Эрзянь Мастор/2006/24/Од, 2007-це, ие марто, оят-ялгат!

←Прявтлопа

Эрзянь Мастор, № 24 (248), 28 декабря 2006 редактор Нуянь Видяз, Кшуманцянь Пиргуж Од, 2007-це, ие марто, оят-ялгат!

Н. И. Меркушкиннэнь, Эрзянь ды Мокшонь масторонь прявтонтень→

Статья на сайте газеты: № 248, 28.12.2006, Од, 2007-це, ие марто, оят-ялгат!

 

Од, 2007-це, ие марто, оят-ялгат!

Вадрясто-беряньстэ 2006 иесь ютась. Мезе седе редявикс ды эрявикс раськентень, теевсь тенек сонзэ кемгавтово истя куроксто уиця ковонзо перть? Мезе кадови эйстэнзэ ледстнемакс?

Чадыковонь 16-це чистэ ютавтынек 15-де эрзянь келень Чи. Те лувось-кирдась максы лезэ, секскак эряви тензэ явомс седе покш мель ды ютавтнема ламонь-ламонь таркаво. Школадао башка клубга-кува. Теке жо тундонь чистэнь, эрьва кодат «пирявкстнэнь» изнязь, ёвтызе мелензэ Эрзянь омбоце Конгрессэсь, косо ульнесь васень таркасо кевкстемась: кода седе тов эрямс эрзятненень? «Пирявкстнэнь» трокска эскельдязь сакшность эрьва ёндо сядошка ломнать.

Эрзянь келень идема Фондось анокстась эрзянь келенть ёжодонзо Сермадовкс. Сон максозель Катрин Сакснэнь ды пек маштовсь Европань Советэнь парламентэнь ассамблеянть туртов, косо кунсолозельть кортамотне финнтнэнь-угратнень сельмень а сявадыця тевдест Россиясо.

Резонанс информациянь средстватнень-кедьёнкстнэнь ютксо макссь Кшуманцянь Пиргужонь, Инязоронть, эрзянь келень идема Фондонь прявтонть ёвтнемазо эрзянь келенть ковгак а маштовикс ёжодонзо Хельсинкисэ ожоковонь 14-це чистэ. 2006-це иестэ кеменцеде кецневтинзе эрзятнень эрзякс сёрмадозь ковкерьксэсь.

Весемеде покш тевекс, содазь, ловдано «Эрзянь Мастор» газетанть нолдамонзо ды пачтеманзо Россиянь келес. Мордовиядо башка пачколесь котосядодо ламо 35 регионс. Берянь, а содасынек зяро ловныцянзо интернетсэ. Куроксто панжсынек ловныцянть компьютерсэ ды ёвтасынек. Нолдамонь «планонок» топавтынек: иень перть вастневиде «ЭМ»-ть марто, ловныця ялгат, комсьнилеексть. Эряволь седе ламоксть ды ...

Кодат тевть «сявордомат» тенек 2007 иестэ эрзянь ды мокшонь кельтнень шумбрачист вадрялгавтомга? Мезе теема васняяк?

1989 иестэ саезь кармась неявомо-чарькодевеме: эряви, пек эряви фестивальтнеде, конференциятнеде, конгресстнэде башка, седе ламо виень путозь ветямс эрицятнень ютксо агитация кельтнень эрявиксчидест, явома мель, ламоксть седе ламо мель газетань, журналонь, книгань ды информациянь лия кедьёнкстнэнь сравтнемантень. Зярс а сови мелесь — чачома келесь эрязо! — ломатнень седейс, кортамс сонзэ совавтомадо эйдень кужос, школас, тонавтомань лия кудотнес а мезть. Секскак эрзянь газетань-журналтнэнь лангс сермадостомась, сынст сравтнемась Россиянь келес — те весемеде эрявикс, те покштояк покш, те мезе лангскак аполавтовиця тев. Сонзэ топавтомга эряви важодемс, важодемс ды тагояк важодемс.

Од ие марто, вечкевикс ловныцят! Арсетяно эрьванень паро-паро ёжо, пешксе, эль кепедевиця кескав мизолкст ды седеень витиця, кенярксонь раштыця тевть.