Эрязденть арсезь (2010)/Авам - седеяк...
[14]
| Авам — седеяк... |
ТЕТЯМ вечкилимим. Кавто тейтерде мейле—цёрыне. Кодамо тетянь мель те а вити, а кецневти?! Кода а кецнемс? Сась кудолемень поладыця, азор. Шкань ютазь, зярыя иень топодезь, сайнесь мартонзо паксяв-ков, казнесь налкшкеть, шка пракшнось — налксесь. Вечкилимим тетям. Лиясто кольневтськак.
Тундонь се мазый валдо чистэнть, нармунень морамо шкасто, сон сакшнось косто-бути васолдо. Усксь тень казнекс оршамопельть: нурька, кумажадо верьга, кавто зепине марто понкскеть ды нурька ожа панарнэ. Тюсост валдо-якстере, чахмат-чахмат. Мелезэнь пек туекшнесть кедень цитниця котынетне. Аволь карсемкайть — таташкеть!
Оршневтимизь. Ошонь цёрыне! Някине! Авам ды кавто патян кецнесть мартон, ванкшность, витнесть лангсон оршамотнень, ладсесть-валакавтнесть черень. Парт, парт казнетне!
Эйкакштне весе мазыйть, весе парт, превейть. Косто эно мукшновить тюгайтне-идемевстне ды чаулатне? Сюкпря Инешкипазонтень, эзизе тее истямокс, ванстызе се, нурька понкскесэ ламо-ламо иеде икеле чийниця ашо пря цёрыненть.
...Пурнымизь-сэрнимизь, ды ношкстынь ушов.
Эрьва кодамо тюссо гайгиця панжиков. Чипаесь налксезь налкси налсонзо. Пеедькшнезь палси чувттнэнь, каршонзо ваныця [15] вальматнень... Перкайть лишмесэ ливтнить умарь чувттнэнь удало модамарень пирезэст навоз. Кодамо мельспаро — ардомс крандазсо! Сасыя пешксе улавонть ды поводинь удалов лисиця паймепетнес. Паро! Алёш атя эзизе редяяк тень. Фатясь таркас пачкодемстэ. Эзь мере мезеяк. Сявордызе ускозенть. Тагояк чатьмонезь кепедимим чамдозь вацев облоконтень, ды сыргинек мекев. Паро, те аволь паймес поводевезь! Истя, тов пешксе улав прясо ды чаво облоксо мекев, ютынек зярыяксть.
Мазый, ошсо стазь понксон-панарон, тетянь казнензэ, патянень эзть содаво. Лангозон ванозь, кундатотсь келезэ. Прясто пильгс ваднезилинь рудазсо. Чинеськак эйстэнь качадсь аволь панжиця ламарь чувтсто. Судоварят кутсти. Якстере цитниця кота алксозон педясть навоз кувот.
Авам... абунгадсь. Рукштядинзе кедензэ. Вансь лангозон ды эзь сода, мезе меремс. «Вай, вай!» — лиссь ансяк кургстонзо, ды сеске кундась кайсевтемень. Патям лиссь ушов котастон рудазтнэнь коцькереме.
«Лопавтнемень» тирям эзь карма. «Эрьбамодо» — кортамскак а мезть. Сурсояк эзимим тока. Вечкимим тетям, цёрань вечкемасо вечкимим, превеель; авам, ней тень сыречисэнь маряви, — седеяк.