Эрзянь Мастор/2011/22/Чачома Мода лангсо

←Чачома Чи марто, Калаганонь Керяз!

Эрзянь Мастор, № 22 (366), 30 ноября 2011 редактор Нуянь Видяз, Кшуманцянь Пиргуж
Чачома Мода лангсо

Эрзянь Покшчи Самарасо→

Статья на сайте газеты: № 366, 30.11.2011, Чачома Мода лангсо

Чачома Мода лангсо

Баргов Анатолий Николаевич

Выставка МУК "РДК" "Аврора" Покш Игнатбуесэ, Мордовия

2011-це ие, ацамковонь 25 чи

* * * * * *

А. Н. Баргов чачсь 1955-це иень медьковонь 22-це чистэ Магнитогорск ошсо. Эйкакшпингезэ ды одксшказо ютась Мордовия Республикань Покш Игнатбуень Андреевка велесэ. Прядызе Ицялонь педагогикань тонавткаенть-училищанть (1974), Чуважонь Масторонь И. Я. Яковлев лемсэ педагогикань институтонь художествань-графикань куронть (1991).

1995-це иестэ саезь Россиянь художникень Сюлмавксонь ломань, 2002-це иестэ саезь Мордовия Республикань Сюлмавксонь прявт.

А. Н. Баргов артницясь — Мордовия Республикань Прявтонь Казнень ды Россиянь Художествань академиянь сырнень медалень Лауреат. Максозь тензэ лия шнамо грамотат ды дипломт.

Шкинемасонзо покш тарка саи пейзажось ды натюрмортось («Зимняя Сура», 1995; «Пробуждение», 1997; ды лиятат). Ваныцятнень мельс тукшны колмо пелькстэ покш картинась «Раськень Озкс», кона сермадозель 2000-нь иестэ, куроксто Эрзянь Озномань коенть ютавтомадо мейле.

Артыцянть артовксонзо невтневсть тескень, регионютконь ды масторютконь выставкатнесэ. Теде кортыть ошонь лемтне, косо раштавсть кецнемат: Саран ош, Самара, Шубашар, Н. Новгород, Москов, Вологда, Саратов, Минск, Вена... Теде башка ульнесь раськеютконь пленэрсэ: Польша, Словения, Австрия, Чехия, Германия.

А. Н. Барговонь учовиця экспозициясонть невтевить сыця ваныцятненень колоньгемень артовкст-картинат. Ютксост, «Раськень Озксто» башка, «Шумбрат, фестиваль!» (2007), «Воскресный день» (2009) ды эрьва кодамо иестэ сёрмадозь натюрморт: тундонь балягат, сиренень цицькат, якстерестэ мизолдыця пионт.

* * * * * *

Арсетяно Барговонь Толайнень кеняркст, паро ёжо, изнявскт шкинемасо ды аёвтавикс кеняркст вастомадонть искусстванзо вечкицянзо марто.

«ЭМ»-нь теицянзо ды ловныцянзо

RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.

EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.