Эрязденть арсезь (2010)/Берянесь вадрявтомо а эряви...
[170]
| Берянесь вадрявтомо а эряви... |
«БАКУ, Баку...» — зярыяксть вагононть кувалт ютамсто яволявтсь кондукторось, ды аволь ве чинь перть «эрицянзо» апак эрязкале, кургонь автнезь ушодсть курмост-кармост, котомкаст-юдмаст анокстамо.
Шкань ютазь ильтицясь-кондукторось, раужо, чикуншка ёнксонь тюс чама, зяро сэрьс, зяро келес аваломанесь, панжизе кшнинь, меште видьга суликань вальмине марто кенкшенть. Вагононь. Монень — Покш Эрямов.
Валгинек кодамо-бути Забрат вишка станциинес. Чикуншка ёнксонь опаня ве. Чопода. Эйстэнек ве ёнга тия-тува цивтёрдыть палмань прява понгавтнезь лампочкат ды сюконякшныть кодат-бути раужо, пелезеват, сулейть. Те мезть истятнэ? Кодат чопачат? Мольтяно, Моргонь ломантне ды мон, тей-тов менчевиця, цяк неявиця яннэва. Горобиям марто мельгаст эль кенерян. Ожапесэнь секе тев нардтнян конястон ливезенть. «Ков истя капшить? Курок-аволь прядови чоподаванть те чиемась?» Савсь эскелямс кодат-бути трубатнень велькска, сэдявкска. Окойни-киливезь калеман прядовсть: яннэсь ливтимизь башка аштиця, вейке этажсо, кумбря кевстэ вачказь кудос. Икелензэ стявтозь палманенть прясо чатьмонезь цивтёрдсь лампочка.
Валске марто, зярс азортнэ пурнасть-сэрнясть ды анокстасть валскень ярсамо, лисинь аламошкас кузтемпес. Перькан неезденть аймельгадынь: ков а варштат — вышкат-сэрькайть, веть неезь раужо сюконякшныцятне — потякайтъ, моданть потсто нефтань таргицят. Вана кодамо сон, Бакусь! Те аволь Саран ош, аволь Куйбышевгак Пенза марто вейсэ. Куншкастонзо саезь эрьва ёнов [171] ламо вайгельпень ютко — нефтань таргамонь промыслат. Эйстэст вейкенть маласо, неть вышкатнень ютксо, удыньгак.
Азоравась ёвтнизе, мейсэ ардомс, кода муемс Раманы эрямо тарканть, косо эрить сырепатям ды цёранзо — Витя, кона тень сави лелякс, ды котоце классо тонавтницясь Коля. Якамс, кевкстнемс, вешнемс кувать тень эзь саво. Муия те самай Рамананть, сон авасололь.
— Вай, авакай, ды косто ты нашёлся, цёрам?! — кудозост совамстон, кеняркстонть ды талномадонть вайкстнесь, чиремкшнесь прянзо сырепатям.
Кутмордымим-палымим. Тусть, эзть кирдеве сельведензэ. Кода а кецнемс?! Малав колоньгемень иеть Бакусо эрязь, киньгак эзь некшне чачома велестэнзэ! Ней эзь кемевеяк тензэ: икелензэ сазоронзо цёра.
— Велестэ, сырепати, Орданьбуестэ! — меринь каршо ансяк прядовсь кутморямонок. — Сёрмам сакшнось?
— Арась, нет, эзинек получа.
Зяро иень перть сырепатянь келезэ допрок човорявсь: вал — эрзякс, вал — рузокс, кортамонзо прядсы азербайджанокс. Цёранзо шождынестэ кортыть рузокс ды азербайджанокс, эрзякс тенст а ёвтави валгак.
Самстон сырепатям ёвтась истямо куля: «Театрань институтсто, козонь кучнить саемадот конёвот, кучокшнызь миненек, тосто пачтясть: рузонь отделениясь пекставсь. Секскак конёвот кучинек Орданьбуев». «Тевть!» — эль эзь кирнявто кургстон. Зепсэнь вельсоветстэ саезь нулав справкине. Ков сонзэ марто? Мезе теемс, а содан. Куш мурдак кудов. Эно ков, паспорттомо ды лия документгэме? Милициятне чочатадызь, кончтамо а кенерят. Эряви прописка, паспорттомо теде иля арсеяк. Кадови вейке — мекев, цыганаватнень валсо, кувака ки.
Кудов? Мекев? Те — потамо. Цёрат истя а тейнить. Арась, арась, истя а туи. Мезеяк лия теема, муема кенкш ды кодаяк лисема те зыянстонть.
...Зярс учинь, а те аволь ве ков, васоло-васоло чачома велестэнь паспорт, савкшнось кекшнемс милициятнеде. Те шкастонть, сельмест икелев а понгомс, сырепатянь марто якинь колхозов важодеме. Эйзэнзэ эрямо таркастонок, Раманасто, колмошка вайгельпеть.
Кочкинек виноградт, инжирт, арбузт. Исяк копонямо таркас арбасо, кавто чаро лангсо крандазсо, усксинь шужонь олгт. [172] Паксятне тесэ вишкинеть. Сюро виднить аламо. Секс мерезь тевесь теевсь ве чис. Течи макссть лия наряд; валномс помидорт. Сынь тесэ ойсевтевить аволь пандява — лашминева. Певаст — арык. Тень туртов эзганзо чудиця веденть сёлтнема коймсэ ды нолдтнема лашминетнева. Котьман мельспаросо. Тевесь ледстневти эйкакшпингем. Чадыведь шкава чувтонь койминесэ теке ладсо пирсекшнинь-нолдтнинь чудикерькст. Кода те умок ульнесь!
Виноградт, арбузт,инжирт, баклажант, фисташкат... Аволь неемс, истятнэде аламо савкшнось ловномс книгастояк. Ней, вантая, ярсак седееть витемс. Порть зяро кельги. Порть нильтякадомазот. Помидоронь куракшкетнень алга-юткова мезе-бути, ванан, лыки-яки. Вай, ды те черепаха! Эртевинь левкскезэнзэ. Эйдень кедькоморошкат. Налкшкеть. Путыя вейкень зепезэнь ды поладыя ведень пекстнемань-панжтнемань тевем.
Чикуншка. Пурнавинек ве таркас. Свалшкань важодицятне, азербайджанаватнс. озасть сэрей рацяня чинара алов, сулейс, ярсамо. Муинек озамо таркине сырепатянь марто миньгак. Таргинек юдмастонок кшинек-салонок. Аватне, редия, мезде-бути музгордезь, верьга вайгельть кортазевсть эсест кельсэ ды кивчк-кивчк варштнесть кежейстэ монь пелев. А чарькодян.
— Мезе тенст а саты? Мекс гуекс варштнить лангозон? — пшкадинь сырепатянень, учан.
— Озак лия таркас, седе ве ёнов, — тошкстась сон ды венстсь тень ярсамопельстэнек кой-мезе.
— Мекс? — таго эзинь чарькоде, кевкстия стямсто.
— Сынст коест коряс, цёрат ды ават ярсамо вейсэ а ойс__тть.
— Оно кода... Асодылинь, — меринь аламнеде абунгадозь ды полавтыя ярсамо-симема таркам.
* * *
Сырепатянь ды кавто цёранзо марто вастома. Покш, шалныця ош, вестькак апак некшне эмежть, умарть, чувтт, лия чама тюс ломанть, ачарькодевикс кель, асодавикс, тамашань койть, допрок лия, васоло таркасо эрямо... Те весе маряви тень ней, ве ёндо ванозь, ламоксть вадрякс беряненть — эзинь понгокшно тонавтнеме — коряс. Ней, зярдо киртятотсть кадовозь иетне, седе келейстэ карминь содамо артистэнь «шожда» эрямодонть ды стомамодо пешксе профессиядонть, ледстнян се «берянденть», институтс а понгомадон, паро мельсэ. Куш виде теяк: [173] аволь таркась мазылгавты ломаненть, ломанесь — тарканть. Арсян, эрямосон се аволь кувака ды аволь покш пельксэсь ульнесь алкуксонь, седейс педиця тонавтнемакс.