Эрзянь Мастор/2010/24/Од ие марто оят-ялгат! С новым годом!
| Статья на сайте газеты: № 344, 27.12.2010, Од ие марто оят-ялгат! С новым годом! |
| Од ие марто оят-ялгат! С новым годом! |
Од иесь — те валонь кирдема Ютазенть, удалов Кадозенть икеле. Мезе теить, кодамо лезэ кандыть эсь Раськентень? Мезе эзь тееве? Мезе теемаль? Неть кевкстнематне сыть превзэть.
«Эрзянь Мастор», кодамо кулясо кецневтимизь, кодат тевть топавтозельть 2010 иестэ?
Весемеде покш изнявксось, прянь апак шна, вана кодамо: стакачитнень лангс апак вано, сакшнынь тыненк иень перть, ловныцят, комсьнилеексть. Виенэк корос — те аволь аламо. Эряволь пачколемс ниленьгемень кавксоксть! 48-ть! Лиякс ёвтазь, таргозонзо весть. Те бажамось кирдеви превсэнек кемкотоводо ламо иеть. Тееме сонзэ уликчикс... кодаяк а тееви. Тувталось? Аволь вейке. Васенцесь — арасть ярмакт. Омбоцесь — пек резы-сэреди Эрзянь Раськесь. Аламот кадовсть ярмаконь (лезэнь) каицятнеде.
Паз, чангодть!
Ульнесть-арасельть тенк сёрмадыцят 2010 иестэ?
Сынтемест аволинь пачколе тынк сельме икелев. Пештсть ды пештить сермань паргонок Мацьказонь Лефай (Москов), Дригань Толай (Самара енкс), Аношонь Тумай (Н-Новгород ёнкс), Эрюш Вежай (Мурман ёнкс), Прокаень Константин (Пенза ёнкс), Калаганонь Керяз, Шарононь Сандра, Сазононь Лева, Казаконь Петя покштянок (Саран ош), меельсе шкастонть парсте невтизь перань пштичист Боляень Сыресь (Киев) ды Равонь Андю (Татарстан). Кецневтекшнымизь Вирява...
Паз, чангодть!
Кие тенк лезды финансо?
Васняяк, тешкстаса, сермадыцятне. Улить истят, конат сермадстомасо «ЭМ»-ть лангс лездыть — лиснеме шкастонзо. Карксамга сюконян Грацень Катянень, Пензасо эриця авантень. Марят, Катя сазорнэм? Мель путовольткак истя лиятнеяк, теевлинь мон эрьва таргосто лисницякс! Сюкпря Туркичень Сантурнэнь, Исаень Микольнень, Прокаень Костянень (Пенза), Аношонь Тумайнень (Н.Новгород). Сюк-сюк Пачалгонь Толайнень (Коптяжвеле, Оренбург ёнкс), Рябонь Пашанень (Москово ош), Кирдянонь Васянень (Татарстан), Гайниньканкь Пичайнень (Красноярск чире), Кирсанов В.П. (Самара). Весемеде берянть тевтне Ульян ёнкссо.
Паз, чангодть!
Кодат, мелем содамс, «Эрзянь Масторонть» ловныть Модамасторонть келес?
А пеняцян. Иень перть совсесть сайтэзэм 9295-сть 41 масторсто! Весемеде ламо, содави, ловность эйсэм Россиясо — 4666 ломанть. Россия мельга эскели Украина. Тесэ ловныцям 196. Колмоце таркасот Американь сюлмавозь Штатнэ — 127. Мейле молить Кувейт, Германя... Берянь те, иень перть панжтнизе интернет-вальмам ансяк вейксэксть Суомис. Россиясо, весемеде сеедьстэ совсесть сайтэзэм: Московось — 413, Мордовия Республикась, Нижней Новгородось — 125, С.-Петербургось — 74, Пермань чиресь — 57, Самара ёнксось — 44.... Весемезэ 45 таркава. Малав 10 тёжат Интернет-ловныцят! Кецневти.
Паз, чангодть!
Ават тонь, «ЭМ», эрзянь келень идема Фондось. Кода сон топавты лемензэ?
Сон, авам, — васенце нежем. Ветямкурозо (прявтось Кшуманцянь Пиргуж) ламо вийть путсь «ЭМ»-с сёрмадстомантень. Вешнесь, пшкалесь, энялдсь, кармавтсь — теевемс монь ловныцякс. Кенярдовты: 2011-ес Мордовиясо «ЭМ»-с сермадсть, мелень коряс, седе ламо!
Паз, чангодть!
Кодат лия тевть топавтсь газетадонть башка Фондось?
2010 иень весемеде Ине тевесь — Эрзянь Раськень Озксось. Сон ютавтовсь, кода свал, Чукалвелесэ медьковонь 10-це чистэ. Сакшность озномо, покштянь покштяст лемень кундамо сисем тёжа малава эрзят. Весемеде ламо ульнесть Пенза ды Самара ёнкстнестэ. Ульнесть сакшныцят мик Китайстэ! Покш тевекс ловома эрзянь ковкерьксэнь нолдамонть. Кеветеецеде! Проектэнть авторозо — Эрюш Вежай, тиражонть теицязо Алексей Годунов. Сравтни, 3000 экз-т, Кшуманцянь Пиргуж. Седейшкавань сюкпря, цёрат, тенк! «Мордвинэнь чиденть» мейле лавшолгадсь Эрзянь келень Чись. Ялатеке 2010 иестэ ютавтовсь, 2009 иень коряс седе келейстэ.
Паз, чангодть!
Неть тевтнеде минь, ловныцятне, содатано, ловнынек. Мезе лия теевсь?
Мон, «ЭМ»-сь, ды Фондонь прявтось якинек эрзянь келень покшчис Обран ошов, Лукоян ошов, Самарав, Пензав. Неть арднематне лездыть муемс «ЭМ»-тень ловныцят, миемс аволь аламо книгат, ковкерькст, газетат, журналт, моро марто дискт. Те макссь, куш аламошка, лезкс ярмаксояк. Сынь пек эрявкшныть «ЭМ»-ть нолдамсто ды ловныцятненень пачтямсто.
Паз, чангодть!
Кодат тевенк литературань паксясонть?
Мон, «ЭМ»-сь, уш ёвтнинь, 2010 иестэ эрзянь келень Фондось, видьстэ мерезь, Кшуманцянь Пиргуж, нолдызе книгатнестэ книганть, Шарононь Сандрань «Масторава» эпосонть. Тиражозо... 500 экз. Пек аламо. Теньгак стака микшнемс. Те корты вейкеде — пектеяк пек лавшомсть, рузыясть эрзятне, коськсь вельть эрзянь келесь. Аламолгадсть ловныцятне кода эрзянь, истя рузонь кельсэяк.
«Масторавадо» башка лиссь Нуянь Видязонь «Эрязденть арсезь» ледстнемань книгазо. Тиражозо 500 экземплярт. Теяк путовкс эрзянь келень ванстомантень.
Вана истя, нурькинестэ ёвтазь, эрясть, тейсть тевест минек Идицянок, Эрзянь Фондось ды сонзэ, кой-зярдо шождасто, а кой-зярдо аволь пек, лексиця тейтерезэ — «Эрзянь Мастор» газетась.
Од ие марто, церат ды ават, сыреть ды одт, эйкакшт! Кемтяно, 2011 иень Якшаматянь кептерезэ карми седеяк сюпав аволь ансяк жомкасо ды ламбаськайсэ, а пародояк паро тевсэ, паро мельсэ, кецьневкссэ. Кемтяно, эрзянь келесь, минек кенярксонок ды покштояк покш мелявксонок, карми лексеме седе шождасто! Шумбрачи весенень Од иень читнестэ ды свалдояк свал
|
RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal. |