Эрязденть арсезь (2010)/"Вень бояр"
[73]
| «Вень бояр» |
Пек стакальть, веревельть-сельведевельть ютазь пингень ниленьгеменце иетне...
Теке марто, неть стакачитне ульнесть эрямокс, сонзэ лувокс, сынь тонавтсть а максомс прянть вачочинтень ды лия кажотненень. Ульнесть, седеень сезниця апаротнеде башка, згилямот-пеедькшнемат, марсевсть, васняяк чокшнеланга, мороткак. Шкась мольсь, «вадрятнень-берянтнень» эзь кевкстне.
...Колхозонь конторась, текекс велень советэськак, эйстэнек ниле-вете кудонь трокс. Ве кудосот. Авам сиведизе прянзо урядыцякс. «Тарадонзэ» эрявить трямс. Яла зярыя «трудочить» иезэнзэ таштавить, яла маштовить. Авань таркас, та-кода сон сонсь истя лиссь, те «должностесь» шаштсь монень. Шаштсь ды вете-кото иетьпивтинь, топавтынь лангозон «вачказь» тевтнень, ульнинь аволь ансяк чинь, вень «боярокскак».
Кирдевсь истямо кой: эрьва чистэ лия-лия кудосто Советсэ улезэ кучнемапелекс, дежурноекс, ломань. Тельня ды лия якшамо шкасто пильсян сонзэ марто пенгть, лазнан пилязтнень. Узересь эседень стака. Ялатеке цюркатнень изнян, седеяк пек, зярдо [74] сынь начкт ды ушосонть цят якшамо. Бах-бах — псилгадомазон, пукштяян эйсэст. Лазновкстнэнь мейле костян голландка прясо.
Чокшне, кежей телетнестэ валскеяк, конторам уштома. Чевень свал анокт. Коськть. Ванан, уряд кирдян чентякай, суликавтомо лампанть мельга: кайсян керосин, полавтнян тесьманзо, седе тов, войнанть прядовомсто, нардтнинь пузыртнестэ содонть. А эряви стувтнемс урадонь васень кирдицянть — тенсттенть. Чизэнзэ кавтошкаксть кияксонть «ютама».
Удсян теске, «учреждениясон».
Яви голлацдкам, пекстаса почконть-турбанть, порьсынь седь потсо пидезь, зярдо улить, модамарнем ды, уроком теемадо мейле — коникланго. Сон совамо кенкшенть вакссо, голландка кургонть каршо. Седелембе. Кендем — лазт,тодовом—ниле-вете пенге лазовкст, лангаст — шапкам, варьган, седеяк паро — кемень. Вельксэм — фуфайка нулынем. Вадря! Удан теке кулозь. А марян кодаткак калгодот, кодаткак сэредькст.
Весь ютась.
Телефонось, мериндеряй: дирь-дирь кавксть, — Кочкурвелев, колмоксть — содак, гайневтить Орданьбуев, чийть, кепедик трубканть. Кунсолок, сёрмадт, эрявиндеряй, кармавтомат «верце» бояртнэнь пельде телефонограмма. Веть, мезесь паро, «фонось» чуросто максни вайгель, удомам а сезни.
.Ахолдыя лангстон фуфайканть ды вырк стинь. Валскентень кудом экшендсь. Уштома? А эряви. Чокшнес цидярдыть. Ёрвалдыя ведранть велькссэ кельме ведьсэ чамам, оршнинь-теинь, каподинь стуворонть лангсто чокшне кадозь тетрадень-книгань ды — видьстэ школав! Пекем чокшне пештия.
Урокон?
Мезть-бути «писартнень» ды сакшныцятнень туемадост мейле теинь. Аштинь талай чокшнес. Книгатне, ловномась — сынь урокон. Зярс эзия прядо Павка Корчагиндэ «Как закалялась сталь» ёвтнеманть ловноманзо, толонть эзия мадсте, эзинь кузе «чувто лангс». Те книганть ускизе Мишок лелям, Элина патянь, тетянь сазоронзо, мирде. Фронтсто. Тосояк ловность Корчагиндэ! Книгатненьгак, аволь ансяк цёратнень ды «полуторкатнень», пурнакшнынзе «ойнась». Секскак ловнан, мезе кедь малазон понги, мезе муян.
Сундерьгадозь пурнавкшныть «конторазом» зярыя атят. Ютксост свал сакшныцясь — Шираень Тилюс. Эчке. Аволь сэрей, [75] аволь алкинеяк. Корсяня вайгелезэ цярнозь цярны. Ракси, ёвтни, крои рузкс. Ледстни аволь ансяк «матьнень», «богтненьгак». Сакшныть, кода течияк, ламот «таргамо», шкань ютавтомо. Кой-кить эйстэст орголить кудонь-кардазонь тевтнедеяк. Монень чаво валост а вечкевить, а книгас, а урокозот а педяват, ды ков молят.
Качамось — аволь узере, кавто пондонь гиряяк пачканзо а пры. Махорка чинесэ лексить стенатне, эземтне, потолокось. Сынь мик тюжалгадсть. Панемс сонзэ иля арсеяк.
— Ха-ха-ха! — зэрни Тилюсонь кшнинь вайгелезэ. — Вачитя, вачитя монсетнень, ох и виевть! Пильге лангсто прат!
Валтнэнь ёвтазь, венсти тень газета панкскес сювордазь «цигар». Тонавты таргамо. Мельганзо Аржай Иван атяяк нерьги кургозон, шны «поцемканзо».
— Мезть кунсолат, монь седе нардевть, на кирдть! — превть максы Иван.
Саия. Ноцковтынь. Козозевинь.
— Мезеньгак «тансть» качамосост арась, — меринь сельведень пачка Иван атянень «сеянь пильгензэ» мекев максомсто, — иля манче!
Прядовсь войнась. Кой-зярдо совси варштамо-таргамо Пошань Аркай. Сондензэ сэрей велесэнть арась. Натой мендявозь аламнеде. Мелезэнь тукшны сонзэ валаня, пупорькшнемань а содыця келезэ. Мерить истятнэнень «лавжа кель». Аркайнень истя а мерят. Цёрась сон книгас ваныцятнень эйстэ. Ламо соды ды машты содазденть мазыйстэ ёвтнеме. Кунсолынь сонзэ превей кортамонзо чеерень ванстыця псакакс, бажинь вакска а нолдамс вал пелькскеяк.
Зярыя иень перть «вень боярокс» улемстэнь эрьва мезть лиснесть мартон.
Весть Павол Ваня, вейсхозонь прявтось, стявтымим ансяк кенерсь ашолгадомо. Мерсь чийнемс ды тердемс истятнэнь-истятнэнь. Арси ушодомс кодамо-бути покш ды пек эрявикс тев. Кизэнь ветне нурькинеть. Сеземс удомам истя шкадо икеле! Сыргакшнынь уш... Мезе мартом лиссь, мекс лисемадон икеле озынь стувор экш, а содан. Озынь ды... матедевинь. Зярс удынь, а содан.
Цяр-цяр панжовсь кенкшесь, ды карциганокс каявсь эйзэнь прявтось. Аноколь раздемс. «Тон, ды тон, пинень видьме, идемевсьлевкс! — рангсь лангозон эрьва кодамо «мазый» валсо, кежтнеде сельмсэнзэ кивчкаесть ёндолт. — Ды тонь кулозь верьгизт раздевлидизь!»
[76] Прянь нолдазь аштинь икелензэ, визькстэнть — теинь истямо зыян, — чумонь марямодонть аноколинь туемс кияксонть пачка.
Умок, вай, кода умок те весе ульнесь,
* * *
Сынь варштамо велев. Умок араселинь. Ютыя Кирданов лейненть пириця, асфальтсо вельтязь сёлтонть. Икеле — ламо иетнеде ютасть, — сонзэ таркасо ульнесь чувтонь сэдь. Вана таркась, косо тусто сувсо копачазь шкатнестэ, зярыя иеть ульнинь «вень прявтокс». Вете стенас, кавтов панжтневиця вальма марто «кулаконь кудодонть» эзь кадово кирьпець пелькскеяк. Ансяк цельця пиципалаксонь куракшкетне ледстнить — тесэ зярдо-бути аштекшнесь кудо. Кинь? Кить эйсэнзэ эрясть? Ледстнить се эрямодонть, апак капша, анеявиксстэ молиця шкадонть, аволь ансяк палакскетне. Кецневтимим, эрязкавтызе чавомо седеем... тополесь! Сон, сон ульнесь «конторанть» икеле гаикс пацясо копачазь виде рунго тейтернекс! Ульнесь... Ней, ванан, допрок кальдявсь эйзэнзэ сыречись: тарадонзо кой-кува коськсть, комель керезэ лазнототсь, лопанзо варявт... Иеть, иеть...
«Тополь ялгинем, ёвтак тень зярыя лембе, оймень вадяшиця валт вейсэ эрямодонок, эйкакшчидень!» — пшкадинь эськан алганзо ютамсто лангозонзо ванозь. Маримим... Ливтясь та-косто элякалиця вармань ялтке, ды чоледезевсть сыре чувтонть таркань-таркань ожосо токазь каргоць лопанзо. Мария тень, ды, теке лембе ёнкстнэстэ мурдыця нармунть, совасть превзэнь ледстнематне умок-умок ютазденть...