейкине эйкакш...
* * *
Петряйнень ниленьгемень ветешка. Сэрей, раужо сельме, мазый, шуморкс цёра. Сурксокс менчевезь черензэ кувакат. Содавольтькак сурсеме... Шлямодо-нардамодо, седеяк тельня, иля кевкстнеяк. Секс чинесь мазый черень кандтницянть эйстэ судос эци пельвайгельпень ютко. Ломанентень, комицдеряй стопканть вельксс, каиндерясы прянзо симемантень, мезеяк уш тензэ эрявомо а карми. Текеде цёрась кадовсь ськамонзо. Чуросто, вельть чуросто эрси Петряй эсензэ превсэ. А коськени, кода кортыть. Стопканть кис анок эрьва мезес, ансяк муемс, ансяк начтомс кирьгапаренть.
Петряй меельце шкас эрясь аванзо, Катя баба марто. Пайстомо авась аволь умок кулось. Тов панизе... вечкевикс вейкине цёразо. Марсевсь, аволь ансяк чинек-венек глохтямосонзо ильтизе тиринензэ, мокшнасояк, келя, лездась тенень.
Катя баба кирдсь скал. Кодамо симагай цёразо илязо уле, тикшине, кармавтозь-нернезь, анокстыль. Азораванть тевезэ — симдемс-андомс, потявтомс, ловсонть тевс нолдамс.
...Икельганок васов капшиця асфальтонь кинть ланга юты ашназа-тюжа пона капашка скал. Ловсозо, содыть велесэнть, вельть вадря, малав пелезэ эйсэнзэ — велькс.
— Му-у-у... — прясонзо тей-тов велявтнезь, рангстась сюракшось. — Му-у-у... — пары, макссь вайгель омбоцеде, колмоцеде. Сонсь тей-тов ванны. Арси-арась кияк вастомонзо?
[136] Вайгельсэнть маряви ризкс ды пеняцямо. Паряк, истя скалось азораванзо лайши? А терди? «Косат, косат тон?» Эли одарось тороземсь, ды паравты. Содави — тороземсь. Содави — сэреди. Апак потявто кода а сэреди. «Косат тон, Катя баба, сак, потявтомак!» — маряви монень, кевкстни, энялды сюракшовось.
Кияк эзизе маря. Аштесь-аштесь, ютась Шалань сэньстэ артозь кенкшенть пелев. Парамодонзо лисиця эзь учово. «Ней ков? Мезе теемс? — превть яжи, стомави лездыцянь вешницясь. — Молян Укшторнэнь, паряк, чарькодьсамизь». Весть-кавксть паркстась ды. пулосонзо брикстяезь, стамбарнэ сыргась Укштортнэнь ёнов.
Пижаень Катя. мейле Катя баба, нолдакшнызе нилькскензэ «ольной валдос» ниленьгемень вете иесэ. Кастсь-трясь Петряень ськамонзо, сорнось велькссэнзэ, пельсь лангозонзо лексемскак... Пайстомо эйкакш.
Палю ды Петряй... Дух вейкест-вейкест асодавикс ломанть. Чачома велест явить сядодо ламо вайгельпеть. Аволь кирдажт. Вейкесь сырс омбоцеденть 20—30 иеде, вейкесь валдо тюс-черь, омбоцесь — чопода. Вестькак эзть вастневе.
Вейкетинзе, теинзе сынст малавиксэкс чаравтыця ведесь. Ушодксокс те бутрав лисьмапрянтень ламонь кувалма ульнесь вейкине эйкакшчист. Кист сынст вейкс, вейке песткак.