Эрзянь Мастор/2003/07/Йовлань Оло карми ютксонок свал

←"И секли их воров..."

Эрзянь Мастор, № 7 (158), 14 апреля 2003 редактор Нуянь Видяз, Кшуманцянь Пиргуж Йовлань Оло карми ютксонок свал сёрмадызе Нуянь Видяз

Прявтлопа→

Статья на сайте газеты: № 158, 14.04.2003, Йовлань Оло карми ютксонок свал

 

Йовлань Оло карми ютксонок свал

Ламонень те иень эйзюрковонь 11-це чись кадови паро лецтнемакс. Те чистэнть кемготово чассо панжозель Йовлань Олонень, “Торама” ансамблянь прявтонтень, алтазь концертэсь. Сакшныцятне истямо мазый, гайгиця ды эрьва ёндо арсезь концерттэ, маряви, эзть арсеяк.

Мадсь залсонть толось ды сценанть керш ёно аравтозь экранстонть пшкадсь аштицятненень эрьванень содавикс эрзянь панарсонзо Оло. Сон ды сонзэ ялганзо — мазыйть, одт, морыцят — та-ков молить, молить, молить. Оло эзь сода, эли, паряк, содаськак седеезэ, эскели куломань асодамонтень. Содась-эзь, ансяк лиссь истя: пачкодсь ды совась мельганок сыцятнень юткс.

Сакшность морыцянть оянзо-ялганзо, малавиксэнзэ, чарькодицянзо. Ютксост музыкант, художникть, журналист, студент, талантов ломанень вечкицят. Саран ошонь культурань Центрань Покш залось малав пешксель. Сакшность Олонь лемензэ кундамо, паро ламо тевензэ кис сюконямо. Лездась сон, “Торамадо” башка, лия ансамблятнененьгак, морамонь вечкицятнененьгак. Кода кенерсь, превс а саеви.

Концертэнь программась топавтовсь кавто часто ламо шкань ютазь. Марявсь ансяк час. Истя мазыйстэ ды домкасто, васняяк, арсезель. Морасть ламот ды ламо. Ветясть рузонь кельсэ, морыцяткак те кельсэнть ульнесть. Те лангс апак вано, концертэсь, ульнесь истямо ёжомарямо — мольсь пестэ-пес эрзякс ды мокшокс. Марявсть эйсэнзэ неть раськетнень оймест, арсемаст, бажамост вандынь чинтень.

Мазыель Буянкин Юриень (гитара) ды Алашева Ленань (вокал) номерэст. Ламонь мельс тусть морамост Комусова Татьянань, Бакичень Видяень, Балашкин Николаень, Панишева Ленань ды лиятнень. Кувать зэрнесь цяпамотнеде залось кавто... “Торамотнеде”: сыреденть — Дулкин Геннадий, Балашкин Николай, Гангеев Олег, Буянкин Юрий, Ацапкин Иван ды одтонть — Ромашкин Андрей, Конурин Володя, Гангеев Олег... Программасост ульнесь, а мезть кавтолдомс, содавикстэяк содавикс “Тюштя” морось. Кунсолыцятнень цяк эзинзе оймельгавто вейсэнь морось: “Торама” ансамблясь ды Курин Александрань джаз-группазо (“Торама” — джаз”).

Невтезель пек мазыйстэ теезь, неень стильсэ топавтозь балетэнь номер.

Программанть сюпалгавтызь содамочисэ музыкань ды моронь номертнэнь юткс совавтозь Олодо лецтнематне. Эсь вастнемадост, вейсэнь тевдест “Торама” ды сонзэ прявтонзо марто ёвтнесть: Алёшкин Андрей художникесь, Сураев-Королёв Геннадий композиторось, Тултаев Пётр министрась, журналистнэ Четвергов Евгений ды Маризь Кемаль. Улезэ мерезь, Маризь Кемалень стихензэ лангс Йовлань Оло сёрмадсь колмо морот ды колмонест гайгсть те чокшнестэнть.

Олонь куломадо мейле ютась пель ие.

Сон мартонок. Лия масторонь ломантнень мартояк. Карми ютксонок свал. А стяко концертсэнть ёвтазель мель: теемс Йовлань лемсэ эрьва иене музыкантонь туртов максневиця Казне; максовозо сон морыцянть тевензэ поладыцянтень.

Меельцекс. Аламот содыть: те концертэсь-реквиемесь аволь уле, а важодевельтькак ламо чинь перть оймсемань апак сода Кшуманцянь Пиргуж (Мусалёв Григорий), Мордовия Республикань вейсэнь эрзянь келень Идема Фондонь прявтось ды Чигажова Анна, Саран ошонь Культурань Центрань прявтось. Сюкпря тенк, лакиця седейть!

Нуянь Видяз