Эрзянь ёвкст (М. Е. Евсевьев, 1928)/34
РЕПСКЕ.
Эрясть-айшть атят бабат кавонест.
Арасель сынст а эйдест-какшост, а лишмест-скалост.
Кармась бабась кудонь тенцеме, мусь репс видьме и мери атястень: „Азё, атя, видик репсэнть!”
Атясь мери: „Козо вица? — модась арась!” Бабась мери: „Азё кудо-потмарс видик!”
Атясь куйсь кудо-потмарс, видизе репс видьменть.
Аламос эрязь бабась мери атястень: „Атя, азё вачик репсэнть, — покшто кайсь?”
Атязь куйсь, вачизе репсэнть и мери: „Сараз алшка кайсь.”
Аламос эрязь бабась таго мери: „Атя, азё вачик репсэнть, покшто кайсь?”
Атясь куйсь, вачизе ды мери: „Салдырксэшка.”
Аламос эрязь бабась таго мери атястень: „Атя, азё вачик репсэнть, покшто кайсь?”
Атясь куйсь, вачизе и мери: „Ваканшка.” Бабась мери атястень: „Атя, кустимак моньдяк кудо-потмарс, мон-гак вачтаса репсэнть.” Атясь мери: „Кода кустятан? тон монень а кустяват.”
Бабась мери: „Мон озан мешокс, тон сускик мешоксть пеезэть и кустямак.”
Бабась озась мешокс, атясь сускизе мешоксть пеезэнзэ и кармась куземе кудо-потмарс. Бабась аламос ашти, мешокстонть атянть кевстьсазо: „Атя, васоло?” — Атясь пеень пачк мери „Э-э.” Аламось аштезь бабась таго „Атя, васоло?”
[ 106 ]Атясь таго „Э-э!”
Кода уж совсем аламо кодавсь куземс, бабась таго мешокстонть кевестизе атянть: „Атя, васоло?”
Атясь мериксэль „маласо”, панжизе кургонзо и меньсь пейстэнзэ мешоксь. Бабась гулдор-галдор мешоксть марто прась масторов и кулось. Кадовсь атясь бабавтомо.