Эрзянь Мастор/2011/09/Васолдо ванозь неяви седеяк!

←Подписка "Эрзянь Мастор"

Эрзянь Мастор, № 9 (353), 16 мая 2011 редактор Нуянь Видяз, Кшуманцянь Пиргуж Васолдо ванозь неяви седеяк! сёрмадызе Нуянь Видяз

Ансяк истя, Саша!→

Статья на сайте газеты: № 353, 16.05.2011, Васолдо ванозь неяви седеяк!

 

Васолдо ванозь неяви седеяк!

Ледстнемат Йовлань Олодо, умонь шкань Эрзянь келень чиденть

 

*  *  *  *  *  *  *  *  *

Видестэ редякшынызе тень Ине поэтэсь, кадык ёвтакшнызеяк аламнеде лиякс: «Чамасто чамас ванозь чаманть тон а нейсак!» Видестэ, ды аволь педе-пес. Йовлань Оло маласто ванозьгак неявкшнось цитниця тештекс. Эрямстонзояк лемезэ жойнезь жойнесь. Содылизь ламо масторсо. Вана уш кеметь иеть арась ютксонок, а совси «Эрзянь Масторс», а ёвтни ансяк ютавтозь концерттэнзэ, теезь тевдензэ, мезе арси теемс седе тов. Айгсь эйстэнек ды кармась чарькодевеме, марявомо покштояк покш ёмавксось.

Яла кортыть: а полавтовикс ломанть арасть. Кортыть... Куш кодамо кие илязо ули — превей, аволь пек, сюпав талантсо эли сынтемест — сонзэ кондямо а муят. Эрьвась сонсь. Эрьвань эсензэ обуцязо, арсеманзо, вановтонзо, ёжонзо... Паряк, сы шка ды сы Олонь кондямо. Ансяк сон уш ули а Йовлань Оло. Вадря-берянь, ансяк а сон.

1990-2000-це иетнестэ Эрзянь Келень чись Эстэнь Масторсо мольсь таргонь перть. Вастовоматт, концертт, выставкат...

Те ульнесь, маряви, 2001 иень чадыковсто. Пачкодинек Таллиннс. Чокшне малава сынек «Монастырень амбарс». Истя лемдязь ресторан ёнов молиця кудось. Мекс истя, а содан. Содан лиядо: тесэ ютавтневить эрьва кодамо Раськень концертт, вастовомат, читть. Се чись алтазель Эрзянь келентень. Ветицязо «Торама» моронь курось.

Залось пешксе. Ушодовсь чокшнесь. Концертэнть вети «Торамонь» прявтозо, Йовлань Оло. Корты, яволявтни моронь лемтнень, ёвтни эрзякс. Вакссонзо цёразо Виталий. Сон стакачинь апак сода тетянзо валонзо ютавты эстэнь кельс. Оршазь цератне весе эрзякс. Викшнезь панарстост сельметь а саевить!

Моро, омбоце, колмоце... Вайгельтненень тарка а саты, бажить ушов, олячис. Моротнестэ ламот таргсевиця валт-вайгельть. Эрязасто моравикс морось серьгедсь киштеме. Стувор-столь экшсэ аштицятне сеске кундасть кедте-кедьс, ды теевсь покш, капшазь чарыця эрий кирькс. Гайги морось, даволкс чары кирьксэсь. Кургтне цимбельдить мизолкстнэде.

«Торамо» серьгедсь од, нусманя моро. Залось оймась. Морось прядовсь, Виталий эстэкс мерсь тере (сюкпря) кунсолыцятненень ды цератне валгсть сэрей, кумажавидьга, таркинестэнть. Тарказост кузсть Эстэнь Масторсо эриця эрзянь аватне, сынст морокурост. Прявтост Клинова Раиса. Оршазь, оршазь сынь кода мазыйстэ! А стяко Париж макснесь те мазычинть кис сырнень медаль. Кие-кие, а французтнэ чарькодить, содыть лув оршамонь тевтнесэ.

Покш концертэнь эрзянь кувтась прядовсь. Поладызь моронь пелькстамонть украинань, молдавань ды лия раськень вейсэндявкстнэ.

Таргазель кенярксчинь стувор (столь). Каванямкатнеде, симемапельтнеде эль эзь лондадо! Ёвтазельть аволь аламо паро валт эрзянь келень Чиденть, «Тарамодо». Шумбрачи арсесть эрзятненень лия раськень ломантне. Сайнесь ды паро валт ёвтась Эстэнь Масторсо Россиянь посолось (кучовиксэсь). Ульнесь сон нинзэ марто.

Ютасть се чиденть мейле иетнеде байтяк. Ламо-мезе неезденть-марязденть удемстэнь нардавсь. Кадовсь, ванстовсь превсэнь се чокшнеденть истямо пелькске: шказо пелеведе мейлень малав колмо част, а ёвтавияк кода сась удомам, сизинь, а моротне гайгить, гайгить... Инешкипаз, зярдо лотки те кеняркс, чирень а содыця леесь? Ведьметне Олонь ды Яаконь, «Монастырнеь амбаронь» прявтонть кедьсэ. Кевкстнян сынст, састыне, ёжонь марязь ледстнян талаень шкадонть.

...Валдо, астувтовикс картина кадовсь удемень сормсевксэзэнь 2001 иестэ Тартусо ютавтозь Эрзянь келень чиденть.

Ускимизь Ратушань кузтема икелев. Кудонтень совамсто Йовлань Оло лыйк келемтизе Мордовиянь Масторкоцтонть (флагонть) ды минь, Эрзянь Масторсто сыцятне, «Торамонь» цератне моразь, кузинек ратушань омбоце этажс, совинек вастневемань апокш залс. Теке шкастонть лия кенкшка моразь совасть Эстэнь Масторкоцт марто Клинова Раисань Эстэнь Масторсо эриця эрзянь аванзо. Эйстэнек комсь малава. Стинек келейгавтозь чирькекс. Сеске совасть залонтень мазыйстэ оршазь мазый од ава ды цера. Аванть кедьсэ канднемкай. Сон ютась икельганок ды эрьвась эйстэнек сайсь кандтнемкайстэнзэ шампанскойде пештезь бокал.

Церась, Тарту ошонь мерэнть полавтыцязо, ёвтась паро арсемат миненек, Мордовиянтень, шумбрачинь арсемань валт эрзянь раськентень. Эстэнь кельстэ эрзянь кельс ды мекевланг ютавтсь Нина Асмяа (сон Мордовиянь Березникень буе Гузынцы-Кузвелень, содыль сестэ вете-кото кельть).

Каршо вал кирдинь Эрзянь келень идема Фондонть пельде мон. Меринь сюкря Эстэнь Масторонь ды эстэнь вейсэндявксонь прявтнэнень паро вастоманть кис, арсинь паро эрямо эстэнь раськентень, ванстомс ояксчинть ды олячинть, эскелямс эрямонь китнева прянь кепедезь ды моразь.

Копордынек мизолдозь-пеедькшнезь кандозь шампанскоенть ды «Торамо» вейсэ Таллинстэ сыця эрзянь аватнень марто серьгедсть, зэрть мерсть вальматне, васня эрзянь, мейле эстэнь Моро.

Вана кодат валдо, оймень эждиця, паро ежонь сыремтиця ледстнемат кадовсть Эстониясо се улемадонть, се Эрзянь келень Чиденть, Йовлань Олодо. Ламо мартонзо лезэв тевть теекшнынек эрзянь келенть идемга, седеяк ламо теевлинек, ансяк...

 

*  *  *

Таштамковонь 6-це чистэ «Торамонь», Йовлань Олонь вечкицянзо, сыть Сыть Вирь Тавлав (Мордовия) Россиянь ламо ёндо.Сыть омбо масторстояк. Олонень топодевельть 60 иеть. Весе виенек путома, илязо тееве те фестивалесь ансяк киштемань-морамонь лезэвтеме илакс. Истятнеде косо ансяк а ютавтнить! Эрьва сыцясь (эрьвась!) теевезэ «Эрзянь Мастор» газетанть, «Чилисема», «Сятко» журналтнэнь лангс сёрмадстыцякс. Ансяк истя! Теемс сыцятнень аволь ансяк киштицякс-морыцякс, васняяк арсицякс, ловныцякс, седе ламо содыцякс, эрзянь келень ванстыцякс. Те минек ВАСЕНЬ меленек, ВАСЕНЬ бажамонок, ВАСЕНЬ мелявксонок. А ловныця нациясь — а раське, а нация. А кие а ловныця ломанесь?

Нуянь Видяз