Эрзянь ёвкст (М. Е. Евсевьев, 1928)/21
КОДА ЭРЯСТЬ ИВАН МАРТО МАТРЯТ.
Эрясть-ашсть атят-бабат кавонест. Ульнесь сынст ве цёраст. Лемзэ Иваноль. Кода кайсь Иван покшсто — урьвакстызь. Васинь вене Иван одирьванзо марто мацть удомо утомс и курок кеместэ матедевсть. Пелеве шкане, марясызь, ки бути утом-кенкшенть стукадизе и пшкаць: „Удутадо эли аштитядо?”
Иван мери: „и удутанок и аштитянок, арситянок, кода мастор ланксо карматанок эрямо”.
Ломаньсь кевстиньзе: „Оцто согласятадо парьсте и сюпавсто эрямо эли сырестэ?”
Иван мери: „Кода ней пшкаттянок?”
Матря мери: „Давай лучи согласятанок сырестэ парьсте эрямо, ней оттанок”.
Иван пшкаць ломаньстень: „Сырестэ лучи сюпавсто эрямось!”
Ломаньсь мерьсь: „Истя ино улезэ”. Вачкодизе утомонть и ёматоць.
Иван марто Матрят листь утомстонть. Утомонть вакснэ кияк арась. Совасть мекев и таго мацть. Сыргойсть валське и ваныть: аштить сынь ведь кунчкасо, усиясо. Якасть, якасть усияванть, — эсть муй мастор ланкс печкима тарка — кругом ансяк ведь.
Вансызь — усиястень уи венчсэ од цёра.
Иван мери: „Од цёра, печтимизь минек берёк лангов”.
Од цёрась мери: „Мезе макстадо? печтятадызь!”
Иван мери: „Мезе вешат, сень макссынек”. Печтинзе од цёрась и мери: „Ну, давай ней козякайкат!”
Иван кармась а максомонзо. Сынь кундасть кавонест козяйкайстень и кармасть кавто ёнов ускомонзо. Иван сезизе Матрянь покай ожанзо. Од цёрась саизе Матрянь и тусь маронзо. Кадовсь Иван ськамонзо, кадовсь кедезэнзэ ансяк покай ожась, и кармась рангамо.
[ 76 ]Ранксь, ранксь, пекезэ вачсь, — тусь берёк ланганьть ярцамксонь вешнеме. Васов, а васов мольсь, вансы яминева уйни кал. Сон кундызе се калонть, пидизе и сэвизе. Ярцамодо мейле маць оймсеме. Покай ожанть путызе прялонзо. Удомстонзо покай ожанть салызе кренч, кандызе чувто пряс и тейсь лангозонзо пизэ.
Сыргойсь Иван; ваны, — покай ожась арась прялонзо. Кармась таго аварьдеме. Аварьць, аварьць, нартнинзе сельведензэ и тусь покш киява.
Васов, а васов мольсь, пачкоць башкир велес, совась крайсэ кудонтень и сивець работникекс. Эрясь кавто иеть, саизе эрямо питнензэ и таго тусь киява.
Мольсь, мольсь, пачкоць таго башкир велес и сивець сюпав башкирнэнь роботникекс. Се башкирэнть арасельть эйкакшонзо; сынь эрясьть атят-бабат кавонест. Ютась ие, куд-азорось кулось.
Весть азоро авась кучизе Иванонь вирень керямо. Иван мольсь вирев. Керясь ве чувто. Ваны — чувто прясонть пизэ, пизэнть ало ашти покай ожась. Саизе сон ожанть и сась кудов.
Азор-авась неизе кецтэнзэ ожанть и кармась кевкснемензэ: косто саизе сон покай ожанть и кодамо сон ломанесь.
Иван ёвтнизе тензэ весе эрямонзо.
Азор-авась мери: „Ведь тон монь мирдемат”. Сестэ сынь содасть вейкест-вейкест и кармасть вейсэ эрямо.
Весе ули-парось кадовсь сынест.