Эрзянь Мастор/2010/23/Дарянь Валянень каршо вал

←Мордовиясо сёрмадстомань коволось прядовсь

Эрзянь Мастор, № 23 (343), 14 декабря 2010 редактор Нуянь Видяз, Кшуманцянь Пиргуж Дарянь Валянень каршо вал сёрмадызе Нуянь Видяз

Нам пишут→

Статья на сайте газеты: № 343, 14.12.2010, = Дригань Толайнень =

 

==============================

= Дарянь Валянень =

*каршо вал*

––––––––––––––––––––––––––––––––

Сюкпря, Дарянь Валя! Сюкпря, Валентина Ивановна!

Толайде сермат ловныя паро мельсэ. Пек кецневтимек: ветеце ие ловнат «Эрзянь Мастор» газетанть. Васня сакшнынь мельс: сермат «панжадокс» а невтемс. Ды вана мекс. Концертнесэ, фестивальтнесэ, киштематнесэ, моротнесэ, эрьва кодамо тюсонь «стольтнесэ» лы лиясо-мейсэ эйсэнек манчить. Пелян газетатнень панжомс, куш иля совсея интернетскак. Морот, морот... Куш пилеть потомдыть! Келенек, натой тесэ, Мордовиясо, куломань лексемасо лекси, садиктнесэ чоледить эйкакштнэ ансяк... рузокс. А минь чинек-венек моратана-кишттяна. Теде, вана газетатне, сынсь бояртнэ-властне чать-мо-нить! Теке калт. Чатьмонят, пек берянь, тонгак, Дарянь Валя. Иля покордаво.

Толайде. Самара ёндо эрзянь литертатурас, наукас сакшность 30-це иетнестэ, ды мейлеяк, ламодояк ламо ине, превей, ламонь содыця ломанть. Сынь стявтокшнызь пильге лангс эрзянь келенть, литературанть, кортасть, сермадсть, арсесть эрзякс. Те Раптанов Тимофей , Артур Моро, Радаев Василий, Люлякина Серафима, Втулкин Михаил, Кириллов Петр... Весе сынь сермадсть ЭРЗЯКС! Ней кадовсь «ЭМ»-с ды «Сяткос» эрзякс сёрмадыця вейке — Дригань Толай. Кодамо сюпав, ванькс келезэ, кува эряви теевкшны казямокс, кува-кува — пейди. Минь тензэ весе ловныця эрзятнень пельде ёвтатано сюкпря. Сюконядо тыньгак. Эрзякс парсте сёрмады Журавлев Числав. Сон поэт, статьят а сермады.

Сёрмань кучий дугинем! Ламо тевть топавтадо. Концертт, фестивальть-мезть. Вадря. Тевесь паро. Ансяк содама: морамонь-киштемань ормаскадомась ютавтови ве мельсэ: моротнесэ, концертнесэ, эрьва кодамо тюсонь фестивальтнесэ, центратнесэ... копачамс, кексшемс эрзянь келенть куломанзо. Те чарькодеви пакшантеньгак. Седеяк «Эрзянь Масторонь» ловныцятненень.

Мезе тема?

Меленть — эряви идемс эрзянь келенть — совавтомс эрзятнень превс, седейс ды ёжос. Вана васень, весемеде эрявикс ды лезэнь кандыця тевенек. Тень туртов эрявить кулянь сравтнема нежеть (средства массовой информации — СМИ) — TV, радио, книгат, газетат, журналт... Ловт, Валя сазором (тон мондень одат), истямонок арасть. Ули зярс вейке — «Эрзянь Мастор» газетась. Сон, сон баягань чавицясь! Сон Эрямос, Валскень чинтень тердицянок! Те аволь прянь шнамо. Ансяк вана тынь, Самарань эрзятне, сонзэ... а ловнотадо. Те покштояк покш кажо (беда). Лиси, мезеяк а содатадо эрзянь келенть ёжодонзо, мезе тееви мартонзо, а содатадо эрзянь вейсэндявкстнэнь важокс (слугакс) теемадо, а содатадо кить келенть кис аштицятне ды кить отьмас ваявтыцянзо. Топавтодо покш тев, анскя аволь сень, кона эряволь ды эряви вас-ня-як! Сынст, властнень, целест-мелест вейке: седее курок рузыявтомс лия нациятнень. Тень туртов эрзятнень кармавтыть киштеме-цяпамо. Тень кис ярмакт а ловить, неть самай фестивальтнес-центратнес чудить ярмаконь лейть. Тень эряви чарькодемс, Валя сазором! Мерят, ловнат «ЭМ»-ть вете иеть. Кода сестэ эзь панжово кие ки ды кие мезе теи?

Паронь арсезь Нуянь Видяз,
«Эрзянь Мастор»

P.S. Кеман, сёрмады теть сонсь Толай атя